Baibo yọle ghe eluemhin-ebe mhan rebhe khin. Obọ Adam nin okpea nin ọhẹnhẹn, ọle mhan da le olukhọ bhi uku. Ranmhude ọnan, ẹgheso, mhan lu emhin ebe ne rẹ mhan kiọya. Jesu Kristi nin ọmọn nọnsi Osẹnobulua haosa bhi olukhọ nọnsẹmhan beji ọle yu nin mhan. Ranmhude izọẹse nọnsọle, Jehova sabọ re olukhọ nọnsẹmhan rẹ rẹhunmhan mhan. Ẹsele nọn na obọ Osẹnobulua vae ọnan khin.​—Tie Romans 3:​23, 24.

Ranmhude emhin ebe nọn manman kaka nin ẹbho eso lu, ele ki ha riale si Osẹnobulua dẹ rẹhunmhan ele. Emhin eghọnghọn nọn ghe Baibo yọle: “Aranlẹn nọnsi Jesu nin Ọmọn nọnsọle, ọle kpe mhan khia bhi olukhọ rebhe.” (1 John 1:7) Ahamiẹn mhan kioya bhi olukhọ nọnsẹmhan yẹ fideno, Jehova dẹ re ọkhọle rebhe rẹ rẹhunmhan mhan aharemiẹn ọne olukhọ nin mhan lu manman kaka.—Tie Isaiah 1:18.

Ahamiẹn mhan guanọ nin Jehova rẹhunmhan mhan bhi olukhọ nọnsẹmhan, ọkhẹke nin mhan luẹ emhọn ọlen​—nin mhan da sabọ lẹn uwedẹ nin ọle rẹ lu emhin, adia nesọle, bi ebi ọle guanọ bhi obọ nọnsẹmhan. (John 17:3) Jehova re ọkhọle rebhe rẹ rẹhunmhan ọrebhe ne kiọya ọbhi olukhọ nọnsele, ne yẹ fidẹno ha lu emhin esili.—Tie Acts 3:​19.

Ọ bha nọghọ gbe nin mhan rẹ lu emhin nọn ha re Osẹnobulua re ẹlo esili ghe mhan. Jehova len eji ọ da kẹ mhan re. Ọle manman mhọn ifuẹkẹ bi itohan. Ene ikpẹ esili nesọle nan bha be re ọle ha ghọn uwẹ rẹ luẹ ẹmhọn ebi uwẹ ha rẹ ha re ogẹn ji ọle yẹ?—Tie Psalm 103:13, 14.