Rẹ na bhi egbe obhokhan ha de mẹn rẹ wo hoẹmhọn emhin kẹkẹ nin Osẹnobulua man bhi ọne otọ nan. Ẹghe rebhe azagba-uwa nọnsẹmhẹn rẹ ha re ẹnẹ yo ene ẹgbo bi odighi ne mhọn-ose a, ne nẹga idunmhun nin mhan da ha nyẹnlẹn bhi Jyväskylä, Central Finland. Mẹn da yẹ wo hoẹmhọn elanmhẹn. Ẹghe nin mẹn rẹ ha yi obhokhan, ọ da wo ha yẹẹ mẹn rẹ ha re awa bi onogbo khiẹnlẹn. Ẹghe nin mẹn ki rẹ ha wanre, uwedẹ nin ẹbho eso rẹ ha re obọ oya mun elanmhẹn da wo ha ba mẹn bhi egbe. Akizẹbue, mẹn da deba usun ne khu ọbhọ nan rẹ ha re obọ esili mun elanmhẹn. Bhi ọne usun nan, mẹn da miẹn ẹbho nin mẹn bi ele ko mhọn ọkhọle ọkpa.

Ẹghe rebhe mhan rẹ ha wewe ẹmhọn elanmhẹn na bhi ughe. Mhan da ha taman ẹbho ghe ọ imhẹn nan rẹ ha re ilọn ọsi elanmhẹn rẹ lu ukpọn, la, nan rẹ ha re elanmhẹn rẹ dọnmhẹn ikhunmhun fẹghe. Mhan bhọ da mun agbotu gbọ nọn ha gbega elanmhẹn. Ranmhude uwedẹ nin mhan rẹ re iwobhuhọnmhọn ha khu ọbhi ẹmhọn elanmhẹn, ẹghe rebhe mhan bi ene gbẹloghe rẹ gbegbe. A ika eka igba nin unakpa mun mẹn khue.

Ọ iyi ẹmhọn elanmhẹn ọkpa rẹtẹ mẹn. Emhin ebhebhe ne bha dia nọnsẹn bhi ọne agbọn nan da sẹyẹ ha ba mẹn bhi egbe. Ranmhude ọnan, mẹn da dọ deba otu ne bunbun rẹ sẹbhi otu natiọle Amnesty International bi Greenpeace. Mẹn da wo ha re ahu nọnsẹmhẹn rebhe rẹ wẹnna nin ene otu nan. Mẹn da wo ha khọn nin ene ibhioguele, ene a re obọ ya mun, bi ene bha miẹn rẹ lu.

Arẹmiẹn mẹn wo dọnmhegbe nin mẹn rẹ lu ene emhin nan rebhe, mẹn da dọ kere ghe mẹn ida sabọ fi ọne agbọn nan deno. Arẹmiẹn ghe ene agbotu nan sabọ hẹnhẹn emhin eso, ele bha sabọ re ọkpẹnlẹn ọbhi ọnọghọ ne khọ nẹ bhi ọne agbọn nan. Ọ da diabe ọne agbọn nan riia fo, ghe ẹmhọn ọne agbọn nan na abọ. Egbe da wo lọ mẹn.

Ẹghe nin egbe iẹnlẹn ki rẹ lọ mẹn ranmhude mẹn bha sabọ fi emhin denọ bhi ọne agbọn nan, mẹn da munhẹn ha ria ẹmhọn Osẹnobulua bi Baibo. Mẹn ka rẹ deba Esali Jehova ha luẹ iBaibo khẹ. Arẹmiẹn mẹn lẹn ghe eria esili ele khin, mẹn bha muegbe nin mẹn rẹ fi uwedẹ nin mẹn rẹ nyẹnlẹn denọ ẹghenin. Ejayenan nian, uwedẹ ọbhebhe mẹn ki rẹ ha ghe emhin.

Mẹn da mun iBaibo nọnsemhẹn dagbare ha tie. Ẹmhọn nin mẹn ha tie bhọ da wo ko mẹn udu re. Mẹn da tie eje bunbun nọn yọle nin ẹbho ha re obọ esili mun elanmhẹn. Bhi ọsi ijiẹmhin, Proverbs 12:10 da yọle ghe “ọria nọn khiale gbẹloghe emhin-uri nesọle.” Mẹn da yẹ dọ lẹn ghe ọ iyi Osẹnobulua si ọnọghọ nọn ribhi ọne agbọn nan. Ranmhude ẹbho ne bunbun bha re obọ rẹkhan iho nọnsi Osẹnobulua, ọle zẹle nin emhin da ha khọ ọbhọ. Ẹghe nin mẹn ki rẹ luẹ ẹmhọn oyẹẹ bi iziẹngbe nin Jehova mhọnlẹn, ọ da wo manman rẹso mẹn.​—Psalm 103:​8-​14.

Bhi egbe ọne ẹghe nan, mẹn da je nan re ebe natiọle What Does the Bible Really Teach? ji mẹn. Ọ bha bue gbe, okhuo bi ọdọ ọkpa, ne yi Esali Jehova da sẹbhi isẹmhẹn. Ele da yọle ele da ha vae dọ ha man mẹn iBaibo. Mẹn da ka. Mẹn da yẹ munhẹn ha yo ikolo oga ọsi Esali Jehova bhi Kindọn Họọ nọnsele. Ranmhude ọnan, emhin nin mẹn luẹ bhi Baibo da wo ha rẹso mẹn bhi ọkhọle.

Emhin nin mẹn ha luẹ bhi Baibo, ele rẹkpa mẹn nin mẹn da sabọ fi emhin ne bunbun denọ bhi iẹnlẹn nọnsẹmhẹn. Mẹn bha yẹ ha sin isiga la da anyọn gbe. Mẹn da dọ ha muegbe nọnsẹn, yẹ ha rẹban ọta ne bha gba. Mẹn da yẹ dọ ha mun ekpẹn nin ene gbẹloghe. (Romans 13:1) Mẹn da yẹ re obọ sibhi ilọnmhọn oghẹ re. Mẹn ka rẹ wo khian ree bhi ilọnmhọn oghẹ.

Emhin nọn nọghọ mẹn nẹ da ha yi, nin mẹn rẹ sibhi ene otu kẹkẹ nin mẹn deba re. Mẹn bha sabọ wo re osukpa sibhi ene otu nan re, ranmhude, mẹn da ha riale ghe mẹn ha lu iriọ, ele dẹ ha ghe mẹn bii ọria ọbe. Ọrẹyiriọ, mẹn da sibhi ene otu re, ranmhude mẹn dọ lẹn ghe Agbejele nọnsi Osẹnobulua ọkpa ha sabọ re ọkpẹnlẹn ọbhi emhin ebe rebhe ne sunu bhi ọne agbọn nan. Bhiriọ, mẹn da muegbe nin mẹn rẹ re khu ọbhi ọne Agbejele nin, yẹ rẹkpa ẹbho rẹ luẹ ẹmhọn ọne Agbejele.​—Matthew 6:​33.

Ẹghe nin mẹn rẹ deba otu ne yọle ghe ọmhẹn ọsi eria bi elanmhẹn ele khu ọi, ẹlo nọn imhẹn mẹn rẹ wo ha ghe ẹbho ne bha re obọ ba emhanmhan nesẹmhan. Mẹn da wo ha ghe ele bii eghian. Ejayenan nian, ranmhude ebi mẹn luẹle bhi Baibo, mẹn iyẹ re ẹlo nọn sẹ iriọ ghe ọria soso. Mẹn ki wo dọnmhẹgbe nin mẹn rẹ hoẹmhọn ẹbho rebhe. (Matthew 5:​44) Uwedẹ ọkpa nin mẹn rẹ re ọne oyẹẹ nan man, ọle hi ẹmhọn Osẹnobulua nin mẹn taman ele. Ọ wo ti mẹn bhọ rẹ daghe ebi iwẹnna itẹmhọn Osẹnobulua rẹ rẹkpa ẹbho rẹ ha mhọn ọfure bi eghọnghọn yẹ. Ọne iwẹnna sẹyẹ re iruduba ọsaje nin ele rẹji ẹghe odalo.

Egbe ki wo fu mẹn re nin mẹn rẹ zẹ ẹmhọn ọne agbọn nan obọ nin Jehova. Mẹn rẹọbhọ ghe ọle ida ze ọne agbọn nan obọ nin ẹbho riia ọle a. Ọle ida zẹ eria obọ ne ha re oya nin elanmhẹn bi ibo ele, ranmhude, ọle hi Aman nọn man ene emhin nan rebhe. Ọle dẹ kẹ re Agbejele nọnsọle rẹ hẹnhẹn emhin rebhe ọi. (Isaiah 11:​1-9) Ọ wo manman rẹ mẹn ghọnghọn nin mẹn rẹ rẹkpa ẹbho rẹ lẹn ẹmhọanta nọn ribhi Baibo yẹ mhọn urẹọbhọ da Osẹnobulua. Mẹn ki dọ lẹn ghe mẹn ida sabọ fi ọne agbọn nan denọ.