Agbaẹbho nọn bha manman taan ẹlo a bhi otọ iRome a da biẹ mẹn. Ẹbho ne ribhi enan wo wẹnna kaka, beji ele ha da miẹn ebi ele ha rẹ gbẹloghe egbe. Iẹnlẹn bha lẹkhẹ bhi enan hiehie. Mẹn bha manman lẹn inẹn mẹn, sẹyẹ, mẹn bha manman sike aba mẹn. Egbe obhokhan mẹn rẹ munhẹn ha na ughele khian.

Ẹghe nin mẹn rẹ ha ribhi ikpe igbe, ọle mẹn rẹ munhẹn ha ra. Mẹn ki ribhi ikpe 12, mẹn da nẹ sibhi uwa re. Ọ sẹbhi igba ne bunbun nin unakpa mun mẹn khue. Aba mẹn dọ ha re mẹn sibhi ighan re. Mẹn wo ne ẹbho van ẹghe rebhe. Iriọ mẹn yẹ rẹ khọnlẹn. Emhin rebhe da wo ha re ẹkẹ khọ mẹn. Mẹn ki ribhi ikpe 14, mẹn da wo sibhi uwa re sẹsẹsẹ. Mẹn da ha noo ikhunmhun ne imhẹn, yẹ ha nyẹnlẹn bhi ughe. Ranmhude mẹn imhọn eji mẹn da nowẹ, ọsasọn ha re, mẹn ki zẹ ọdẹ imotọ ọsi ọria a dọ nowẹ bhi ẹkẹ ọle. Ẹdẹ ha ki ha we, mẹn ki fẹkẹ sibhi ọne imotọ re dọ guanọ eji mẹn ha da kpe ẹlo a.

Mẹn da wo dọ manman guẹ ebi a rẹ ra yẹ. Mẹn da ha do ẹkpa ọsi ẹbho mun, yẹ gbe ẹbho odẹ a ra ele ọsasọn. Ẹbho da dọ lẹn unan ọria nin mẹn khin. Ọ bha bue gbe, mẹn da dọ deba otu oyi ne ra bhi banki. Ele da wo ha mun ekpẹn nin mẹn ranmhude ẹkẹ nọn manman khọ mẹn. Ẹghe rebhe mẹn rẹ re osisi rẹkhan egbe; aharẹmiẹn mẹn nowẹ, mẹn ki re ọle ọbhi otọ emhin nin mẹn rẹ ke uhọnmhọn. Mẹn da wo ha khọnlẹn, ra, noo ikhunmhun ne imhẹn, ta ọta ne bha gba, yẹ wo ha gbe oghẹ. Ene emhin ebe nan rebhe da wo dọ kiẹn uwedẹ iẹnlẹn nọnsẹmhẹn. Unakpa da ha guanọ mẹn bhi otọ guanọ mẹn bhi okhun. Igba ne bunbun mẹn yo ighan.

Ẹghe ọkpa, mẹn ki sibhi ighan re, mẹn da dọ fẹ obhio inẹn mẹn nin okhuo ghe. Mẹn ki sẹbhi enin, mẹn da kere ghe, ọle bi imọn eva nesọle kiẹn Esali Jehova. Mẹn bha rẹ ka lẹn khẹ. Ele da yọle nin mẹn rẹkhan ele yo ikolo oga. Ranmhude mẹn guanọ nin mẹn dọ fẹ ebi a lu bhi enin, mẹn da rẹkhan ele ha khian. Ẹghe nin mhan ki rẹ sẹbhi Kindọn Họọ, mẹn da dotua bhi egbe odẹ, beji mẹn ha da ha daghe ẹbho ne ha na bhọ yẹ dagbare. Beji mẹn ka lu khẹ, mẹn da re osisi mhọnlẹn.

Ọne ikolo oga nin mẹn yo nin, ọle fi iẹnlẹn nọnsẹmhẹn denọ. Mẹn bhọ da ha riale si ọne agbọn nan mẹn yẹ ye. Eria ne ribhi enin da wo tuẹ imẹn mun gbe nọnsẹn. Ele rebhe da wo ghọnghọn mun mẹn. Mẹn sẹ yẹ yere ebi ẹbho nin mẹn miẹn bhi enin rẹ ha ghọnghọn yẹ, bi uwedẹ nin ele rẹ re ẹkẹ-ẹjẹjẹ tuẹ imẹn mun egbe. Ọnan wo manman dikẹ bhi unan iẹnlẹn nin mẹn rẹ ha nyẹnlẹn.

Mẹn da deba Esali Jehova ha luẹ iBaibo. Baibo nin mẹn ha luẹ, da wo rẹkpa mẹn rẹ lẹn ghe ọkhẹke nin mẹn fi iẹnlẹn nọnsẹmhẹn denọ sẹsẹsẹ. Mẹn da wo lu rẹkhan ẹmhọn nọn ribhi Proverbs 13:20 nọn yọle: “Ọnọn rẹkhan ọnọn mhọn ẹwanlẹn khian ki yẹ ha mhọn ẹwanlẹn, Ọkpakinọn, ọnọn rẹkhan uhuki khian ki miẹn ikuan-egbe.” Mẹn da lẹn sẹbhọ ghe ọkhẹke nin mẹn sibhi otu oyi nin mẹn rẹ deba re. Arẹmiẹn ọ bha lẹkhẹ nin mẹn, Jehova da rẹkpa mẹn rẹ sabọ sibhọrẹ.

Mẹn da dọnmhegbe kpe egbe mẹn khia. Mẹn bha yẹ ha sin isiga, la noo ikhunmhun ne imhẹn. Mẹn da dọ hia eto kua, sẹyẹ, mẹn bha yẹ ha ne ebanebhehọ ọbhi ehọ, la ta ọta ne bha gba bhi unun. Bhi ọne ẹghe nan, mẹn da sabọ ha mun egbe ọbhi ibẹẹ.

Ọ imanman yẹẹ mẹn rẹ ha tie ebe. Bhiriọ, ọ da re ọle ha nọghọ mẹn rẹ mun egbe ọbhi Baibo nan tie. Sokpan, beji mẹn ki rẹ ha dọnmhegbe khere-khere, mẹn da dọ hoẹmhọn Osẹnobulua. Bhi ọne ẹghe nan nian, ọkhọle da munhẹn ha gbe mẹn asan. Mẹn da ha ghe egbe mẹn bii ọria nọn bha sẹ emhin soso. Mẹn da ha riale si Osẹnobulua dẹ rẹhunmhan mẹn bhi emhin ebe rebhe nin mẹn sẹ lu. Ọkpakinọn, mẹn da miẹn ikoudure bhi ẹkẹ iBaibo. Mẹn da luẹ kere ghe, arẹmiẹn David nin Ojie manman lu emhin ebe ne kakale, Jehova da yẹ rẹhunmhan ọlẹn.​—2 Samuel 11:​1–12:​13.

Ọnọghọ ọbhebhe nin mẹn miẹn hi, ọ bha lẹkhẹ nin mẹn rẹ ha tẹmhọn Osẹnobulua rẹ na bhi uwa rẹ sẹbhi uwa. (Matthew 28:​19, 20) Ofẹn da ha mun mẹn ghe, mẹn dẹ miẹn eria nin mẹn lu ele emhin ebe khẹ! Sokpan, khere-khere, ofẹn bha yẹ ha mun mẹn. Ọ da wo ha ti mẹn bhọ rẹ ha rẹkpa ẹbho rẹ lẹn ẹmhọn Osẹnobulua nin Jehova, Osẹ nin ọfuẹkẹnẹdẹ .

Ẹmhọn iJehova nin mẹn dọ luẹ, ọle hinmhin mẹn! Ene bunbun bhi ẹwẹ eria nin mẹn rẹ ha ne muobọ khẹ yunọ, esọ bhọ sẹyẹ ribhi ighan. Ọkpakinọn, iẹnlẹn nọnsẹmhẹn ki wo dọ kiọnlẹn. Mẹn ki mhọn ikhuaẹloghe rẹji ẹghe odalo. Mẹn ki kiẹn ọria nọn mhọn idegbere, nọn yẹ mun egbe ọbhi ibẹẹ. Ranmhude ọnan, mẹn ki sabọ deba ẹbho ne nẹga mẹn nyẹnlẹn bhi ọfure. Imẹn bi Carmen nin okhuo mẹn nọn mhọn-ose, ko sọnyẹnmhẹn bhi iẹnlẹn. Mhan veva ko rẹkpa ẹbho rẹ lẹn ẹmhọn Osẹnobulua. Ọne iwẹnna nan wo re eghọnghọn ji mhan.

Bhi ejayenan nian, iwẹnna esili mẹn ki lu. Mẹn iyẹ ra. Arẹmiẹn ọne iwẹnna rẹ mẹn sẹbhi banki ẹgheso, mẹn iyẹ yo enin nin mẹn dọ ra, iwẹnna nan rẹ kpe otọ mẹn dọ ha lu bhi enin!