Ji a yọle aba ne ọmọn nọnsọle nọn yi ikpe ihinlọn talọ. Ọle da taman ọlẹn yọle, “Ikpe ne bunbun ne gbera, Osẹnobulua da man otọ bi emhin rebhe ne ribhọ. Ọle da man ovuẹn, uki, bi ene ahiẹnhiẹn.” Ọne ọmọn da ria ọne ẹmhọn, bhiriọ, ọle da nọọn yọle, “Aba, họbhọ man Osẹnobulua?”

Aba ọle da taman ọlẹn yọle, “ọria soso bha man Osẹnobulua. Ọle imhọn umunhẹn, ọle mọn wo ha ribhọ.” Bhi ejayenan, ọne ewanniẹn nan sẹ wo khọn ọne ọmọn. Ọkpakinọn, ọle ha ki ha wanre, ọne inọnta nan ki gbo zegbere bhi ọkhọle nọnsọle. Ọ bha mun ọle ẹlo kore ebi a ha rẹ miẹn yẹ ghe, Osẹnobulua imhọn umunhẹn. Ọne agbọn nan bhọ mhọn umunhẹn. Bhiriọ, ọle ki ha riale, ‘be Osẹnobulua rẹ zegbere yẹ?’

Be bhọ hi ewanniẹn nin Baibo re ọbhi ọne inọnta nan? Ewanniẹn nin ọne aba nin re nin ọmọn nọnsọle, ọle iBaibo yẹ re ọbhi ọne inọnta nan. Moses da gbẹn yọle: “Eo Jehova, . . . ọkuẹsẹ ene oke zegbere, la uwẹ man ọne agbọn nan bi otọ nọn biẹ ebale, rẹ nabhi ẹdẹdẹmhẹnde rẹ sẹbhi ẹdẹdẹmhẹndẹ, uwẹ hi Osẹnobulua.” (Psalm 90:​1, 2) Iriọ sẹyẹ, Isaiah nin akhasẹ da gbẹn yọle: “Uwẹ bha be lẹn? Uwẹ bha be họn? Jehova, nin aman nọn man ọne otọ nan sẹbhi eji ọ na rebhe, Osẹnobulua ọsi itẹbitẹ nọn”! (Isaiah 40:28) Sẹyẹ, iJude nin odibo da tale ghe, rẹ nabhi ẹdẹdẹmhẹndẹ, ọle Osẹnobulua mọn da ribhọ.​—Jude 25

Ene Baibo nan da rẹman ghe, Osẹnobulua hi “Ojie ọsi ẹdẹdẹmhẹndẹ,” beji Paul nin odibo tale. (1 Timothy 1:​17) Ọnan rẹman ghe ọkuẹsẹ emhin ọbhebhe vae bhi agbọn, ọle nyẹnlẹn fo. Ọle dẹ yẹ ha ribhọ rẹ sẹbhi ighegheghe. (Revelation 1:8) Ọnan bhọ deba emhin nọn zẹle nin ọle da yi Osẹnobulua nọn ke okhun nẹ.

Bezẹle nọn da nọghọ mhan rẹ lẹn otọ ọne ẹmhọn nan? Eka ikpe nin mhan gbe bhi agbọn bha sẹ emhin soso. Ranmhude ọnan, ọ iyi ẹlo nin mhan rẹ ghe ẹghe Osẹnobulua rẹ ghe ọle. Ranmhude rẹ nabhi ẹdẹdẹmhẹdẹ rẹ sẹbhi ẹdẹdẹmhẹndẹ ọle Osẹnobulua rẹ nyẹnlẹn, inian ikpe uli bhi ẹlo nọnsẹmhan diabe ukpẹdẹ ọkpa bhi ẹlo nọnsọle. (2 Peter 3:8) Bhi ọsi ijiẹmhin, akaka (nin ẹbho eso yẹ tie ọle ugbafẹn la tete) nan miẹn ghe ikpẹdẹ 50, ọle ọkpa ọ sabọ gbe bhi ọne agbọn nan, ida sabọ lẹn otọ ikpe 70 la 80 nin mhan gbe bhi ọne agbọn nan. Iriọ yẹ nọn, Baibo da yọle ghe, inian mhan diabe akaka bhi eji Osẹnobulua ye. Iria-eria nọnsi Osẹnobulua, ọle khua okhun gbera iria-eria nọnsẹmhan. (Isaiah 40:22; 55:​8, 9) Bhiriọ, ọ bha han mhan ilo ghe emhin eso ribhọ rẹji Osẹnobulua nin mhan ida sabọ lẹn otọle.

Arẹmiẹn ọ bha mun mhan ẹlo kore ebi Osẹnobulua rẹ ribhọ yẹ rẹ na bhi ighegheghe rẹ sẹbhi ighegheghe, mhan lẹnmhin ghe ẹmhọanta ribhi ọne iman-emhin nan. Ahamiẹn ọria ribhọ nọn man Osẹnobulua, ọne ọria nin ki ha yi aman nọn man emhin rebhe. Ọkpakinọn, Baibo ji mhan lẹn ghe, Jehova, ọle hi Aman nọn man emhin rebhe. (Revelation 4:​11) Rẹ deba ọnin, mhan lẹnmhin ghe, ẹghe ribhọ nin ọne agbọn nan bha rẹ ha ribhọ. Bhiriọ, ọkuẹsẹ ọ munhẹn ha ribhọ, ọnọn man ọlẹn ki ka ha nyẹnlẹn fo. (Genesis 1:​1, 2) Jehova ha nyẹnlẹn fo, ọle kuẹ man ọmọn nọnsọle nin Jesu bi ene ẹhi nekẹle. (Job 38:​4, 7; Colossians 1:15) Ọle ọkpa ka ha nyẹnlẹn. Ọria soso bha man ọlẹn, ranmhude emhin soso iribhọ nọn ka ọle ha nyẹnlẹn.

Ọne agbọn nan nin Osẹnobulua manlẹn bi mhan nin eria nin ọle man ọbhọ rẹman ghe, ọle hi Osẹnobulua ọsi itẹbitẹ. Ọle nyẹnlẹn fo ọle kuẹ man otọ bi okhun, yẹ gbe ene uhi ne dia emhin nin ọle manlẹn. Ọle hi ọnọn re iẹnlẹn nin emhin rebhe ne nyẹnlẹn.​—Job 33:4.