Rẹ na bhi ẹghe nan rẹ biẹ mẹn rẹ sẹbhi ẹghe nin mẹn rẹ ha yi ikpe ehan, egbegbe agbaẹbho natiọle Leipzig, East Germany, ọle azagba-uwa nọnsẹmhẹn da ha nyẹnlẹn. Ọne agbaẹbho bha ree gbe bhi eji otọ ọsi agbaẹbho ọsi Czech bi Poland sẹ. Ẹghe nin mẹn ki rẹ ha ribhi ikpe ehan, iwẹnna ọsi aba mẹn da rẹ mhan kpanọ ha khian iBrazil. Akizẹbue, mhan da ha khian Ecuador.

Mẹn ki ribhi ikpe 14, mẹn da kpanọ ha khian isiku bhi Germany. Ranmhude ene biẹ mẹn ribhi South America, imẹn tobọmẹn ha gbẹloghe egbe mẹn. Mẹn da wo ha lu ebe ghọn mẹn. Mẹn bha ha ria ẹmhọn ebi emhin nin mẹn lu rẹ rẹso eria ebhebhe yẹ.

Mẹn ki ribhi ikpe 17, ene biẹ mẹn da fikie vae bhi Germany. Mẹn da dọ deba ele ha nyẹnlẹn. Ọkpakinọn, ranmhude uwedẹ iẹnlẹn nin mẹn ki guẹ, mẹn bha yẹ ha hẹnmhọn nin ele. Ẹghe nin mẹn ki rẹ ha yi ikpe 18, mẹn da sibhi uwa re.

Emhin ne bunbun da wo ha kpokpo mẹn bhi ọkhọle. Mẹn da ha ria ẹmhọn ebi mẹn dọ lu bhi agbọn. Mẹn ki fẹ usun kẹkẹ ghe bi uwedẹ nin ele rẹ nyẹnlẹn, mẹn da rẹọbhọ ghe emhin nọn mhẹn nẹ nin mẹn ha lu hi, nin mẹn rẹ ha nẹga ọne agbọn nan khian dọ ha fẹ eje kẹkẹ ne mhọn-ose ghe, ọkuẹsẹ ọne otọ nan riia fo.

Mẹn da sibhi Germany re. Mẹn da dẹ imotosaiko. Mẹn da nabhi uwedẹ ha khian Africa. Ọ bha bue gbe, mẹn da fikie ha khian Europe nin mẹn dọ hẹnhẹn imotosaiko nọnsẹmhẹn. Ẹdẹ ọkpa, mẹn da ha ribhi egbegbe okpẹdẹ bhi Portugal. Bhi enin, mẹn da mhanmhanlẹn nin mẹn rẹ guanọ okọ nin mẹn ha rẹ yo okhian nin mẹn khian.

Mẹn da deba usun ọsi elasẹre eso ne guanọ nin ele re okọ fan okpẹdẹ natiọle Atlantic Ocean ra. Bhi ẹwẹ ele mẹn da miẹn Laurie nin mẹn re bhi amhẹn. Mẹn bi Laurie da ka re okọ ha khian otọ iCaribbean. Mhan ki gbe ẹghe eso bhi Puerto Rico, mhan da fikie ha khian Europe. Mhan da ha guanọ okọ nin mhan ha dẹ. Mhan da ha mhọn ọlẹn bhi ọkhọle ghe mhan ha de ọne okọ, mhan ki ne emhin rebhe ne khẹke ọbhọ, beji mhan ha da sabọ re ọle kiẹn uwa nọnsẹmhan. A ki tie ọle uki ea nin mhan munhẹn ha guanọ okọ nin mhan ha dẹ, a da tie mẹn nin mẹn dọ deba eyokhọn bhi Germany. Ọ iyi ẹmhọn okọ mhan yẹ ha ria ẹmhọn ọlẹn.

Uki 15 mẹn lu iwẹnna oyokhọn na. Bhi ọne ẹghe nin, mẹn bi Laurie da bọ egbe. Mhan da sẹyẹ ha mhanmhan ebi mhan ha rẹ ha yo okhian yẹ. Ọkuẹsẹ mẹn dọ deba eyokhọn, ọ da kẹ mhan rẹ dẹ ọbhi okọ khere. Ẹghe nin mẹn ki rẹ ha lu iwẹnna oyokhọn, mhan da fẹkẹ ha bọn ba ọne okọ beji mhan ha da sabọ re ọle ha yo okhian. Mhan da ha mhọn ọlẹn bhi ọkhọle ghe, mhan ha bọn ọlẹn fo, mhan ki fẹkẹ ha nyẹnlẹn bhọ, yẹ re ọle ha nẹga ọne agbọn nan khian. Bhi ọne ẹghe nan mhan rẹ munhẹn ha deba Esali Jehova luẹ iBaibo. Mhan bha sẹ bọn ọne okọ fo bhi ọne ẹghe nan, ọkpakinọn, mẹn zobọ bhi iwẹnna oyokhọn fo.

Bhi ọsi ọhẹnhẹn, mẹn da ha riale ghe emhin soso iribhọ nin mẹn ha fidenọ bhi iẹnlẹn nọnsẹmhẹn. Okhuo nin mẹn rele mẹn deba ha nyẹnlẹn. Sẹyẹ, mẹn iye sin siga. (Ephesians 5:5) Mẹn bha ghe emhanmhan nin mhan mhọn nin mhan rẹ nẹga ọne agbọn nan bii emhin nọn khẹke nin mẹn fidenọ, ranmhude mẹn da ha riale ghe emhin esili nọn nin mhan rẹ nẹga ọne agbọn nan dọ ha ghe emhin ne mhọn-ose kẹkẹ nin Osẹnobulua manlẹn.

Ọkpakinọn, mẹn da kere ghe ọ sẹyẹ khẹke nin mẹn fi emhin eso denọ bhi iẹnlẹn nọnsẹmhẹn, manman nọn, bhi uwedẹ nin mẹn rẹ lu emhin. Ranmhude ọria nọn manman tẹngbemun mẹn ha khin, ẹmhọn egbe mẹn ọkpa wo rẹtẹ mẹn.

Ẹdẹ ọkpa, mẹn da ha tie ọta ogbakha nin Jesu ta bhi uke oke. (Matthew, uhọnmhọnlẹn 5-7) Bhi ọsi ọhẹnhẹn nin mẹn ka tie ọle, ẹmhọn nin Jesu tale bha mun mẹn ẹlo kore. Bhi ọsi ijiẹmhin, Jesu da yọle ghe ọria nọn ohanmhẹn gbe dẹ ha ghọnghọn. (Matthew 5:6) Ọ da han mẹn ilo ebi ọria nin ohanmhẹn gbe ha rẹ ha ghọnghọn yẹ. Beji mẹn ki rẹ ha luẹ iBaibo, mẹn da dọ luẹ kere ghe imhan rebhe guanọ adia bhi obọ nọnsi Osẹnobulua. Ọkpakinọn, ọkhẹke nin mhan degbere ha khu ọbhọ nin mhan rẹ miẹn ọne adia. Beji Jesu tale: “Eghọnghọn hi ọsi ẹbho ne lẹn ghe ọkhẹke nin ele khu ọbhi emhin oriọn.”​—Matthew 5:3.

Germany, ọle mẹn bi Laurie da munhẹn ha luẹ iBaibo. Akizẹbue, mhan da kpanọ ha khian France. Aki gbo zẹbue, mhan da ha khian Italy. Bhi eje rebhe nin mhan yo, mhan da ha miẹn Esali Jehova. Okugbe nin ele mhọn bhi ẹwẹ ele bi oyẹẹ nin ele mhọn da egbe da wo ha ti mẹn bhọ. Mẹn da daghe ọle ghe Esali Jehova bhi otọ agbọn rebhe mhọn kugbe. (John 13:​34, 35) Akizẹbue, mẹn bi Laurie da mianmẹn.

Mhan ki mianmẹn fo, mẹn da sẹyẹ ha dọnmhegbe nin mẹn rẹ fi uwedẹ nin mẹn rẹ lu emhin denọ. Ẹghe ọkpa, mẹn bi Laurie da mhanmhanlẹn nin mhan rẹ gua okọ na bhi obọ ọsi African, fan Atlantic Ocean ra, yẹ ha khian United States. Ẹghe nin mhan rẹ ha ribhi adesẹ okpẹdẹ, ẹghenin mẹn rẹ lẹn ebi mhan rẹ dia khere yẹ bhi eji Jehova yẹ. Ranmhude mhan bha miẹn ebi mhan re ẹghe ha lu, mẹn da wo manman ha luẹ iBaibo. Okha ọsi emhin nin Jesu lu ẹghe nọn rẹ ha ribhi ọne otọ nan da wo manman rẹso mẹn. Arẹmiẹn ghe ọria nọn gbale nọn sabọ lu emhin ne bunbun Jesu ha khin, ọle bha ha hianbhegbe. Ọle da wo re iẹnlẹn nọnsọle rẹ ha khu ọbhi iho nọnsi Aba ọle, ọ iyi ọsi egbe ọle.

Beji mẹn rẹ ha ria eria nyan ijiẹmhin esili nọnsi Jesu, mẹn da kere ghe ọkhẹke nin mẹn mun ẹmhọn Agbejele nọnsi Osẹnobulua kalo bhi iẹnlẹn nọnsẹmhẹn. Ọkhẹke nin mẹn mun ọlẹn kalo gbera emhin nekẹle nin mẹn ho nin mẹn lu nin egbe mẹn. (Matthew 6:​33) Ẹghe nin mẹn bi Laurie ki rẹ sẹbhi United States, mhan da debhi enin an. Mhan bha yẹ ha khian yo khian re. Mhan de denọ ẹlo ọbhi oga nọnsi Jehova.

Ẹghe nin mẹn rẹ ha lu ebe ghọn mẹn, ẹghe rebhe mẹn rẹ ha mhọn edandan si emhin nin mẹn lu dẹ de ọbhọ. Sokpan, ejayenan nian, Jehova ki dia mẹn. Ẹwanlẹn nọn na obọ ọle vae ihiẹ ọria. (Isaiah 48:​17, 18) Mẹn yẹ dọ luẹ ebe gene re ẹghọnghọn nin ọria bhi iẹnlẹn​—nan rẹ ha ga iJehova yẹ ha taman ẹbho ẹmhọn ọlẹn.

Ranmhude mhan re obọ rẹkhan adia ne ribhi Baibo, iẹnlẹn ibọdọ bi ireokho ọsi mẹn bi Laurie wo ha mhẹn ọbhọ. Jehova da yẹ re ọmọn okhuo nin mhan. Ọmọn nọnsẹmhẹn wo dọ lẹn iJehova yẹ hoẹmhọn ọlẹn.

Iẹnlẹn nọnsẹmhan bha gba fo. Mhan yẹ mhọn ọnọghọ ẹgheso. Ọrẹyiriọ, bhi ahu nọnsi Jehova, mhan dẹ sẹyẹ wo ha ga Jehova, yẹ ha mun udu nyan ọlẹn.​—Proverbs 3:​5, 6.