Beji mhan luẹ bhi uhọnmhọn-ọta nọn gbera, iwẹnna nan rẹ wewe ẹmhọn Agbejele, ọle iJesu wo manman re iẹnlẹn nọnsọle rẹ lu. (Luke 8:1) Ọle da wo dọnmhegbe rẹ ha yo eje kẹkẹ bhi otọ Izrẹl nin ọle dọ man ẹbho ẹmhọn Agbejele nọnsi Osẹnobulua. Ebe nọnsi Matthew, Mark, Luke, bi John, ele tẹmhọn iwẹnna itẹmhọn Osẹnobulua nin Jesu lu. Ọ gbera igba 100 nan tẹmhọn Agbejele nọnsi Osẹnobulua bhi ene ebe iBaibo nan. Bhi ọta nin Jesu tale, ọle a da miẹn ene bunbun bhi ene igba 100. Ọkpakinọn, mhan lẹnmhin ghe ukpọkhere bhi emhin nin Jesu tale rẹji Agbejele nọnsi Osẹnobulua ọnan khin.​​—John 21:25.

Bezẹle nin ẹmhọn Agbejele da manman lu uhọnmhọn-emhin ji Jesu? Jesu lẹnmhin ghe ọle Osẹnobulua zẹle nọn ha yi Ojie ọsi ọne Agbejele. (Isaiah 9:6; Luke 22:​28-​30) Ọkpakinọn ọ iyi ahu bi uyi nin ọle ha miẹn bhi ọne ihe nin rẹ ẹmhọn Agbejele manman ha ti ọle bhọ. (Matthew 11:29; Mark 10:​17, 18) Jesu manman hoẹmhọn Aba ọle. Ọle yẹ wo hoẹmhọn ene rẹkhan ọlẹn. Ranmhude ebi ọne Agbejele ha lu nin Aba ọle bi ene rẹkhan ọlẹn, ọle zẹle nin ẹmhọn Agbejele da wo manman ha ti Jesu bhọ. *

Jesu wo manman hoẹmhọn Aba ọle. (Proverbs 8:​30; John 14:31) Ọle lẹnmhin ghe Aba ọle mhọn ikpẹ esili bọsi oyẹẹ, ẹkẹ-ẹjẹjẹ bi ibhohiẹn nọn gbale. (Deuteronomy 32:4; Isaiah 49:15; 1 John 4:8) Bhiriọ, ọ dẹ wo ha ba ọle bhi egbe rẹ daghe uwedẹ nin ẹbho rẹ ha re ohoghe riia Aba ọle elin an. Bhi ọsi ijiẹmhin, ọ dẹ ba ọle bhi egbe sade ọle họn ẹbho tale ghe ẹmhọn mhan bha rẹtẹ Osẹnobulua, ghe Osẹnobulua guanọ nin mhan ha loya. Ọnan hi emhin ọkpa nọn zẹle nin Jesu da wo re ọhubhudu ha tẹmhọn Agbejele nọnsi Osẹnobulua. Ọle lẹnmhin ghe ọne Agbejele dẹ kpe elin nọnsi Aba ọle khia. (Matthew 4:​23; 6:​9, 10) Be ọne Agbejele ha rẹ lu ọnan yẹ?

Ọne Agbejele iJehova ha rẹ hẹnhẹn ọne agbọn nan. “Ọle dẹ gbo amẹn eviẹ rebhe” si mhan bhi ẹlo re. Ọle ki re ọkpẹnlẹn ọbhi emhin rebhe ne rẹ mhan viẹ. “Uu ida yẹ ha ribhọ, la akhiẹ, la ukpuru eviẹ, la ọbalọ.” (Revelation 21:​3, 4) Jehova ki re Agbejele nọnsọle rẹ re ọkpẹnlẹn ọbhi iloya rebhe. *

Bhiriọ, ọ bha han mhan ilo ebezẹle nọn da wo ha ti Jesu bhọ rẹ tẹmhọn ọne Agbejele. Ọle lẹnmhin ghe ọne Agbejele dẹ rẹman ghe Jehova manman mhọn ahu. Ọ dẹ yẹ rẹman ghe ọle manman mhọn oyẹẹ. (James 5:​11) Jesu yẹ wo hoẹmhọn eria. Ọle yẹ lẹn ghe eria ne ga Osẹnobulua nọnsẹn dẹ miẹn elele bhi ọne Agbejele.

Bhi ikpe ne bunbun ọkuẹsẹ Jesu vae bhi ọne otọ nan, okhun ọle ka ha ye. Beji Jehova man ọlẹn fo, Jehova da noo ọle rẹ man emhin nekẹle rebhe. Ọle rẹkpa Jehova rẹ man ene ahiẹnhiẹn ne ribhi okhun, ọne otọ nan, bi elanmhẹn ne ribhi ẹwẹ. (Colossians 1:​15, 16) Bhi ẹwẹ emhin rebhe nin Jesu rẹkpa Osẹnobulua man, ẹmhọn eria manman ti ọle bhọ nẹ.​​—Proverbs 8:​31.

Uwedẹ nin Jesu rẹ ha lu iwẹnna itẹmhọn Osẹnobulua da yẹ wo rẹman ghe ọle manman hoẹmhọn eria. Rẹ na bhi ẹghe nin ọle rẹ munhẹn ha lu ọne iwẹnna, ọle da tale ghe ene ibhioguele ọle dọ “wewe ọta nọn mhẹn man.” (Luke 4:​18) Ọkpakinọn iJesu bha gheghe ha tale ghe ẹmhọn ẹbho rẹtẹ ọle. Ọle da yẹ re ọne oyẹẹ man. Bhi ọsi ijiẹmhin, ẹghe nin usun ẹbho rẹ bu ọle re dọ ka ọle ehọ, Jesu da mhọn ẹkẹ-ẹjẹjẹ da ele yẹ hinmhin ene ha khọnmhọn bhi ẹwẹ ele. (Matthew 14:14) Sẹyẹ, ẹghe nin okpea ọkpa nọn ha khọnmhọn emianmhẹn egbekẹn rẹ bhii Jesu nọn hinmhin ọlẹn, Jesu da mhọn ẹkẹ-ẹjẹjẹ da ọle yẹ taman ọlẹn ghe ọle muegbe nin ọle rẹ hinmhin ọlẹn. (Luke 5:​12, 13) Ẹghe nin Jesu rẹ daghe ọmọẹ ọle nin Mary viẹ ranmhude obhio ọle nin Lazarus nọn yu, ọ da wo manman ba ọle bhi egbe rẹ sẹbhọ ghe ọle “da gbe eviẹ a.” (John 11:​32-​36) Jesu da yẹ lu emhin ọhan-ilo. Ọle da riọ Lazarus kpanọ bhi uu arẹmiẹn ghe ọ ki sẹbhi ikpẹdẹ enẹn nin Lazarus yu.​​—John 11:​38-​44.

Jesu rẹ ha lu ene emhin ọhan-ilo nan, ọle lẹnmhin ghe eria nin ọle hinmhin dẹ kie sabọ ha khọnmhọn, la eria nin ọle riọkpanọ bhi uu dẹ kie sabọ yu. Ọrẹyiriọ, ọle lẹnmhin ghe Agbejele nọnsi Osẹnobulua, ọle ha sabọ rẹ ọkpẹnlẹn ọbhi ene emhin nan sẹsẹsẹ. Ọnan zẹle nan da miẹn ghe ọ iyi emhin ọhan-ilo ọkpa ọle ha lu, ọle da yẹ re ọhubhudu ha wewe ẹmhọn ọne Agbejele man ẹbho. (Matthew 9:​35) Emhin ọhan-ilo nin ọle lu da re ukpọkhere man bhi emhin esili nin ọle ha lu bhi Agbejele nọnsi Osẹnobulua. Fẹ ive nin Baibo vele rẹji ọne ẹghe nin.

• Emianmhẹn iyẹ da ha ribhọ.

  “Bhi ọne ẹghe nin, ẹlo ọsi ene ru ẹlo dẹ tuje a. Ene yi ehọ ki ha hẹnmhọn. Bhi ọne ẹghe nin, ene akhun ki ha san bii ẹruẹ. Ene odin ki sabọ ha so dagbare bhi eghọnghọn.” Rẹ deba ọnin, “a ida miẹn ọnọn nyẹnlẹn bhi enin nọn ha yọle: ‘Imẹn khọnmhọn.’ ”​—Isaiah 33:​24; 35:​5, 6.

• Uu ida yẹ ha ribhọ.

  “Ene khiale dẹ nyẹnlẹn bhi ọne otọ nan, ele dẹ nyẹnlẹn bhọ bhi ighegheghe.”​—Psalm 37:29.

  “Ọle dẹ gene su uu lọlọ bhi ighegheghe. Ebeanlẹn mhan nin Jehova dẹ gene gbo amẹn-eviẹ sibhi ẹlo ọsi ọrebhe re.”​—Isaiah 25:8.

• Ene yulu dẹ kie dọ ha nyẹnlẹn.

  ‘Ọrebhe ne ribhi idin ọsi ayere dẹ họn ukpuru nọnsọle yẹ dagbare.’​—John 5:​28, 29.

  “Ariọkpanọ bhi uu dẹ ha ribhọ.”​—Acts 24:15.

• Ọrebhe dẹ ha mhọn iwẹnna esili bi uwa nọnsele.

  “Ele dẹ bọn uwa yẹ nyẹn bhọ, ele dẹ kọ emhin yẹ le ọne ebale. Ele ida bọn uwa nin ọria ọbhebhe dọ ha nyẹnlẹn bhọ, ele ida kọ emhin nin ọria ọbhebhe dọ le ọne ebale. . . . Ẹbho nin mẹn zẹIe dẹ sọnyẹnmhẹn sẹbhi ọkhọnlẹn bhi wẹnna obọ nọnsele.”​​—Isaiah 65:​21, 22.

• Okhọnlẹn ida yẹ ha ribhọ.

  “Ọle dẹ re ọkpẹnlẹn ọbhi okhọnlẹn rẹ na bhi ọne otọ agbọn nan rebhe.”​​—Psalm 46:9.

  “Agbaẹbho ida yẹ kie re agbada okhun da agbaẹbho, la nin ele kie dọ yẹ ha luẹ okhọn.”​—Isaiah 2:4.

• Ebale ki kpọfiara a.

  “Emhin nan kọ bhi otọ dẹ mọn nọnsẹn; “Osẹnobulua, Osẹnobulua nọnsẹmhan dẹ nan erọnmhọn nin mhan.​​—Psalm 67:6.

  “Ebale dẹ manman vuọn ọne otọ nan; Ọ dẹ kpọfiara a bhi uke oke.”​​—Psalm 72:16.

• Imanmabo ida yẹ ha ribhọ.

  “A ida ye ene ibhioguele a.”​—Psalm 9:​18.

  “Ọle dẹ hinmhin ene bha miẹn rẹ lu ne viẹ bu ọle re. Ọle dẹ yẹ hinmhin ene ibhioguele bi ọria nọn ki rẹ khin nọn imhọn urẹkpa. Ọle dẹ mhọn itohan da ene ibhioguele bi ene bha miẹn rẹ lu, Ọle dẹ miẹn iẹnlẹn ọsi ene bha miẹn rẹ lu fan.”​—Psalm 72:​12, 13.

Beji uwẹ zilo nyan ene emhin nin ọne Agbejele ha lu, uwẹ bha be daghe ebezẹle nin ọne Agbejele da lu uhọnmhọn-emhin rẹji Jesu? Ẹghe nin Jesu rẹ ha ribhi otọ, ọ da wo manman ha hu ọle bhi udu rẹ ha tẹmhọn ọne Agbejele man ọrebhe, ranmhude ọle lẹnmhin ghe ọne Agbejele ha re ọkpẹnlẹn ọbhi iloya nọn ribhi agbọn.

Emhin kẹkẹ nin Baibo yọle ọne Agbejele dẹ lu be ti uwẹ bhọ? Ahamiẹn ọ ti uwẹ bhọ, be uwẹ ha lu nin uwẹ da sabọ manman luẹ ẹmhọn ọne Agbejele? Be uwẹ ha yẹ lu nin uwẹ da sabọ deba ẹbho ne ha miẹn elele bhi ọne Agbejele? Uhọnmhọn-ọta nọn ki sẹ ọle bhi egbe dẹ wanniẹn ene inọnta nin.