Ẹlẹnan nian, uwẹ dẹ sabọ miẹn iBaibo tie, ranmhude ọ sabọ tọ sẹbhi ẹghe nọnsẹmhan. Uwẹ ha zẹ Baibo nan zedu ọle nọnsẹn, uwẹ dẹ sabọ gbaẹkẹ ẹmhọn nọn ribhọ, ranmhude ẹmhọn nọn ribhi Baibo nin ọhẹnhẹn, ọle ribhi ẹkẹ ọle. a Bezẹle nin Baibo da sabọ tọ sẹbhi ẹghe nọnsẹmhan, arẹmiẹn ghe ebe ne itọ a gbẹn ọlẹn ọi, arẹmiẹn ghe ẹbho guanọ nin ele khue ọle lo, bi arẹmiẹn ghe ẹbho eso rẹ ha guanọ nin ele fi ẹmhọn nọn ribhọ denọ? Bezẹle nin Baibo da yi ebe kpataki?

Ẹbho ne bunbun ne dọ luẹ iBaibo dọ kere ghe ẹmhọanta, ọle Paul nin odibo tale ẹghe nọn rẹ gbẹn yọle: “Ẹmhọn rebhe ne ribhi ẹkẹ Ebenọnkhiale, ahu ẹlinmhin nọn khiale nọnsi Osẹnobulua a rẹ gbẹn ọlẹn.” (2 Timothy 3:16) Ele dọ rẹọbhọ ghe ranmhude Ọta nọnsi Osẹnobulua Baibo khin, ọle zẹle nin Osẹnobulua da gbega ọle sẹbhi ẹlẹnan. Faizal nin mhan ka tẹmhọn ọlẹn, da munhẹn ha luẹ iBaibo, nin ọle rẹ fẹghe si ọta nọnsi Osẹnobulua gene ribhọ. Emhin nin ọle luẹle da wo han ọle ilo. Ọle da dọ kere ghe iman-emhin ne bunbun nan man bhi otuẹ iribhi Baibo. Emhin nin ọle yẹ luẹ rẹji emhanmhan nin Osẹnobulua mhọn da ọne otọ nan da wo ti ọle bhọ.

Ọle da yọle: “Mẹn ki dọ rẹọbhọ ghe ẹsele nọn na obọ Osẹnobulua vae, ọle iBaibo khin. Osẹnobulua nọn man otọ bi okhun mhọn ọne ahu nin ọle rẹ re iBaibo nin eria, yẹ gbega ọle nọn tọ sẹbhi ẹghe nọnsẹmhan. Mhan ha yọle ghe Osẹnobulua ida sabọ gbega Ọta nọnsọle, mhan re iriọ tale ghe Osẹnobulua imhọn ahu. Mẹn ida gbudu ta ẹmhọn nọn sẹ iriọ.”—Isaiah 40:8.