Eji a tiọle Paddington bhi oto England, ọle a da biẹ mẹn. Imẹn, inẹn mẹn, bi ibhio mẹn ea ne diọn mẹn ko ha ribhi uwa. Ọdanyọn aba mẹn ha khin. Ranmhude ọnan, ọle idebhi uwa a. 

Ẹghe nin mẹn sẹ rẹ dia khere, inẹn mẹn da man mẹn ebi a rẹ nan erọnmhọn yẹ, yẹ taman mẹn nin mẹn ha nan erọnmhọn fo mẹn kuẹ nowẹ ọsasọn. Mẹn mhọn obhi Baibo khere nin ebe nọnsi Psalm ọkpa ye. Mẹn ki ha khue emhin rẹ so illo ne ribhi ọne iBaibo nan. Ebe ọkpa ribhọ nin mẹn tiele ẹghe nin mẹn rẹ ha yi obhokhan. Ọne ebe da yọle: “Ẹdẹ ọkpa, iẹnlẹn dẹ fo.” Ọne ẹmhọn nan da wo ha kpokpo mẹn bhi ọkhọle rẹ sẹbhọ ghe, mẹn ha rẹ nowẹ, mẹn ida sabọ wẹ. Mẹn da ha ria ẹmhọn ebi ẹghe odalo ha diayẹ, bi ebezẹle nin mhan da ribhi agbọn. Mẹn bha guanọ nin mẹn yu!

Akizẹbue, ilọnmhọn ikpẹbo da wo ha ti mẹn bhọ. Mẹn da ha guanọ uwedẹ kẹkẹ nin mẹn rẹ ne ene yu talọ. Mẹn da ha rẹkhan imọẹ mẹn eso bhi isiku yo eji a da re olinmhin tọ. Mẹn da yẹ deba ele ha ghe fimu nan da ha rẹ azẹn bi oso man. Arẹmiẹn emhin nọn re ofẹn mun mhan nọn, ọ da yẹ wo ha mhẹn mhan bhi ẹlo.

Ikpe igbe mẹn ha ye ẹghe nin mẹn rẹ munhẹn ha nyẹnlẹn iẹnlẹn esankan. Mẹn da munhẹn ha sin isiga. Ọ bha sẹ bue gbe, isiga nan sin da wo na mẹn bhi aranlẹn. Akizẹbue, mẹn bhọ da munhẹn ha sin itaba-ẹlinmhin. Mẹn ki ha ribhi ikpe 11, mẹn da munhẹn ha da anyọn gbegbe. Arẹmiẹn ọ imhẹn mẹn bhi unun, uwedẹ nọn rẹ mun mẹn wo ha yẹẹ mẹn. Illo nan khue bi ikhiẹn nan gbe da yẹ wo ha yẹẹ mẹn. Mẹn da wo ha yo ikhiẹn kẹkẹ dọ ha gbẹ niẹn oẹ a. Ọsasọn, mẹn ki do sibhi uwa re, yẹ do nabhi uwa ọkuẹsẹ ẹdẹ we. Ẹghe rebhe mẹn rẹ wo ha gbẹdẹ isiku, ranmhude, mẹn ha re iriọ yo ọne ikhiẹn vae, egbe ki wo lọ mẹn. Mẹn ha rẹ yo isiku, anyọn mẹn dọ ha da gbegbe.

Ẹghe nin mhan ki rẹ lu ẹzamu nọn kike bhi isiku, mẹn bha lu nọnsẹn. Ọnan da wo ba inẹn mẹn bhi egbe. Ọkuẹsẹ ọne ẹghe nan, inẹn mẹn bha rẹ lẹn ghe mẹn tẹ khekhe sẹ inian. Uwedẹ iẹnlẹn nọnsẹmhẹn da wo re ẹkẹ ha khọ ọle. Ọle da ne mẹn ha van. Ranmhude ọnan, mẹn da nẹ sibhi uwa re. Mẹn da dọ ne iTony nin ọshọ mẹn dia. Ọria nọn re ohu lu emhin Tony ha khin. Ọle da yẹ ha khiẹn ikhunmhun ne imhẹn, yẹ ha ra. Ọ bha sẹ bue gbe, mẹn da ha hanmhan nin Tony. Iriọ mẹn rẹ biẹ ọmọn ọhẹnhẹn nọnsẹmhẹn ẹghe nin mẹn rẹ ha ye ikpe 16.

Akizẹbue, mẹn da vae dọ ha nyẹnlẹn bhi uwa nin gọvmẹnti mun nin imanmhẹn ne mun ẹkẹ, nin ele bi imọn nesele ha dia. Ọne ẹghe nan mẹn rẹ miẹn Esali Jehova. Ẹghe rebhe, ọle ikhuo eva ne yi Esali Jehova rẹ ha vae bhi ọne uwa dọ ha ne imanmhẹn eso zilo bhi ẹkẹ Baibo. Ẹdẹ ọkpa, mẹn da deba ele bhi ọne izilo. Mẹn da ha mhọn ọlẹn bhi ọkhọle ghe, mẹn dẹ rẹman ene Esali Jehova ghe iman-emhin nọnsele bha gba. Ọkpakinọn, ele da re ekpẹn-ekpẹn re iBaibo wanniẹn inọnta nesẹmhẹn rebhe. Ẹkẹ-ẹjẹjẹ bi ifuẹkẹ nin ele rẹman da wo re ẹmhọn ele ha yẹẹ mẹn. Bhiriọ, mẹn da yọle nin ele dọ ha man imẹn iBaibo.

Ọ bha sẹ bue gbe, mẹn da luẹ emhin ọkpa bhi Baibo nọn fi iẹnlẹn nọnsẹmhẹn denọ. Rẹ na bhi egbe obhokhan ha de, ọle ofẹn uu mọn da mun mẹn. Ọkpakinọn, mẹn da luẹ kere ghe, beji Jesu tale, Osẹnobulua dẹ riọ eria ne yu kpanọ bhi uu! (John 5:​28, 29) Mẹn da yẹ dọ luẹ kere ghe Jehova hoẹmhọn mẹn. (1 Peter 5:7) Ẹmhọn nọn ribhi Jeremiah 29:11 da wo rẹso mẹn. Enin da yọle: “Inian iJehova tale: ‘Imẹn tobọmẹn lẹn iria-eria nin mẹn ria da bha, eria ọsi ọfure, ọ iyi ọsi ọbe, nin mẹn rẹ re ẹghe odalo nọn mhẹn bi ikhuaẹloghe nin bha.’ ” Mẹn da dọ lẹn ghe mẹn dẹ sabọ ha mhọn ọne ikhuaẹloghe nin mẹn rẹ nyẹnlẹn bhi ighegheghe.​—Psalm 37:29.

Esali Jehova gene wo rẹman mẹn ghe ele hoẹmhọn mẹn. Ẹghe nin mẹn re yo ikolo nọnsele bhi ẹghe ọhẹnhẹn, ọrebhe bhi enin da wo miẹn mẹn ọbhi egbe! (John 13:​34, 35) Ọnan da wo dikẹ bhi uwedẹ nin ẹbho rẹ ne imẹn lu emhin bhi otuẹ ọkpa nin mẹn yo. Esali Jehova da wo miẹn mẹn ọbhi egbe arẹmiẹn uwedẹ iẹnlẹn nọnsẹmhan bha gba. Ele da wo ha rẹkpa mẹn bhi uwedẹ kẹkẹ. Ọ da wo diabe mẹn ribhi azagba-uwa nin ọrebhe da hoẹmhọn egbe.

Baibo nin mẹn ha luẹ da rẹkpa mẹn rẹ lẹn ghe, ọkhẹke nin mẹn fi uwedẹ iẹnlẹn nọnsẹmhẹn denọ, nin mẹn da sabọ ha lu ebe ti Osẹnobulua bhọ. Ọ bha lẹkhẹ nin mẹn nin mẹn rẹ re obọ sibhi itaba-ẹlinmhin nan sin re. Mẹn da dọ kere ghe illo esọ nin mẹn kaehọ ọle re ọle nọghọ imẹn rẹ re obọ sibhi itaba-ẹlinmhin nan sin re. Ranmhude ọnan, mẹn bha yẹ ha khue ene illo nan. Ranmhude mẹn bha guanọ nin mẹn yẹ ha da anyọn gbegbe, mẹn bha yẹ ha yo ikhiẹn la iluemhin nin mẹn ha da miẹn edọnmhẹn nin mẹn rẹ da anyọn gbegbe. Mẹn da munhẹn ha zẹ imọẹ ne ha sabọ rẹkpa mẹn rẹ ha lu emhin ne yẹẹ Osẹnobulua.​—Proverbs 13:20.

Bhi ọne ẹghe nan, Tony da yẹ ha deba Esali Jehova luẹ iBaibo. Uwedẹ nin Esali Jehova rẹ re ewanniẹn ọbhi inọnta nesọle, da re ọle rẹọbhi ẹmhọanta nin ọle ha luẹ bhi Baibo. Ọle da wo fi uwedẹ iẹnlẹn nọnsọle denọ. Ọle bha yẹ ha deba imọẹ ọle ne imhẹn mun obọ. Ọle bha yẹ ha ra, la sin itaba-ẹlinmhin. Sẹyẹ, nin mhan rẹ manman lu ebe ti Jehova bhọ, mhan da kere ghe, ọkhẹke nin mhan zobọ bhi ilọnmhọn oghẹ, yẹ kuobọgbe bẹẹ ọmọn nọnsẹmhan. Bhiriọ, mhan da bọ egbe bhi ukpe 1982.

Mẹn da ha tie okha ọsi eria ne sẹ sabọ fi uwedẹ iẹnlẹn nọnsele denọ. Bhi ẹkẹ ebe Watchtower bi Awake! * nin mẹn tiele, mẹn da sabọ luẹ emhin nọn rẹkpa ele rẹ fidenọ. Ijiẹmhin nọnsele da wo rẹkpa mẹn rẹ lẹn ghe, ọkhẹke nin mẹn wo ha dọnmhegbe rẹ fidenọ! Mẹn da wo ha nan erọnmhọn ji Jehova nin ọle hẹi zẹ mẹn obọ. Bhi July 1982, Mẹn bi Tony da mianmẹn.

Ikolu nin mẹn bi Jehova ki ko dọ ha mhọnlẹn, ọle re iẹnlẹn nọnsẹmhẹn kiọnlẹn. Jehova yẹ wo rẹkpa mẹn bi Tony bhi ẹghe nin emhin rẹ kaka bhi iẹnlẹn nọnsẹmhan. Mhan yẹ wo dọ lẹn ebi ọ khin nan rẹ mun udu nyan iJehova bhi ẹghe ọkakale. Jehova wo gene rẹkpa azagba-uwa nọnsẹmhan.​—Psalm 55:22.

Ọ wo manman ti mẹn bhọ ghe, mẹn sabọ rẹkpa imọn nesẹmhan rẹ dọ lẹn iJehova. Ọ yẹ wo re imẹn ghọnghọn rẹ daghe eyẹ nesẹmhẹn ga iJehova.

Mẹn iyẹ riọ bhi owe ha ria ẹmhọn ebi ẹghe odalo ha diayẹ, la nin ofẹn uu ha mun mẹn. Iwẹnna oga mẹn bi Tony ki lu. Uzana-uzana mhan rẹ re ẹnẹ ji agbotu kẹkẹ ọsi Esali Jehova nin mhan dọ re izebhudu nin ibhio mhan. Mhan ki deba ele ha yo itẹmhọn Osẹnobulua dọ ha taman ẹbho ghe, ele ha mhọn urẹọbhọ da iJesu, ele ki miẹn iẹnlẹn ọsi ighegheghe.