Eji a tiọle Puerto Limón, nọn ribhi obọ ọsi east bhi agbaẹbho ọsi Costa Rica mẹn da wanre. Imọn elẹnlẹn ene biẹ mẹn ha mhọnlẹn, mẹn ukpọzi ihinlọn bhi ẹwẹ ele. Ikpe elẹnlẹn mẹn ha ye beji aba mẹn yu. Bhiriọ, inẹn mẹn ọkpa ki bẹẹ mhan wanre.

Egbe obhokhan mẹn rẹ munhẹn ha gbe igemu natiọle bezbọ. Mẹn wo manman ha sọnyẹnmhẹn bhi ọne igemu beji mẹn ha ribhi obhokhan. Beji mẹn ha bu ikpe uje, mẹn da dọ deba usun ọkpa ne luẹ ebi a rẹ gbe ọne igemu nan yẹ. Mẹn da deba ọne usun nan ha gbe bezbọ. Mẹn ki gbera ikpe uje, okpea ọkpa da tie mẹn nin mẹn dọ deba usun ne guẹ ebi a rẹ gbe ọne igemu nan yẹ ne ribhi Nicaragua. Ọkpakinọn, ranmhude egbe bha daan inẹn mẹn bhi ọne ẹghe nan, sẹyẹ mẹn hi ọnọn ha gbẹloghe ọle, mẹn bha ho nin mẹn diọbhi Nicaragua. Bhiriọ, mẹn bha dọ deba ọne usun. Akizẹbue, okpea ọbhebhe nọn guanọ ẹbho ne guẹ rẹ gbe bezbọ da tie mẹn nin mẹn dọ ha gbe bezbọ nin agbaẹbho nọnsẹmhẹn nọn yi Costa Rica. Ẹbho ne ribhi usun ọsi ẹbho ne luẹ ebe a rẹ gbe bezbọ yẹ a da hanọn ẹbho ne ribhi ọne usun nan yọle nin mẹn dọ deba. Bhi ọne ẹghe nan, mẹn da ka nin mẹn rẹ deba ele. Ukpe 1949 mẹn munhẹn ha gbe igemu nin ọne agbaẹbho nan rẹ dọ sẹbhi 1952. Mẹn wo gbe igemu ne bunbun bhi agbaẹbho ọsi Cuba, Mexico bi Nicaragua. Mẹn wo manman guẹ ebi a rẹ gbe ọne igemu nan yẹ, ẹghe bhọ ribhọ nin mẹn rẹ gbe igemu igbe-ihinlọn rẹkhan egbe, ọne mẹn da dobọ bha ha ribhọ. Ọ wo manman ti mẹn bhọ sade usun ẹbho ne ghe mhan wo so elin nọnsẹmhen!

Sẹyẹ bhi ọne ẹghe nan mẹn da wo ha nyẹn iẹnlẹn esankan. Arẹmiẹn ghe okhuo ọkpa sẹsẹ mẹn zẹ ọle ọshọ, men da sẹyẹ wo ha muno ikhuo kẹkẹ. Iriọ mẹn yẹ rẹ wo ha da anyọn gbegbe. Ẹdọkpa, mẹn da wo manman da anyọn rẹ sẹbhọ ghe beji ẹdẹ we, mẹn da ha nọọn ebi mẹn rẹ sẹbhi uwa yẹ! Sẹyẹ mẹn da wo ha fi ono kẹkẹ.

Bhi ọne ẹghe nan inẹn mẹn da dọ kiẹn ọkpa bhi ẹwẹ Esali Jehova. Ọle da ha ho nin mẹn deba ọle, ọkpakinọn bhi ọsi ọhẹnhẹn ọbha fu ọle, ranmhude ẹmhọn igemu mẹn wo re iẹnlẹn nọnsẹmhẹn rẹ ha lu ilọnmhọnlẹn. Mẹn da ha luẹ ebi a rẹ gbe ọne igemu nan yẹ, ẹghe nan rẹ le ebale ha rẹ sẹ, mẹn ida zẹwẹ kpokpo egbe nin mẹn rẹ dọ le ebale! Ẹmhọn ọne igemu mẹn wo mun ọkhọle ọi. Emhin iribhọ nin mẹn hoẹmhọnlẹn gbera ọne igemu nan!

Beji mẹn ha ribhi ikpe 29, ẹdọkpa beji mhan ha gbe bezbọ, mẹn da wo manman kuan ẹghe nin mẹn rẹ ha dọnmhegbe nin mẹn rẹ mun ball. Beji egbe ki daan mẹn, mẹn da zobọ bhọ rẹ ha gbe bezbọ. Ọrẹyiriọ, mẹn bha wo zẹ ọne igemu obọ, mẹn da ha man usun ọkpa nọn sikẹ eji mẹn ye ne luẹ ebi a rẹ gbe ọne igemu nan yẹ.

Bhi 1957, mẹn da ka nin mẹn rẹ yo usikoko nọn nẹ nin Esali Jehova do bhi stadium nin mẹn da ka gbe bezbọ. Beji mẹn rẹ ha ribhi ẹwẹ ele, uwedẹ nin ele rẹ ha re ekpẹn lu emhin da wo rẹso mẹn. Ọnan da wo dikẹ bhi uwedẹ nin ẹbho ne vae bhi enan sade mhan gbe bezbọ rẹ lu emhin. Emhin nin mẹn daghe bhi ọne usikoko da rẹ mẹn deba ene Esali Jehova ha luẹ iBaibo yẹ wo ha yo ikolo oga nesele.

Emhin kẹkẹ nin mẹn luẹ bhi Baibo da wo ti mẹn bhọ. Bhi ọsi ijiẹmhin, Jesu tale ọbhi otọ ghe bhi ẹghe ọkike, edibo nesọle dẹ ha wewe ọta nọn mhẹn ọsi Agbejele na bhi otọ agbọn nan rebhe. (Matthew 24:14) Mẹn da yẹ dọ luẹ kere ghe Kristiẹn ọsaje ire iwẹnna oga nọnsele khu igho. Jesu yọle ghe: “Ọsọhẹ a rẹ re nin bha, bha yẹ ha re nin ẹbho ọsọhẹ.”—Matthew 10:8.

Beji mẹn rẹ ha luẹ Baibo, mẹn da ha re ebi men luẹ rẹ fẹ emhin nin Esali Jehova lu. Uwedẹ nin ele rẹ dọnmhegbe rẹ ha tẹmhọn ọta nọn mhẹn ọsi Agbejele na bhi ije rebhe da wo manman ti mẹn bhọ. Mẹn wo daghe ọle ghe Esali Jehova wo zẹ emhin bhi obọ beji Jesu yọle ọkhẹke nin Kristiẹn ha lu. Bhiriọ, ẹghe nin mẹn rẹ tie ẹmhọn nin Jesu tale bhi Mark 10:21 nin ọle da yọle, “vae dọ ha rẹkhan mẹn,” mẹn da ha ho nin mẹn kiẹn ọkpa bhi Esali Jehova.

Ọ re mẹn ẹghe ọkuẹsẹ mẹn gene sabọ lu ọnan. Bhi ọsi ijiẹmhin, bhi ẹkẹ ikpe ne bunbun nuba ribhọ nin mẹn wo ha fi uzana-uzana bhi eji a da fi ono. Mẹn ki ha riale ghe ọne nuba dẹ re ẹhi mẹn mhẹn. Ọkpakinọn, mẹn da dọ luẹ kere bhi Baibo ghe ẹbho ne ga osẹ nọn re ẹhi ọria mẹn, ẹmhon ele sọnọn Osẹnobulua, iriọ ẹmhọn ẹbho ne mhọn ẹlobhiamhin yẹ rẹ sọnọn Osẹnobulua. (Isaiah 65:11; Colossians 3:5) Bhiriọ, mẹn da zẹ nin mẹn rẹ zobọ bhi ono nan fi. Uzana nọn rekhanlẹn, beji mẹn zobọ bhi ono na fi, nuba nin mẹn rẹ ha fi uzana-uzana da gbe! Ẹbho da ha wo ha jẹ mẹn ranmhude ghe mẹn bha fi bhi ọne uzana nin, ele da wo ha sua mẹn nin mẹn kie munhẹn ha fi, ọkpakinọn mẹn bha ka. Mẹn bha kie fikie dọ ha fi ono.

Mẹn da kuẹlo ọbhi edọnmhẹn ọbhebhe ọne ukpẹdẹ tee nin mẹn mianmẹn bhi usikoko nọn nẹ ọsi Esali Jehova. (Ephesians 4:24) Beji mẹn kiere bhi ọne ọsemuan nin, mẹn da kere ghe ọmanmhẹn nin mẹn ka rẹ zẹ bhi ọshọ mundia bhi odẹ ọsi ugha bhi hotel nin mẹn ha ye. Ọle da yi mẹn, “Sammy, vae, ji mhan sọnyẹmhẹn!” Mẹn da jẹje wanniẹn ọlẹn yọle, “Eye!” Mẹn da taman ọlẹn ghe ebi Baibo tale bhi ẹmhọn inegbe nowẹ, bi bhi ẹmhọn ibọdọ bi ire-okhuo, ọle mẹn ki re obọ rẹkhan. (1 Corinthians 6:18) Ọle da yọle, “Be uwẹ kuẹ ta?” Ọle da yọle ghe ebi Baibo tale bhi ẹmhọn inegbe nowẹ bi ẹmhon ibọdọ bi ire-okhuo bha sẹ emhin soso, ghe nin mhan kie mun ikolu nọnsẹmhan hẹn. Ọkpakinọn, mẹn da fẹkẹ nabhi ugha nọnsẹmhẹn khue odẹ gbe ọle. Ẹlẹnan nian, ọ rẹ mẹn ghọnghọn rẹ yọle ghe, nin mẹn rẹ dọ kiẹn ọkpa bhi Esali Jehova bhi 1958, mẹn bha kie fikie dọ ha lu ene emhin nin mẹn fi ikeke gbe.

Mẹn sẹ wo manman miẹn elele ne bunbun! Eso bhi ene elele nan hi, mẹn mhọn imọẹ ọsaje nian, mẹn mhọn iẹnlẹn nọn mhẹn, mẹn yẹ wo mhọn eghọnghọn ọsaje.

Mẹn sẹyẹ wo sọnyẹmhẹn bhi igemu natiọle bezbọ, ọkpakinọn ọ iyi ọle mẹn yẹ mun kalo bhi iẹnlẹn. Ọne igemu nan wo manman rẹ mẹn ha mhọn igho yẹ wo rẹ mẹn hẹn usi, ọkpakinọn ene emhin nan bha tọ. Ikolu nin mẹn bi Jehova ko mhọnlẹn bi ikolu nin mẹn bi ibhio mẹn ne ribhi agbotu nọnsi Jehova bhi otọ agbọn rebhe ko mhọnlẹn dẹ ha ribhọ rẹ dọ sẹbhi ighegheghe. Baibo yọle ghe: “Ọne agbọn nan bi emhin otiti ne ribhi ẹkẹ ọle re egbe khian, sokpan, ọria nọn lu iho nọnsi Osẹnobulua dẹ ha ribhọ bhi ighegheghe.” (1 John 2:17) Ejayenan nian, Osẹnobulua nin Jehova bi ẹbho nesọle mẹn ki hoẹmhọnlẹn gbera emhin nọn hi ki rẹ khin!