Emhanmhan ọsi Esali Jehova nanrẹ luẹ ẹbho iBaibo rie ewanniẹn bhi inọnta nebunbun bii:

• Ọbhọ Osẹnobulua?

• Ọsẹnobulua gene gbẹloghe mhẹn?

• Bi mhẹn arẹ sabọ miẹkpa azagba iẹnlẹn mẹn yẹ?

• Bi mhen arẹ min eghọghọn bhi iẹnlẹn mẹn yẹ?

Uwẹ dẹ min ene ewanniẹn rẹji inọnta nan kẹ nọọn rẹji iluẹmhin iBaibo nin man nẹ ebho luẹ bho otọle nan.

Ba rẹ luọnin iluẹmhin yẹ? Aha zi uhọnmhọnta re bii “Osẹnobulua” la “azagba iẹnlẹn,” mhan ki fẹ eje kikẹ bhi Baibo ghe nan da tọta nyan lẹn. Bhiriọ, mhan ki dọ lẹn ebi Baibo tale rẹji ọnin uhọnmhọnta.

Ọnin ebe What Does the Bible Really Teach? ọle miẹnkpa man rẹ luẹ ẹbho iBaibo. Ọnin ebe nan ọreman ebi Baibo gene ta rẹji Osẹnobulua, Jesu, ikian nọn sẹmhan bi uhọnmhọnta ebhebhe.

Eka aha bhọnin iluẹmhin iBaibo? Ọsọhẹ ọnin iluẹmhin. Aida hin igho bhọnin ebe nan rẹ luẹ iBaibo.

Ekẹ ẹghe ọnin iluẹmhin bue sẹ? Ẹghe nọn si uriagogo ọkpa ọle eria eso rẹ neman luẹ iBaibo uzana rẹsi uzana. Sokpan, uwẹ sabọ zẹ ekẹ ẹghe nin uwẹ mhọn nin uwẹ arẹ luẹ.

Bea sunu sade mẹn nọọn nan do luẹ men iBaibo? Sade uwẹ nọọn nan do luẹ iBaibo, ọkpa bhi Esali Jehova ki buẹ re bhi eje fuẹbhegbe bi ẹghe nọn yẹẹ. Ọle ki ri ihuẹnlo eso rẹ rẹman ẹ ebiman rẹ nin ẹbho luẹ iBaibo yẹ. Ọ ha yẹẹ, usabọ deba ele aluẹ Baibo khian.

Sade mẹn ka nan aluẹ mhẹn iBaibo, Ọ be rẹman mẹn dọ kin ọkpa bhi Esali Jehova? Eye. Ọti Esali Jehova bhọ nerẹ a man ẹbho iBaibo, arẹmiẹn riọ, man i ri idu-idu ye eria ne kin Esali Jehova. Ekpẹn-ekpẹn man rẹ nin ẹbho zilo ebi Baibo tale. Mhan lẹn ghe ọdeọde mhọn ahu nọn rẹ tobọle zẹ ebi ọle a rẹọ.—1 Peter 3:15.