Ranmhude ghe Esali Jehova rẹọbhọ ghe iluemhin ọsi bẹde iyẹ Osẹnobulua, ele ideba lu ọle. Ẹmhọanta nọn ghe Baibo bha wo taman mhan nin mhan hẹi lu bẹde, ọkpakinọn ọ rẹkpa mhan rẹ lẹn ẹlo nin Osẹnobulua rẹ ghe iluemhin nọn sẹriọ. Ji mhan fẹ emhin eso nin Baibo tale rẹji ọne iluemhin nan ghe.

1.   Ẹbho ne iga Osẹnobulua mun iluemhin ọsi bẹde gbọ. Ọne ebe natiọle Funk and Wagnalls Standard Dictionary of Folklore, Mythology, and Legend rẹman ghe, “ẹbho lu ọne iluemhin nan ranmhude ele rẹọbhọ ghe, ẹlinmhin ribhọ nọn kpokpo ọria bhi ukpẹdẹ nọn de fiọbhi ẹdẹ nan rẹ biẹ ọle. Bhiriọ, ẹbho ha deba ọnọn ọria sọnyẹnmhẹn bhi ẹghe ọne ukpẹdẹ nin ọle rẹ ha lu bẹde, ọ gbega ọne ọria bhi obọ ọne ẹlinmhin ebe nan.” Ebe natiọle The Lore of Birthdays rẹman ghe bhi ẹghe ẹdẹlẹ, “ukpẹdẹ nan biẹ ọria ọne ọria rẹ lẹn ebi ha sunu ji ọle bhi ẹghe odalo,” beji ẹbho ne “tie ahiẹnhiẹn rẹ tare ebe ha sunu ji ọria bhi ẹghe odalo rẹ lu ọle.” Beji ọne ebe yẹ rẹman, “ẹbho rẹọbhọ ghe, a ha mun kando ru bhi ẹghe ọne iluemhin nan, ọ dẹ sabọ re ebi ọne ọria guanọ bhi iẹnlẹn sunu ji ọle.”

    Baibo bha re obọ bhọ nin ọria rẹ ha lu ilọnmhọn idunan, ilọnmhọn ikpẹbọ, la ha noo ilọnmhọn ikpẹbọ rẹ guanọ otọ emhin fẹghe, ọ bha yẹ re obọ bhọ nin ọria rẹ ha lu emhin ne dia inian. (Deuteronomy 18:14; Galatians 5:19-21) Bhi ọsi ẹmhọanta, emhin ọkpa nọn zẹle nin Osẹnobulua da fuẹn agbaẹbho ọsi Babilọn an bhi ẹghe ẹdẹlẹ hi, nin ele rẹ ha noo emhin kẹkẹ nan manlẹn rẹ tare ebi ẹghe odalo nọnsele ha diayẹ, nọn yẹ diẹn mun ilọnmhọn ikpẹbọ nin ẹbho rẹ gua otọ emhin fẹghe. (Isaiah 47:11-15) Ọnan hi emhin ọkpa nọn zẹle nin Esali Jehova da rẹọbhọ ghe iluemhin ọsi bẹde iyẹẹ Jehova. Ranmhude ọnan, ele ideba lu ọne iluemhin.

2.   Kristiẹn bhi ore nin ọhẹnhẹn bha lu bẹde. Ọne ebe natiọle The World Book Encyclopedia da yọle ghe, “Kristiẹn bhi ore nin ọhẹnhẹn rẹọbhọ ghe, oga ohoghe, ele mun iluemhin ọsi bẹde gbọ.” Baibo rẹman ghe, ọkhẹke nin Kristiẹn rebhe re egbe khọkhọ edibo nesi Jesu bi ẹbho nekẹle nin Jesu tobọle man ele emhin.—2 Thessalonians 3:6.

3.   Iluemhin nin Baibo yọle nin Kristiẹn ha lu hi, nin ele rẹ ha ye uyumhin nọnsi Jesu re. (Luke 22:17-20) Ọ bha khẹke nin ọnan han mhan ilo. Ranmhude Baibo yọle ghe, ẹdẹ nin ọria yu ọle mhẹn gbera ẹdẹ nan biẹ ọle. (Ecclesiastes 7:1) Ẹghe nin Jesu rẹ ha ribhi ọne otọ nan, ọle wo ha mhọn elin nọn mhẹn bhi ẹlo nọnsi Osẹnobulua rẹ dọ sẹbhi ẹghe nin ọle rẹ yu. Ọnan rẹman ghe ẹdẹ nin ọle yu, ọle mhẹn gbera ẹdẹ nan rẹ biẹ ọle.—Hebrews 1:4.

4.   ije soso iribhi Baibo nan da tẹmhọn ọguọmhandia nọnsi Osẹnobulua nọn lu bẹde. Ọ iyi ranmhude ghe, ẹbho ne gbẹn Baibo yele a rẹ gbẹn elin ọsi ẹbho nesi Osẹnọbulua ne lu bẹde ọbhi Baibo zẹle, nan bha da tẹmhọn ele. Bhi ọsi ẹmhọanta, a tẹmhọn ẹbho eva ne iga Osẹnobulua ne lu bẹde bhi ẹkẹ Baibo. Ọkpakinọn, emhin ebe kẹkẹ wo sunu bhi ẹghe ọne iluemhin.—Genesis 40:20-22; Mark 6:21-29.

   Ọ iyi iluemhin rebhe Esali Jehova hele ranmhude ẹbho ne lu ọle, la ranmhude ebezẹle nan da mun ọlẹn gbọ. Ọkpakinọn, ahamiẹn Baibo gbotọle fanọn an ebezẹle nọn bha da khẹke nin mhan lu ọne iluemhin, mhan ideba lu ọle hiehie.

 Esali Jehova manman wo rẹman imọn nesele ghe ele hoẹmhọn ele ẹghe rebhe. Ele yẹ wo dẹ emhin rẹ lu ẹsele nin ele, yẹ deba ele sọnyẹnmhẹn sade ele si koko. Ele wo dọnmhegbe rẹ re egbe khọkhọ Osẹnobulua nọn wo zẹ emhin bhi obọ nin imọn nesọle. (Matthew 7:11) Ọ iba imọn nesi Esali Jehova bhi egbe sade ele họn ene ọta nan eso nin mhan da tẹmhọnlẹn nian:

•   “Ọ manman wo re ọria ghọnghọn sade ọria lu ẹsele nin uwẹ nin uwẹ bha rẹ re ẹlo ọi.”—Tammy nọn ribhi ikpe 12 tale.

•   “Arẹmiẹn ẹbho idẹ emhin rẹ lu ẹsele nin mẹn bhi ẹghe bẹde nọnsẹmhẹn, ene biẹ mẹn yẹ wo dẹ emhin rẹ lu ẹsele nin mẹn bhi ẹghe nekẹle. Ọ manman wo yẹẹ mẹn bhiriọ ranmhude, bhi ẹghe nin mẹn bha rẹ re ẹlo ọi ọnan rẹ sunu ji mẹn.”—Gregory nọn ribhi ikpe 11 tale.

•   “Idujie nan noo ihuẹnlọ igbe rẹ lu, nan da gha obhi keki khere, la nan da so illo ọkpa sẹsẹ, ọnin iyi idujie hiehie. Vae bhi isẹmẹn, nin uwẹ dọ daghe ebi idujie gene diayẹ!”—Eric nọn ribhi 6 tale.