Ebi ẹbho ta nọn iyi ẹmhọanta: Esali Jehova bha rẹọbhọ ghe dọkitọ dẹ sabọ rẹkpa ele, bhiriọ a ha miẹn ele khọnmhọn, ele iyo ihospital hiehie.

 Ẹmhọanta nọn ribhọ: Eji a da hinmhin egbe nọn mhẹn nẹ bi dọkitọ nọn mhẹn nẹ, ọle mhan guanọ sade imhan la ọria bhi azagba-uwa nọnsẹmhan khọnmhọn. Ahamiẹn mhan khọnmhọn la mhan ho nin mhan lu operation, dọkitọ nọn guẹ ọne iwẹnna nọnsẹn, nọn ida noo aranlẹn rẹ gbẹloghe mhan, ọle mhan bu. Uwedẹ kẹkẹ nan ki rẹ gbẹloghe eria bhi hospital nian, wo manman ti mhan bhọ. Bhi ọsi ẹmhọanta, uwedẹ nan rẹ gbẹloghe ọria nọn khọmhọn nan ida noo aranlẹn, nan mhanmhan ranmhude Esali Jehova, ọle ẹbho ne bunbun ki wo rẹ hinmhin egbe ẹlẹnan nian. Ẹlẹnan nian, bhi agbaẹbho ne bunbun, ọria nọn khọnmhọn ki dẹ sabọ tobọle zẹ nin ọle rẹ re egbe nẹ bhi okhẹna nọn rẹkhan aranlẹn nan si ọbhi egbe, okhẹna bii ebe nanbhọre sade a si aranlẹn bhi egbe ọsi ọria nọn mhọn emianmhẹn, okhẹna nọn nanbhọre ahamiẹn aranlẹn nan si ọria bhi egbe bi aranlẹn ọsi ọne ọria iko yi ọkpa, bi okhẹna nọn nanbhi idobọ ọsi eria re.

 Ebi ẹbho ta nọn iyi ẹmhọanta: Esali Jehova rẹọbhọ ghe urẹọbhọ re egbe daan ọria sade ọria khọnmhọn.

 Ẹmhọanta nọn ribhọ: Esali Jehova da ha khọnmhọn, ele iwo dotua ha riale ghe urẹọbhọ dẹ wo re egbe daan ele. Ele yo ihospital, yẹ le ikhunmhun beji egbe ha da daan ele.

 Ebi ẹbho ta nọn iyi ẹmhọanta: Nan rẹ noo uwedẹ ọbhebhe rẹ gbẹloghe ọria nọn khọnmhọn, beji a ha da miẹn ghe a bha noo aranlẹn manman ghan.

 Ẹmhọanta nọn ribhọ: A ha re uwedẹ ọbhebhe rẹ hinmhin egbe, nan bha da noo aranlẹn ọle bhọ lo nẹ.

 Ebi ẹbho ta nọn iyi ẹmhọanta: Esali Jehova ne bunbun rẹ sẹbhi ibhokhan, ele yu ukpe-ukpe ranmhude ele isi aranlẹn ọbhi egbe.

 Ẹmhọanta nọn ribhọ: Ẹghe ẹghe, ọle dọkitọ ne bunbun rẹ lu operation bhi udu, bi una operation kẹkẹ ne bha lẹkhẹ. Ele bhọ inoo aranlẹn rẹ lu ene operation na kẹkẹ. Sẹyẹ, eria nan bha si aranlẹn ele bhi egbe rẹsẹbhi ibhokhan sade a gbẹloghe ele, egbe sẹyẹ daan ele. Ẹgheso, ele bhọ egbe kẹ dan nẹ eria nan si aranlẹn ele bhi egbe. Ọria soso ida wo sabọ tale ghe, ranmhude ọria bha si aranlẹn ọbhi egbe zẹle nin ọle da yu, la sade ọle si aranlẹn ọbhi egbe nọn, ọle irẹ yu.

 Ranmhude emhin nin mhan luẹ kere bhi Baibo nin mhan yẹ rẹọi, ọle zẹle nin mhan ida si aranlẹn ọbhi egbe. A wo zẹ ọle egbe dagbare bhi ẹkẹ iBaibo igba ne bunbun ghe, nin mhan re egbe nẹ bhi aranlẹn. (Genesis 9:4; Leviticus 17:10; Deuteronomy 12:23; Acts 15:​28, 29) Yẹ rẹ deba ọnin, bhi ẹlo nọnsi Osẹnobulua, aranlẹn mundia nin iẹnlẹn. (Leviticus 17:14) Ọ iyi nin mhan rẹ hẹnmhọn nin Osẹnobulua ọkpa zẹle nin mhan da re egbe nẹ bhọ, nin mhan rẹ mun ekpẹn nanlẹn, ranmhude ọle re iẹnlẹn nin mhan.

 Khẹkhẹ, ekhẹn dọkitọ bi ẹbho ne lẹn ẹlo ikhunmhun da ha ghe ọle ghe, nin ọria rẹ yọle ghe ọle ida si aranlẹn ọbhi egbe, nan re uwedẹ ọbhebhe gbẹloghe ọle, inan ọ diabe ọria nọn guanọ nọn tobọle gbe egbe ọle a. Ọkpakinọn, bhi ikpe eso ne gbera nian, ọne iria eria nan fidenọ. Bhi ọsi ijiẹmhin, bhi ukpe 2004, ebe ọkpa nin ene manman lẹn ikhunmhun gbẹn da yọle ghe, uwedẹ kẹkẹ nan lu nan rẹ ha gbẹloghe Esali Jehova, dẹ kiẹn uwedẹ kpataki nan ki da ha noo rẹ gbẹloghe eria ne khọnmhọn bhi ẹghe odalo. Bhi 2010, ebe ọkpa nan tiọle Heart, Lung and Circulation da yọle, uwedẹ nan rẹ lu operation nan ida noo aranlẹn, ọ iyi Esali Jehova ọkpa ada ha noo ọle nan, ọkhẹke nọn kiẹn emhin nan ha noo bhi operation nan hi ki rẹ ha lu.

 Dọkitọ ne bunbun bhi otọ agbọn rebhe, ki noo ọne uwedẹ nan, nan ida si aranlẹn ọria bhi egbe sade ele lu operation. Ọne uwedẹ nan ọle a bhọ ki noo bhi agbaẹbho ne bunbun ne manman tan ẹlo a. Ẹbho ne iyi Esali Jehova bhọ yẹ guanọ nan rẹ ọne uwedẹ nan rẹ gbẹloghe ele.