Esali Jehova sẹ wo noo Baibo nin ẹbho kẹkẹ zedu ọle. Ọkpakinọn, ọ manman yẹẹ ele rẹ ha noo New World Translation of the Holy Scriptures ranmhude uwedẹ nan rẹ noo elin nọnsi Osẹnobulua bhi ọne Baibo, uwedẹ nin ẹmhọn ne ribhi ẹkẹ ọle rẹ gba, bi uwedẹ nọn rẹ lẹkhẹ nan rẹ lẹn otọle.

•   Uwedẹ nan rẹ noo elin nọnsi Osẹnobulua. Ẹbho eso ne zedu iBaibo bha re ogẹn nọn khẹke ji Osẹnobulua. Ele bha re elin nọnsọle ọbhi eji ọ khẹke nọn ha ye. Bhi ọsi ijiẹmhin, bhi Baibo ọkpa nan zedu ọle, a da gbẹn elin ọsi eria ne bun sẹbhi 70 ọbhi ẹkẹ ọne Baibo, ranmhude ele deba miẹnsọn nan rẹ zedu ọle. Sokpan elin nọnsi Jehova nọn nyan Baibo bha miẹn eje soso nọn ha ye bhi ẹkẹ ọle.

   Bhi obọ nọnkẹle, eria ne zedu New World Translation bha lu iriọ. Ele da re elin nọnsi Jehova ọbhi eji ọ khẹke nọn ha ye bhi ọne Baibo. Ele bhọ bha gbẹn elin nọnsele ọbhi ọne Baibo hiehie.

•   Uwedẹ nin ẹmhọn ne ribhi ẹkẹ ọle rẹ gba. Ẹmhọn eso ribhọ nọn bha gba fo bhi ẹkẹ Baibo eso nin ẹbho zedu ọle. Bhi ọsi ijiẹmhin, bhi Baibo ọkpa, ẹmhọn nọn ribhi Matthew 7:​13 da yọle: “Rẹkhan ọne igeti nọn dia kekeke, ranmhude, uwedẹ nọn khian uwa eranlẹn wo manman bhiabhia. Sẹyẹ, iriọ ọne uwedẹ rẹ lẹkhẹ nan rẹ na.” Ẹmhọanta nọn ribhọ hi, “ugbekhuelo”, ọle ọ khẹke nọn ha ribhi eji ele gbẹn “uwa eranlẹn” ọi. Asabọmiẹn ranmhude, ene zedu ọne Baibo rẹọbhọ ghe, uwa eranlẹn eria ọbe khian, ọle zẹle nin ele da re ugbekhuelo kiẹn uwa eranlẹn. Ọkpakinọn, Baibo bha re obọ ọbhi ọne iman-emhin nan. Bhiriọ, uwedẹ nan rẹ zedu ọle bhi New World Translation, ọle hi uwedẹ nọn gbale. Enin da yọle: “Rẹkhan ọne igeti nọn dia kekeke, ranmhude, uwedẹ nọn khian ugbekhuelo, ọ dia gbodo, geti nọnsọle da sẹyẹ bhiabhia.”

•   Uwedẹ nọn rẹ lẹkhẹ nan rẹ lẹn otọle. Ọ yẹ wo khẹke nin Baibo nan zedu ọle nọnsẹn ha yi Baibo nọn lẹkhẹ nan rẹ lẹn otọle. Bhi ọsi ijiẹmhin, bhi ebe ọsi Romans 12:​11, Paul nin odibo da noo ikpọta nọn yọle “ji ọne ẹlinmhin ha ti.” Beji a miẹn ghe, ọ dẹ nọghọ nin ọria rẹ lẹn ebi a tẹmhọnlẹn, New World Translation da zedu ọle bhi uwedẹ nọn ha da lẹkhẹ nan rẹ lẹn otọle. Ọ da yọle: “Ji ẹlinmhin nọn khiale ha re uwẹ sasa.”

 Rẹ gbera ene emhin ea nan nin mhan tẹmhọnlẹn, Baibo natiọle New World Translation sẹyẹ mhọn emhin ọbhebhe nọn re ọle dikẹ. Ọsọhẹ a rẹ gha ọle. Ranmhude ọnan, ẹbho ne bunbun, rẹ sẹbhi ibhioguele sabọ miẹn Baibo ha tie bhi urolo nọnsele.