Ahamiẹn ọkpa bhi ẹwẹ Esali Jehova zobọ bhọ rẹ ha yo inẹbho bi ikolo oga, mhan iwo fi ele ehọ a. Bhi ọsi ẹmhọanta, mhan rẹkpa ele rẹ ziẹn oyẹẹ nin ele mhọn da Osẹnobulua.

 Mhan iwo re ẹjẹje khu ọria nọn lu emhin ebe nọn kakale bhi agbotu. Ọkpakinọn, ahamiẹn ọkpa bhi ẹwẹ Esali Jehova nọn mianmẹn gbobọra uhi nọn ribhi Baibo, sẹyẹ ọ bha ka fidenọ, a ki khu ọle bhi agbotu. Baibo yọle: “Re ọria-ọbe nọn ribhi ẹwẹ bha kie.”—1 Corinthians 5:13.

 Okpea nan khu bhi agbotu nin okhuo ọle bi imọn nọnsọle yẹ yi Esali Jehova kii? Arẹmiẹn a khu ọle bhi agbotu, ọle dẹ yẹ ha ribhi azagba-uwa nọnsọle. Okhuo ọle bi imọn nọnsọle dẹ sẹyẹ ha hẹnmhọn nanlẹn yẹ re oyẹẹ man ọlẹn.

 Eria nan khu bhi agbotu dẹ yẹ sabọ vae bhi ikolo oga. Ahamiẹn ọ ghọn ele, ele dẹ yẹ sabọ taman ene ewanlẹn ne ribhi agbotu nin ele rẹkpa ele. Ene ewanlẹn guanọ nin ele rẹkpa ọria nan khu bhi agbotu rẹ fidenọ, beji ọle ha da sabọ kie dọ ha ga Osẹnobulua. Ahamiẹn ọria nan khu bhi agbotu re obọ sibhi emhin ebe re, yẹ rẹman ghe ọle ho nin ọle re obọ rẹkhan ebi Baibo tale, ọle ki sabọ kie dọ ha yi ọkpa bhi ẹwẹ Esali Jehova.