Mhan dọ kere ghe eria nebunbun esọnyenmhẹn ne re ne mhan zilo bhi Baibo arẹmiẹn ghe ele ka mhọn otuẹ nele yo. Mhan lẹn ghe ọdeọde mhọn ahu nọn rea mhọn urẹọbhọ nọn dikẹ bhọ semhan, bhiriọ mhan i denyẹnyẹn ẹbho ne rẹ min uhọnmhunjie nọn sẹmhan.

Mhan a nẹnbho zilo bhi Baibo, mhan dọnmegbe nimhan rẹ rẹkhan ibhude nọn ribhi Baibo nin mhan ri “ifuẹkẹ” bi “ekpẹn nọn dimilin” man. (1 Peter 3:15) Mhan lẹn ghe ẹbho eso ida ka rehọ bhi uhọnmhunjie nin mhan rẹ khian. (Matthew 10:14) Ọrẹdiariọ, mhan bha nele talọ, mhan ida lẹn ebia rẹ wanniẹn yẹ. Mhan i yẹ lẹn ghe iẹnlẹn ọsi eria sabọ fideno.

Bọsi ijiemhin, ọria nan miẹn ghe ọbha ka nin mhan nin ọle zilo ẹdẹ eso ranmhude ẹsọn bun ọle bho obọ, sabọ ghọnghọn bhọ nin mhan nin ọle talọ ẹdẹ ọbhebhe. Iẹnlẹn ọsi eria eso sabọ fidenọ dọ rele denẹlo ọbhi ekpokpo noa rele ka nerẹ fẹghe ebi Baibo tale. Ọnan zẹle nin mhan da ne eria talọ gbera osukpa.