Ẹkẹ Ọkhọle Agbejele Nọnsi Osẹnobulua Be Ye?

Khue

Ewanniẹn nin Baibo re ọbhọ

Eye, Agbejele nọnsi Osẹnobulua iyi emhin nọn ribhi ẹkẹ ọkhọle ọsi eria ne ga Osẹnobulua. a Baibo rẹkpa mhan rẹ lẹn eji ọne Agbejele gene ye, ọ da tiọle “agbejele nọn ribhi okhun.” (Matthew 4:17, King James Version) Fẹ ebi Baibo rẹ rẹman yẹ ghe, ugbẹloghe ọsaje nọn da ha na bhi okhun gbẹloghe ọne otọ nan, ọle ọne ejele gene khin.

Ejele nọnsi Osẹnobulua mhọn ẹbho ne da ha gbẹloghe bhọ, ẹbho ribhọ nin ele da ha gbẹloghe, ọne Ejele mhọn uhi, sẹyẹ, ọ mhọn ahu nọn ha rẹ mun iho nọnsi Osẹnobulua sẹ bhi ọne otọ nan bi okhun.—Matthew 6:10; Revelation 5:10.
Ugbẹloghe nọnsi Osẹnobulua, la Agbejele nọnsọle dẹ gbẹloghe “ẹbho rebhe, agbaẹbho rebhe bi usun urolo kẹkẹ” bhi ọne otọ nan. (Daniel 7:13, 14) Osẹnobulua tobọle re ahu nin ẹbho ne da ha gbẹloghe bhi ọne Ejele, ọ iyi obọ ọsi ẹbho nin ele gbẹloghe ele ha da miẹn ahu.—Psalm 2:4-6; Isaiah 9:7.
Jesu taman etuegbe nesọle ghe, ele dẹ deba ọle bhi Agbejele nọn ribhi okhun dọ “dotua bhi okhun ojukhuo.”—Luke 22:28, 30.
Ọne Ejele nan mhọn ighian, ọle dẹ dunmhun ele a.—Psalm 2:1, 2, 8, 9; 110:1, 2; 1 Corinthians 15:25, 26.

Baibo bha yọle ghe Agbejele nọnsi Osẹnobulua ribhi ẹkẹ ọkhọle nọnsẹmhan ahamiẹn mhan ka ọle ehọ. Ọkpakinọn, ọ yọle ghe “ọta ọsi ọne Agbejele” la “ọta nọn mhẹn ọsi ọne Agbejele” dẹ sabọ rẹso mhan bhi ọkhọle. Ọkhẹke nin mhan ji ọle rẹso mhan.—Matthew 13:19; 24:14.

Be ọne ẹmhọn “Agbejele nọnsi Osẹnobulua ribhi ẹwẹ bha” mundia nan?

Ọ nọghọ ẹbho eso rẹ gene lẹn otọ eji Agbejele nọnsi Osẹboulua ye, ranmhude uwedẹ nin Baibo eso rẹ zẹdu Luke 17:2. Bhi ọsi ijiẹmhin, King James Version yọle “agbejele nọnsi Osẹnobulua ribhi ẹkẹ bha.” Nin mhan rẹ sabọ lẹn otọ ọne ulọnlẹn nan nọnsẹn, ọkhẹke nin mhan zilo nyan ebi a ta nẹga ọle.

Agbejele nọnsi Osẹnobulua bha ha ribhi ọkhọle ọsi ene ẹbho nan ne imhẹn, ne yẹ ha mhọn obọ bhi uyumhin nọnsi Jesu

Ibhokhan Pharisee Jesu ha ne talọ. Ele ene mun ọkalo bhi otuẹ ẹghenin. Ele wo manman kpokpo Jesu, yẹ ha mhọn obọ bhi uu nọnsọle. (Matthew 12:14; Luke 17:20) Uwẹ riale ghe ọ gbamhin nan rẹ yọle ghe Agbejele nọnsi Osẹnobulua ribhi ẹkẹ ọkhọle ọsi ene eria nan ne imhẹn? Jesu da taman ele yọle: “Ohoghe bi emhin ebe ọle ọkpa vuọn ọkhọle nọnsẹbha.”—Matthew 23:27, 28.

Baibo ebhebhe wo re otọ ẹmhọn nin Jesu tale bhi Luke 17:21 man nọnsẹn. Baibo natiọle Italics ours; Contemporary English Version da yọle: ‘Agbejele nọnsi Osẹnobulua deba bha ribhi enan.’ New World Translation da yọle: “Agbejele nọnsi Osẹnobulua ribhi ẹwẹ ibha.” Ejele nọnsi Osẹnobulua da “deba” la ha “ribhi ẹwẹ” ibhokhan Pharisee, beji a miẹn ghe Jesu na zẹ nọn ha yi Ojie ọsi Ejele nọnsi Osẹnobulua mundia bhi ẹwẹ ele.—Luke 1:32, 33.

a Otuẹ ne bunbun man ọne iman-emhin ghe, ẹkẹ egbe nọnsẹmhan, la ẹkẹ ọkhọle nọnsẹmhan Agbejele nọnsi Osẹnobulua ye. Bhi ọsi ijiẹmhin, bhi United States, otuẹ natiọle Southern Baptist Convention da yọle ghe, ‘Ugbẹloghe nọnsi Osẹnobulua bhi ẹkẹ ọkhọle bi iẹnlẹn ọsi ọria, ọle hi Agbejele nọnsi Osẹnobulua.’ Sẹyẹ bhi ebe natiọle Jesus of Nazareth, nin Pope Benedict XVI gbẹn, ọle da yọle ghe “Agbejele nọnsi Osẹnobulua dẹ vae sade mhan re ọkhọle nọnsẹmhan rẹ ha ka Osẹnobulua ehọ.”