Ehe. Ranmhude, Osẹnobulua guanọ nin mhan ha sikoko ga ọle. Baibo da yọle: “Bha ji mhan ha mhọn aria-ji-egbe, nin mhan da ha lu emhin nọn ha re imhan ha mhọn ahoẹmhọn-egbe yẹ lu iwẹnna esili, nin mhan hẹi ha gbẹdẹ bhi usikoko nesẹmhan.”—Hebrews 10:24, 25.

 Jesu bhọ da yọle ghe edibo nesọle dẹ ha ga kugbe. Ọle da yọle: “Ọnan ẹbho rebhe ha rẹ lẹn ghe edibo nesẹmhẹn bha khin, sade bha mhọn ahoẹmhọn-egbe da egbe.” (John 13:35) Uwedẹ ọkpa nin edibo nesọle ha rẹ re ọne oyẹẹ man egbe, ọle hi sade ele ko ga kugbe. Ele ki ha mhọn agbotu kẹkẹ ne si egbe koko ga Osẹnobulua. (1 Corinthians 16:19) Bhiriọ, eji ele hi rẹ ha ye bhi otọ agbọn nan rebhe, ẹbho ne ribhi ene agbotu nan kẹkẹ ki ha yi ibhio.—1 Peter 2:17.

Ebe khẹke nin mhan lẹn aharẹmiẹn mhan mhọn oga nin mhan ye

 Arẹmiẹn Osẹnobulua guanọ nin mhan ha si egbe koko ga ọle, ọ iyi ọnin hi emhin nọn lu uhọnmhọn-emhin nẹ. Ahamiẹn mhan guanọ nin Osẹnobulua miẹn oga nọnsẹmhan ọbhi egbe, ọkhẹke nin uwedẹ iẹnlẹn nọnsẹmhan rẹman ghe, Osẹnobulua mhan ga. Bhi ọsi ijiẹmhin, Baibo da yọle: “Oga nọn khiale, nọn bha ditọan bhi ẹlo nọnsi Osẹnobulua nin Aba mhan hi: nan rẹ ha gbẹloghe ene imhọn aba bi ene imhọn ọdọ bhi ẹghe edọnmhẹn nọnsele, bi nan rẹ ha dọnmhegbe nin ọne agbọn nan hẹi re itọn mhan bhi egbe.”— James 1:27.