Ijanlẹn ọkpa, ọle a da tẹmhọn emhin nan gbẹnẹn la drọ ọbhi egbe bhi ẹkẹ Baibo. Eji a da tẹmhọn ọlẹn hi Leviticus 19:28. Bhi enin, Osẹnobulua da yọle ghe, nin mhan hẹi ha gbẹnẹn emhin ọbhi egbe. Osẹnobulua da gbe ọne uhi nin ibhokhan Izrẹl, beji ele ha da dikẹ bhi ẹwẹ ẹbho ne nẹga ele ne wo ha gbẹnẹn emhin kẹkẹ la elin osẹ nọnsele ọbhi egbe. (Deuteronomy 14:2) Arẹmiẹn ghe Kristiẹn ẹlẹnan iyẹ re obọ rẹkhan uhi nin Osẹnobulua na bhi obọ Mozis gbe, ọ yẹ khẹke nin ele ria eria nyan emhin nin Osẹnobulua guanọ bhi obọ ẹbho ne ga ọle.

Ọ be khẹke nin Kristiẹn ha gbẹnẹn la ha drọ emhin ọbhi egbe?

 Ene adia nan ne ribhi Baibo nan gbẹn ọbhi ọtọle dẹ rẹkpa uwẹ rẹ ria eria nyan ọne ẹmhọn nan:

•   Ọkhẹke “nin ene ikhuo . . . ha muegbe . . . ọbhi oleghe.” (1 Timothy 2:9, New American Bible) ikpea bi ikhuo, ele ọkhẹke ne re obọ rẹkhan ọne adia nan. Sokpan, ọkhẹke nin mhan ha ria eria nyan ebi uwedẹ nin mhan rẹ muegbe ha rẹ rẹso ẹbho nekẹle yẹ, ọ iyi nin mhan rẹ ha muegbe bhi uwedẹ nọn ha re ẹbho ha ghe mhan.

•   Ẹbho drọ la gbẹnẹn emhin ọbhi egbe nin ele rẹ rẹman ghe, usun ribhọ nin ele deba, la nin ele rẹ rẹman ghe, ele mhọn ọne isẹhoa rẹ noo egbe nọnsọle bhi uwedẹ nọn hi ki rẹ khin nọn yẹẹ ele. Ọrẹyiriọ, Baibo da taman Kristiẹn yọle: “Bha ha ze egbe bha re bọsi izọese nọn nyẹnlẹn, nọn khiale, nọn yẹ yẹẹ Osẹnobulua, ọnan hi oga nọn khiale nin bha re ẹwanlẹn nọnsẹbha lu.” (Romans 12:1) Ọkhẹke nin uwẹ noo ‘ẹwanlẹn nọnsẹ e’ rẹ fẹ ebezẹle nin uwe da guanọ nin uwe gbẹnẹn la drọ emhin ọbhi egbe. Ahamiẹn uwẹ ho nin uwẹ gbẹnen la drọ emhin ọbhi egbe ranmhude ghe usun ribhọ nin uwẹ deba, yere ghe, ọne emhin nin uwẹ gbẹnẹn la drọ ọbhi egbe dẹ yẹ ha ribhi egbe nọnsẹ, sade uwẹ sibhi ọne usun nin re. Sokpan, uwẹ ha gbẹlokotọ fẹghe ebezẹle nin uwẹ da ho nin uwẹ lu ọle, uwẹ ki gene lẹn ebi uwẹ ha lu yẹ.—Proverbs 4:7.

•   “Emhanmhan ọsi ene wẹnna nọnsẹn kiọnlẹn nin ele. Ọkpakinọn, eria ne tua, ele kiẹn ene obọ gbe.” (Proverbs 21:5) Ẹbho ne gbẹnen la drọ emhin ọbhi egbe kẹ wo re otua lu ọle. Ẹmhọn ele iti ẹbho bhọ, sẹyẹ, ẹbho ikẹ re iwẹnna nin ele. Ọ manman wo ghan nan rẹ gbẹnẹn la drọ emhin ọbhi egbe. Sẹyẹ, ọ ilẹkhẹ nan rẹ gbo ọle sibhi egbe re. Ẹbho ne gua-otọ emhin fẹghe bi ene gbo emhin nan gbẹnẹn la drọ sibhi egbe re yọle ghe, ẹbho ne bunbun kiọya ọbhi emhin nin ele gbẹnẹn la drọ ọbhi egbe.