Ọne ukpọta natiọle “ariọkpanọ” bhi Baibo, ukpọta Greek natiọle a·naʹsta·sis ọ na vae, ọne ukpọta Greek mundia nin “nan rẹ kie kpanọ mundia, la riọre.” Ariọkpanọ hi nan rẹ riọ ọria kpanọ bhi uu kie do ha nyẹnlẹn.—1 Corinthians 15:12, 13.

 Arẹmiẹn ghe ọne ukpọta “ariọkpanọ” iribhi obọ Baibo nan re urolo ọsi Hebrew gbẹn, nin ẹbho eso tiọle Old Testament, ọne iman-emhin ribhi enin. Bhi ọsi ijiẹmhin, rẹ na obọ Hosea nin akhasẹ, Osẹnobulua da yọle: “Mẹn dẹ hinmhin ele ne sibhi idin re; Mẹn dẹ miẹn ele fan bhi obọ uu.”—Hosea 13:14; Job 14:13-15; Isaiah 26:19; Daniel 12:2, 13.

 Ijela ẹbho nan riọ kpanọ bhi uu ha da nyẹnlẹn? Eso dẹ riọ kpanọ ha khian okhun, ele ki dọ deba Jesu ha gbẹloghe bọsi ijie. (2 Corinthians 5:1; Revelation 5:9, 10) Ọnan Baibo tiọle “ariọkpanọ nin ọhẹnhẹn” bi “ariọkpanọ bhi uu nọn ha ka sunu.” Ene ọta veva nan rẹman ghe ariọkpanọ ọbhebhe dẹ ha ribhọ. (Revelation 20:6; Philippians 3:11) Ẹbho nan ha riọ kpanọ bhi ariọkpanọ nọnzeva otọ ele ha da nyẹnlẹn, usun ẹbho ne bunbun ele da ha khin.—Psalm 37:29.

 Be a ha rẹ riọ ẹbho kpanọ yẹ? Jesu, ọle Osẹnobulua ha noo rẹ riọ ẹbho ne yu kpanọ. (John 11:25) Jesu dẹ riọ ọrebhe ne ribhi idin ọsi ayere kpanọ, unan ọria nin ele ka ha khin ele ha rẹ riọ kpanọ, sẹyẹ ele dẹ ye emhin nin ele ka lẹn khẹ re. (John 5:28, 29) Egbe ẹlinmhin ẹbho nan da riọ kpanọ ha khian okhun da ha mhọnlẹn, sokpan, egbe ọsi efun nọn gbale, ọle ẹbho nan ha riọ kpanọ ne ha nyẹnlẹn bhi ọne otọ nan da ha mhọnlẹn.—Isaiah 33:24; 35:5, 6; 1 Corinthians 15:42-44, 50.

 Ẹbho nela a ha riọ kpanọ? Baibo yọle ghe “ariọkpanọ bhi uu dẹ ha ribhọ, ọsi ene khiale bi ene bha khia.” (Acts 24:15) Eria bii Noah, Sarah, bi Abraham ne ga Osẹnobulua nọnsẹn dẹ deba ene khiale nan da riọ kpanọ. (Genesis 6:9; Hebrews 11:11; James 2:21) Ẹbho ne bha re obọ rẹkhan uhi nọnsi Osẹnobulua, ranmhude ele bha miẹn isẹhoa rẹ luẹ ẹmhọn nọnsọle beji ele ha da sabọ re obọ rẹkhanlẹn deba ene bha khia nan ha riọ kpanọ.

 Ọkpakinọn, eria ọbe ne dijẹ bhi ẹkẹ emhin ebe, ne bha ka fidenọ ida riọ kpanọ. Ẹbho ne sẹnian ha yu, ọsele folo. Ele imhọn iruduba ọsi ariọkpanọ.—Matthew 23:33; Hebrews 10:26, 27

 Ẹghela ariọkpanọ bhi uu ha rẹ sunu? Baibo tale ọbhi otọ ghe ariọkpanọ ọsi eria ne da diọbhi okhun dẹ sunu bhi ẹghe nin Kristi ha rẹ vae, ọne ẹghe nan munhẹn bhi ukpe 1914. (1 Corinthians 15:21-23) Ariọkpanọ ọsi eria ne ha nyẹnlẹn bhi otọ nan dẹ sunu bhi ene Ukpe Uli Nin Jesu Kristi Ha Rẹ Gbẹloghe, bhi ẹghe nin ọne otọ nan ha rẹ kiẹn otọ ọfubhegbe.—Luke 23:43; Revelation 20:6, 12, 13.

 Bezẹle nin mhan ha da sabọ rẹọbhi ẹmhọn ariọkpanọ bhi uu? A tẹmhọn ariọkpanọ isinlin bhi Baibo, ẹlo ẹbho sẹbhi ene ariọkpanọ nan. (1 Kings 17:17-24; 2 Kings 4:32-37; 13:20, 21; Luke 7:11-17; 8:40-56; John 11:38-44; Acts 9:36-42; Acts 20:7-12; 1 Corinthians 15:3-6) Ariọkpanọ ọsi Lazarus wo manman rẹso ẹbho, ranmhude ikpẹdẹ enẹn ọ ye nin Lazarus yu beji Jesu riọ ọle kpanọ, sẹyẹ ẹlo ẹbho ne bunbun sẹbhọ. (John 11:39, 42) Eghian nesi Jesu yẹ daghe ọle, ele bhọ da mhanmhan nin ele rẹ gbe Jesu bi Lazarus a.—John 11:47, 53; 12:9-11.

 Baibo rẹman ghe Osẹnobulua muegbe nin ọle rẹ riọ ẹbho ne yu kpanọ, sẹyẹ ọle mhọn ọne ahu nin Ọle rẹ lu ọle. Emhin rebhe rẹji ọde-ọde nin ọle ha riọ kpanọ ribhi ọkhọle nọnsọle, ranmhude ọle manman mhọn ahu. (Job 37:23; Matthew 10:30; Luke 20:37, 38) Osẹnobulua dẹ sabọ riọ ene yu kpanọ, sẹyẹ ọle muegbe nin Ọle rẹ lu ọle! Bhi ẹmhọn ariọkpanọ nọn ha sunu bhi ẹghe odalo, Baibo da tale rẹji Osẹnobulua yọle: “Ẹlo iwẹnna obọ nọnsẹ dẹ ha nyan uwẹ.”—Job 14:15.

Ebi ẹbho ta bhi ẹmhọn ariọkpanọ nọn iyi ẹmhọanta

 Ebi ẹbho ta nọn iyi ẹmhọanta: Ariọkpanọ hi nan rẹ kie ku efun bi oriọn kugbe.

 Ẹmhọanta nọn ribhọ: Baibo yọle ghe ọria ha yu, ọle iyẹ nyẹnlẹn. Emhin iribhi egbe nọnsẹmhan nọn nyẹnlẹn sade ọria yu. (Ecclesiastes 9:5,10) Bhiriọ a ha riọ ọria kpanọ bhi uu, ọ iyi oriọn bi efun a kugbe beji ọne ọria ha da sabọ ha nyẹnlẹn. Egbe ọsọgbọn Jehova kie re nin ọne ọria.

 Ebi ẹbho ta nọn iyi ẹmhọanta: A ha riọ ẹbho eso kpanọ, a ki yẹ wo jẹje dunmhun ele a.

 Ẹmhọanta nọn ribhọ: Baibo yọle “ene lu khọlọ” dẹ miẹn “uriọkpanọ ọsi ibhohiẹn.” (John 5:29) Ọkpakinọn, emhin nin ele lu beji a riọ ele kpanọ fo, ọle a ha re bhu ele ohiẹn, ọ iyi emhin nin ele lu ọkuẹsẹ ele yu. Jesu yọle ghe: Ene yu dẹ “họn uru ọsi Ọmọn nọnsi Osẹnobulua, ene kaehọ ki nyẹnlẹn.” (John 5:25) Ene ‘kaehọ, la re obọ rẹkhan emhin nan man ele le beji ele riọ kpanọ fo, a ki gbẹn elin nọnsele ọbhi “ebe ọsi iẹnlẹn.”—Revelation 20:12, 13.

 Ebi ẹbho ta nọn iyi ẹmhọanta: Egbe nin ọria rẹ yu tee ọle ha yẹ rẹ riọ kpanọ.

 Ẹmhọanta nọn ribhọ: Ọria ha yu, egbe nọnsọle dẹ le kua yẹ wea.—Ecclesiastes 3:19, 20.