Olukhọ hi, iria-eria nọn bha gba, la emhin nọn hi ki rẹ khin nin ọria lu nọn bha diẹn mun iho nọnsi Osẹnobulua. Ṣẹye ahamiẹn ọria gbobọra uhi nọnsi Osẹnobulua dọ lu emhin nọn bha gba, olukhọ yẹ nọn. (1 John 3:4; 5:17) Baibo yẹ rẹman ghe ahamiẹn ọria bha ka lu emhin nọn mhẹn nọn khẹke nin ọle lu, olukhọ yẹ nọn.—James 4:17.

 Bhi ene urolo nan ka rẹ gbẹn Baibo, ene ikpọta nan zẹdu ọle kiẹn olukhọ mundia nin ‘nan rẹ fi emhin dọn.’ Bhi ọsi ijiẹmhin, bhi ẹghe ẹdẹlẹ, usun eyokhọnlẹn ribhi otọ Izrẹl ne wo manman guẹ ebi a rẹ fi udo rẹ kọn emhin yẹ rẹ sẹbhọ ghe, ele “ida fi ọle dọn.” A ha zẹdu ọne ọta nin beji a wo rẹ gbẹn ọlẹn, ọ sabọ ha yi ele “ida lu emhin ebe.” (Judges 20:16) Bhiriọ ọria ha lu olukhọ, ọnin hi ọle fi uhi nọnsi Osẹnobulua dọn.

 Beji a miẹn Osẹnobulua man mhan, ọle ọnọn okhẹke nọn ha taman mhan ebi mhan ha lu. (Revelation 4:11) Ọle de bhu mhan ohiẹn bhi uwedẹ nin mhan rẹ nyẹnlẹn.—Romans 14:12.

A dẹ be sabọ miẹn ghe imhan bha lu emhin ebe hiehie?

 Eye. Ranmhude Baibo ji mhan lẹn ghe “Ọrebhe lu khọlọ, bhiriọ ọ bha gbe nin ele bii Osẹnobulua.” (Romans 3:23; 1 Kings 8:46; Ecclesiastes 7:20; 1 John 1:8) Bezẹle nọn da dia inian?

 Adam bi Eve nin okpea bi okhuo nin ọhẹnhẹn nin Osẹnobulua manlẹn bha ha mhọn olukhọ bhi egbe. Ọ wo gba nin ele, ranmhude arẹkhọkhọ nọnsi Osẹnobulua a rẹ man ele. (Genesis 1:27) Ọkpakinọn, ranmhude akan-ehọ nọnsele, ele da kiẹn eria olukhọ. (Genesis 3:5, 6, 17-19) Iriọ imọn nin ele biẹ ki rẹ kiẹn eria ne lu khọ. (Romans 5:12) Inian ọ gene wo khin beji David nin Ojie tale, ọle da yọle ghe ẹkẹ olukhọ a da biẹ ọle.—Psalm 51:5.

Emhin ebe eso be khọ nẹ enekẹle?

 Ehe. Bhi ọsi ijiẹmhin, Baibo yọle ghe eluemhin-ebe ikpea ne ribhi Sod′om ha khin. “Ele wo manman ha lu emhin-ebe.” (Genesis 13:13; 18:20) Fẹ emhin ea ghe ne ha sabọ rẹman ebi emhin-ebe khọ sẹ yẹ.

1.   Ebi ọ kaka sẹ yẹ. Baibo sekha nin mhan ghe nin mhan re egbe nẹ bhi emhin ebe ne kaka bọsi igboghẹ, iga-ẹbo, oyi, idayọn-gbegbe, nan rẹ ha mun ọria lu, ugbele, bi ilọnmhọn ikpẹbo. (1 Corinthians 6:9-11; Revelation 21:8) Baibo rẹman ghe ene emhin ebe nan dikẹ bhi emhin ebe nin ọria bha man tan ẹlo a lu, bhi ọsi ijiẹmhin, ọta la emhin nin ọria lu nọn ba ọria ọbhebhe bhi egbe. (Proverbs 12:18; Ephesians 4:31, 32) Ọrẹyiriọ, Baibo ji mhan lẹn ghe nin mhan hẹi ha re ẹlo gbe emhin ebe soso a, ranmhude ọ dẹ sabọ re imhan lu emhin ebe ne manman kaka.—Matthew 5:27, 28.

2.   Ebi re ọria luọle. Ẹbho lu emhin ebe eso ranmhude ele bha lẹn ẹlo nin Osẹnobulua rẹ ghe ọle. (Acts 17:30; 1 Timothy 1:13) Baibo rẹman ghe ene emhin ebe nan dikẹ bhi emhin ebe nin ọria taan ẹlo a lu. Sokpan, ọnan bha rẹman ghe Osẹnobulua re obọ ọbhi emhin ebe nin eria lu ranmhude ele bha lẹn uhi nọnsọle. (Numbers 15:30, 31) Ọria nọn mhọn ọkhọle nọn imhẹn, ọle taan ẹlo a gbobọra uhi nọnsi Osẹnobulua.—Jeremiah 16:12.

3.   Eka igba nin ọria lu emhin ebe. Baibo rẹman ghe ikẹkẹ ribhi emhin ebe nin ọria lu osukpa, bi emhin ebe nin ọria wo ha lu ẹghe rebhe. (1 John 3:4-8) Ẹbho ne wo taan ẹlo a ha lu emhin ebe arẹmiẹn ele lẹn emhin nọn mhẹn nọn khẹke nin ele lu, Osẹnobulua dẹ manman bhu ele ohiẹn.—Hebrews 10:26, 27.

 Emhin ebe nọn kaka nin eria lu sabọ rẹ re egbe lọ ele. Bhi ọsi ijiẹmhin, David nin Ojie da gbẹn yọle: “Emhin ebe nesẹmhẹn vuọn mẹn uhọnmhọn; bọsi udede ihẹ, ele kpọnọ gbe nin mẹn.” (Psalm 38:4) Ọrẹyiriọ, Baibo re ọne ikoudure nan nin mhan. Ọ yọle: “Ji ọria ọbe re obọ sibhi emhin ebe re; ọria nọn imhẹn ha yẹ ne iria-eria ne imhẹn sibhi ọkhọle re; ji ọle fikie bu iJehova, Ọle ki mhọn itohan da ọle. Ji ọle fikie bu Osẹnobulua nọnsẹmhan, Ọle ki re ọkhọle rebhe rẹhunmhan ọlẹn.”—Isaiah 55:7.