Be Hi Imianmẹn?
Ewanniẹn nin Baibo re ọbhọ
Imianmẹn mundia nin nan rẹ gbe ọria ruẹ bhi amẹn yẹ mun ọlẹn sibhọ re. a Ọnan zẹle nin Jesu da dọ mianmẹn bhi ẹdẹ. (Matthew 3:13, 16) Sẹyẹ, ẹghe nin obhokhan Ethiopia ọkpa rẹ sẹbhi egbe ẹdẹ, ọle da yọle ọle dẹ mianmẹn.—Acts 8:36-40.
Ebi a re imianmẹn ta
Baibo yọle inian imianmẹn diabe ghe a re ọria tọ. (Romans 6:4; Colossians 2:12) Ọria ha mianmẹn, ọle re ọnin rẹman ghe ọle yu bhi uwedẹ nin ọle ka rẹ ha nyẹnlẹn khẹ, ejayenan nian, ọle munhẹn ha nyẹn iẹnlẹn nọn khẹke edibo nesi Jesu ne re egbe guẹ nin Osẹnobulua. Jehova rẹkpa mhan rẹ sabọ ha mhọn ọkhọle nọn khiale sade mhan mhọn urẹọbhọ da izọese nọnsi Jesu. Nin ọnan rẹ sabọ sunu, ọkhẹke nin ọria lu emhin eso beji ọle ha da sẹ ọria nọn ha mianmẹn, ẹghenin ọle ki mianmẹn. (1 Peter 3:21) Ọnan zẹle nin Jesu da man edibo nesọle ghe ọkhẹke nin ele mianmẹn.—Matthew 28:19, 20.
Imianmẹn be kpe olukhọ ọsi ọria kie?
Eye. Baibo yọle ghe izọese nọnsi Jesu ọkpa ha sabọ kpe mhan khia bhi olukhọ. (Romans 5:8, 9; 1 John 1:7) Nin ọria rẹ sabọ miẹn elele bhi izọese nọnsi Jesu, ọkhẹke nin ọle ha mhọn urẹọbhọ da Ọle, fi uwedẹ nin ọle rẹ nyẹnlẹn denọ, yẹ ha re obọ rẹkhan iman-emhin nesọle, bhiriọ ọle ki mianmẹn.—Acts 2:38; 3:19.
Baibo be re obọ bhọ nan rẹ ha re imobọ mianmẹn?
Eye, Baibo bha re obọ bhọ. Emhin nọn dia inian iribhi Baibo. Otuẹ eso lu iluemhin nin ele da re amẹn nin ọmobọ (Ele ki khakha amẹn la gba amẹn ọne ọmọn bhi uhọnmhọn) yẹ hẹ ọle elin.
Ẹbho ne wanre ne ha sabọ lẹn otọ ẹmhọn Agbejele nọnsi Osẹnobulua yẹ rẹọbhọ, ele imianmẹn khẹke. (Acts 8:12) Ọkuẹsẹ ọria mianmẹn, ọkhẹke nin ọle ka luẹ ẹmhọn Osẹnobulua, miẹn ọlẹn ọbhi egbe yẹ fidenọ. Ọmobọ ida sabọ lu enan soso. Acts 2:22, 38, 41.
Rẹ deba ọnin, Baibo yọle ghe inian Jehova ghe imọn ọsi ene ga ọle bii eria ne khiale ranmhude ene biẹ ele ga nọnsẹn. (1 Corinthians 7:14) Sade imianmẹn khẹke imobọ nọn, Jehova irẹ ha ghe ele bii eria ne khiale ranmhude iluemhin nọnsẹn ọsi ene biẹ ele. b
Ebi ẹbho ta nọn iyi ẹmhọanta bhi ẹmhọn imianmẹn ọsi kristiẹn
Ebi ẹbho ta nọn iyi ẹmhọanta: A ha khakha amẹn nyan ọria, uwedẹ ọbhebhe nọn nan rẹ mianmẹn, aharẹmiẹn a bha gbe ọne ọria ruẹ bhi amẹn.
Ẹmhọanta nọn ribhọ: Ọrebhe ne mianmẹn nan tẹmhọnlẹn bhi Baibo, a gbe ele ruẹ bhi amẹn. Bhi ọsi ijiẹmhin ẹghe nin Philip nin odibo rẹ re ọne okpea nọn na bhi Ethiopia vae mianmẹn, ele “da diọbhi eji amẹn ye”, bhi enin Philip da gbe ọle ruẹ bhi amẹn. Ele ki lu ọle fo, ele da sibhi ẹkẹ ọne amẹn re.—Acts 8:36-39. c
Ebi ẹbho ta nọn iyi ẹmhọanta: Baibo rẹman ghe ẹghe nin ọrebhe bhi azagba-uwa ọkpa mianmẹn, imobọ ribhi ẹwẹ ele. Bhi ọsi ijiẹmhin, rẹji okpea ọkpa bhi philippi nọn ha gbẹloghe ighan, Baibo da yọle: “Ọle bi azagba-uwa nọnsọle da mianmẹn.”—Acts 16:31-34.
Ẹmhọanta nọn ribhọ: Baibo rẹman ghe ọrebhe ne mianmẹn bhi azagba-uwa ọsi ọne okpea nọn gbẹloghe ighan lẹn “ọta nọnsi Jehova”, sẹyẹ ele da “manman ha ghọnghọn.” (Acts 16:32, 34) Ọnan rẹkpa mhan rẹ lẹn ghe, ọmobọ soso bhi azagba-uwa ọsi ọne okpea nọn gbẹloghe ighan bha deba ene mianmẹn, ranmhude ele bha lẹn otọ ẹmhọn nọnsi Jehova.
Ebi ẹbho ta nọn iyi ẹmhọanta: Jesu re obọ bhọ nin imobọ rẹ ha mianmẹn nin ọle rẹ yọle ghe, ibhokhan Agbejele nọnsi Osẹnobulua khẹke.—Matthew 19:13-15; Mark 10:13-16.
Ẹmhọanta nọn ribhọ: Ọ iyi imianmẹn Jesu ha tẹmhọnlẹn beji ọle ta ọne ẹmhọn nin. Sokpan ebi Jesu ha ta hi nin mhan rẹ sabọ nabhi Agbejele nọnsi Osẹnobulua, ọkhẹke nin mhan diabe ibhokhan. Nin mhan ha mhọn ẹkẹ-omẹnhiẹn, yẹ ha mhọn idegbere beji a ha da sabọ ha man mhan emhin.—Matthew 18:4; Luke 18:16, 17.
a Ebi a rẹ ọne ukpọta Greek nan zedu ọle diọbhi imianmẹn ta hi, “nan rẹ gbe emhin ruẹ.” Fẹ ọne ebe natiọle Theological Dictionary of the New Testament, Volume I ghe, apapale 529.
b Beji ọne ebe natiọle The International Standard Bible Encyclopedia tale, ‘Ije soso iribhi obọ Baibo nan re urolo Greek gbẹn nọn re obọ bhọ nan rẹ ha re imobọ mianmẹn.’ Ọne ebe da yẹ yọle ghe, uwedẹ nọn bha gba nin ẹbho rẹ ha ghe imianmẹn, ghe ọ dẹ sabọ kpe emhin ebe kua, ọle zẹle nin ẹbho da munhẹn ha re imobọ mianmẹn.—Volume 1, apapale 416-417.
c Bhi uhọnmhọn-ọta nọn yọle “Baptism (in the Bible),” ọne ebe natiọle New Catholic Encyclopedia da yọle: “Ọ wo khia bhi ẹlo ghe, ẹghe nin otuẹ la rẹ munhẹn, a gbẹ ẹbho ruẹ bhi amẹn sade ele mianmẹn.”—Volume 2, apapale 59.
Emhin Ebhebhe Ne Ha Yẹ Ti Uwẹ Bhọ
EWANNIẸN ỌSI INỌNTA NE RẸTẸ IBAIBO
Oga Rebhe Osẹnobulua Be Miẹn Ọbhi Egbe?
Emhin eva nin Baibo tẹmhọnlẹn dẹ rẹkpa mhan rẹ lẹn ọne ewanniẹn.
ESSENTIAL BIBLE TEACHINGS
Oga Rebhe Osẹnobulua Be Miẹn Ọbhi egbe
Ẹbho ne bunbun riale ghe, oga nọn hi ki rẹ khin nin ele da ga iye emhin soso