Osẹnobulua zẹ ikpeta ẹbho bhi ẹwẹ ẹbho ne ga ọle ne ha nyẹnlẹn bhi okhun. Ele ha yu, a ki riọ ele kpanọ ha khian okhun. (1 Peter 1:3, 4) Ahamiẹn a zẹ ene ẹbho nan, ọkhẹke nin ele sẹyẹ wo ha nyẹnlẹn nọnsẹn, yẹ ha ziẹn urẹọbhọ nọnsele, beji a ha da miẹn ghe ele bha dọ lu emhin nọn ha re ele mun ọne isẹhoa nin ele mhọn fia.—Ephesians 5:5; Philippians 3:12-14.

Be bhọ ene khian okhun ha dọ lu bhi enin?

 Ele dẹ deba Jesu gbẹloghe bọsi ijie bhi ikpe 1,000. (Revelation 5:9, 10; 20:6) Ele hi ọne “okhun ọsọgbọn” la ugbẹloghe nọn ribhi okhun nọn ha gbẹloghe ọne “otọ ọsọgbọn.” Ele dẹ deba Jesu re ọne otọ nan ọi nọnsẹn, yẹ rẹ emhin rebhe kiẹn ọsọgbọn beji Osẹnobulua ka rẹ mhanmhanlẹn tee.—Isaiah 65:17; 2 Peter 3:13.

Eka ẹbho a ha riọ kpanọ ha khian okhun?

 Baibo rẹman ghe itue 144,000 ọle a ha riọ kpanọ ha khian okhun. (Revelation 7:4) Bhi imianlo nan tẹmhọnlẹn bhi Revelation 14:1-3, John nin odibo da daghe ọle ghe “ọne Ohuan mundia bhi Uke Oke ọsi Ziọn, ọle bi itue 144,000.” Ọne “Ohuan” nan tẹmhọnlẹn bhi ọne imianlo nan mundia nin Jesu Kristi nan riọ kpanọ bhi uu. (John 1:29; 1 Peter 1:19) “Oke ọsi Ziọn” mundia nin ihe nọn khua nin Jesu bi itue 144,000 ne ha deba ọle gbẹloghe bhi okhun ye.—Psalm 2:6; Hebrews 12:22.

 Baibo tie ẹbho nan zẹle ne ha deba Jesu gbẹloghe bhi ọne Ejele “usun ihuan nọn bha bun.” (Revelation 17:14; Luke 12:32) Ọnan rẹman ghe ele ida zẹwẹ bun hiehie sade a re ele khọkhọ ihuan nekẹle nesi Jesu.—John 10:16.

Ebi ẹbho ta nọn iyi ẹmhọanta bhi ẹmhọn ẹbho ne khian okhun

 Ebi ẹbho ta nọn iyi ẹmhọanta: Ọne nọmba 144,000 nan tẹmhọnlẹn bhi ebe ọsi Revelation, emhin a re ọle khọkhọ, ọ iwo yi beji ọ gene khin.

 Ẹmhọanta nọn ribhọ: Arẹmiẹn ghe a re nọmba eso ne ribhi ebe ọsi Revelation rẹ khọkhọ emhin, eso yẹ ribhọ nan bha rẹ khọkhọ emhin. Bhi ọsi ijiẹmhin, ọ tẹmhọn elin 12 ọsi ene etuegbe 12 ọsi ọne ohuan. (Revelation 21:14) Mhan fẹ emhin ne rẹ mhan rẹọbhọ ghe a bha re ọne nọmba 144,000 rẹ khọkhọ emhin soso.

 Revelation 7:4 tẹmhọn ‘ẹbho nan re iyaman nan [la, nan zẹ ne ha diọbhi okhun], itue 144,000.’ Ọne uhọnmhọnlẹn nan da yẹ tẹmhọn usun ọbhebhe nọn yi “usun ẹbho ne bunbun nin ọria soso bha sabọ ka.” Ene “usun ẹbho” nan dẹ yẹ miẹn umiẹnfan bhi obọ Osẹnobulua. (Revelation 7:9, 10) Ahamiẹn ghe emhin a re ọne nọmba 144,000 rẹ khọkhọ, la usun ẹbho ne bunbun a re ọle tẹmhọnlẹn, a ida yẹ lẹn ebi ene usun veva rẹ dikẹ yẹ. a

 Rẹ deba ọnin, Baibo yọle ene itue 144,000, “ẹwẹ eria a da dẹ ele, bọsi emhin-ekọnọn ọhẹnhẹn.” (Revelation 14:4) Ọne ukpọta “emhin-ekọnọn ọhẹnhẹn” mundia nin ikpeta ẹbho nan zẹle. Ẹbho ne ha deba Jesu bhi okhun gbẹloghe usun eria nan ida sabọ ka ne ha nyẹnlẹn bhi ọne otọ nan, ọle a re ọle tẹmhọnlẹn.—Revelation 5:10.