Eje Rebhe Osẹnobulua Be Ye?
Ewanniẹn nin Baibo re ọbhọ
Osẹnobulua sabọ daghe emhin rebhe. Ọle yẹ sabọ lu emhin bhi eji ọ ki rẹ khin nọn ghọn ọlẹn. (Proverbs 15:3; Hebrews 4:13) Ọrẹyiriọ, Baibo bha yọle ghe eje rebhe Osẹnobulua ye. Bhi obọ nọnkẹle, Baibo da rẹman ghe Osẹnobulua mhọn eji ọle dia.
Ebi Osẹnobulua diayẹ: Ẹlinmhin Osẹnobulua khin. (John 4:24) Imhan nin eria isabọ daghe ọle. (John 1:18) Imianlo ne bunbun nan gbẹn ọbhi Baibo rẹji Osẹnobulua da rẹman ghe Osẹnobulua mhọn eji ọle dia. Eje soso iribhọ nin Baibo da yọle ghe eje rebhe Osẹnobulua ye.—Isaiah 6:1, 2; Revelation 4:2, 3, 8.
Eji Osẹnobulua dia i: Baibo taman mhan ghe okhun ẹlinmhin ọle Osẹnobulua dia i. (1 Kings 8:30) Ọnan rẹman ghe ọ iyi ọne agbọn nan nin mhan da nyẹnlẹn Osẹnobulua ye. Baibo da tẹmhọn ẹghe ọkpa nin ẹhi nesi Jehova a rẹ vae bhi eji ọle ye dọ mundia bhi odalo ọle. Ọnan da rẹman ghe Osẹnobulua mhọn eji ọle dia i.—Job 1:6.
Ahamiẹn Osẹnobulua iribhi eje rebhe, ọle dẹ be sabọ ha rẹkpa mẹn?
Ehe. Ẹmhọn ọdeọde bhi ẹwẹ mhan wo manman rẹtẹ Osẹnobulua. Arẹmiẹn ghe okhun ẹlinmhin ọle da nyẹnlẹn, ọle daghe ẹbho ne ribhi ọne otọ nan, ne dọnmhegbe nin ele rẹ lu emhin ne yẹẹ ọle. Ọle yẹ wo rẹkpa ele. (1 Kings 8:39; 2 Chronicles 16:9) Ji mhan tẹmhọn uwedẹ eso nin ọle rẹ rẹkpa ẹbho ne ga ọle:
Sade uwẹ nan erọnmhọn ji ọle: Jehova dẹ sabọ họn erọnmhọn nọnsẹ bhi ẹghe nin uwẹ rẹ nan ọlẹn tee.—2 Chronicles 18:31.
Sade egbe iẹnlẹn lọ uwẹ: “Jehova sikẹ ẹbho nin udu nọnsele wanọ a; Ẹbho nin emhin gbe ele ahu sotọ, ọle miẹn ele fan.”—Psalm 34:18.
Sade uwẹ guanọ adia: Jehova “dẹ rẹkpa ẹ ha mhọn ilẹn-otọ-emhin, yẹ dia ẹ ọbhi uwedẹ nọn khẹke nin uwẹ ha rẹkhan.” Ọle dẹ re ọta nọnsọle nọn ribhi Baibo rẹ dia uwẹ.—Psalm 32:8.
Ẹmhọn nọn bha gba nin ẹbho ta rẹji eji Osẹnobulua ye
Ohoghe: Osẹnobulua ribhi ẹkẹ emhin rebhe nin ọle man.
Ẹmhọanta: Ọ iyi ọne agbọn nan Osẹnobulua da nyẹnlẹn. (1 Kings 8:27) Ẹmhọanta nọn ghe ene ahiẹnhiẹn bi emhin nekẹle nin Osẹnobulua manlẹn “wewe uyi nọnsi Osẹnobulua.” (Psalm 19:1) Ọrẹyiriọ, Osẹnobulua inyẹnlẹn bhi ẹkẹ emhin nin ọle man. Bhi ọsi ijiẹmhin, ọria nọn drọ emhin inyẹnlẹn bhi ẹkẹ emhin nin ọle drọ. Ọkpakinọn, emhin nin ọle drọ dẹ sabọ rẹman mhan unan ọria nin ọle khin. Iriọ emhin nin Osẹnobulua manlẹn yẹ rẹ rẹkpa mhan rẹ lẹn ikpẹ esili nesọle, ikpẹ bọsi ewanlẹn, oyẹẹ, bi ahu nin ọle mhọnlẹn.—Romans 1:20.
Ohoghe: Ọkuẹsẹ Osẹnobulua sabọ lẹn emhin rebhe yẹ ha yi Osẹnobulua nọn mhọn ahu nẹ, ọ dẹ khẹke nin ọle ha ribhi ije rebhe.
Ẹmhọanta: Ẹlinmhin nọn khiale nọnsi Osẹnobulua, ọle hi ahu nin ọle rẹ lu emhin. Ọle dẹ sabọ re ọne ahu nan rẹ lẹn emhin nọn ki rẹ ha khin, yẹ lu emhin nọn ki rẹ ha khin, bhi eji ọ ki rẹ ha khin. Ọ bha khẹke nin ọle kpanọ ha khian eji ọne emhin da sunu, ọle kuẹ lẹn ebe sunu bhi enin.—Psalm 139:7.
Ohoghe: Ẹmhọn nin Psalm 139:8 tale rẹman ghe eje rebhe Osẹnobulua ye. Enin da yọle: “Aharẹmiẹn mẹn kpanọ ha khian okhun, uwẹ dẹ ha ribhi enin, Sẹyẹ, aharẹmiẹn mẹn dọ wa ukhuo nọnsẹmhẹn bhi Idin, ghọle! uwẹ dẹ yẹ ha ribhi enin.”
Ẹmhọanta: Ọ iyi eji Osẹnobulua ye ọne iBaibo nan tẹmhọn ọlẹn. Ebi ọne Baibo ta hi ghe, Osẹnobulua dẹ sabọ rẹkpa mhan bhi eji ọ ki rẹ khin nin mhan ye.
a Beji Baibo rẹman, Jehova hi elin nọnsi Osẹnobulua.
Emhin Ebhebhe Ne Ha Yẹ Ti Uwẹ Bhọ
EWANNIẸN ỌSI INỌNTA NE RẸTẸ IBAIBO
Be Bhọ Hi Ẹlinmhin Nọn Khiale
Emhin zẹle nin Baibo da tie elinmhin nọn khiale nọnsi Osẹnobulua “obọ” nọnsọle.
ẸMHỌN MHAN
Gbẹn Ebe Re Nin Esali Jehova Dọ Ha Man Uwẹ iBaibo
Deba Esali Jehova zilo bhi Baibo la uwẹ ha noo emhanmhan nọn ribhi jw.org nin ọria rẹ tobọle man egbe ọle Baibo.