Eye. Baibo taman mhan ghe Osẹnobulua man eria bi unan elanmhẹn kẹkẹ bi eran rebhe ne ribhi ọne agbọn nan. a (Genesis 1:12, 21, 25, 27; Revelation 4:11) Baibo da yẹ taman mhan ghe, bhi obọ Adam bi Eve nin okpea bi okhuo nin ọhẹnhẹn, ọle ẹbho rebhe ne ribhi ọne agbọn nan na vae. (Genesis 3:20; 4:1) Baibo bha re obọ bhi ọne iman-emhin ghe Osẹnobulua man emhin ne nyẹnlẹn ne fẹkẹ ha fi egbe denọ kiẹn emhin ebhebhe. Ọrẹyiriọ, Baibo bha yọle ghe a imiẹn agba kẹkẹ bhi emhin ne nyẹnlẹn beji ekhen azemhinre tale.

•  Be ẹbho eso rẹọ i?

•  Baibo be re obọ ba ọne iman-emhin ghe emhin ne nyẹnlẹn fẹkẹ fi egbe denọ kiẹn emhin ebhebhe?

•  Uwedẹ nin emhin ne nyẹnlẹn rẹ sabọ guẹ eji ele da nyẹnlẹn be rẹman ghe ẹmhọanta ọne iman-emhin khin?

 Ẹbho ne rẹọbhọ ghe Osẹnobulua man emhin ne nyẹnlẹn ne fẹkẹ ha fidenọ bhọ bha rẹọ bhi emhin ọkpa. Uwedẹ kẹkẹ ele riale ghe Osẹnobulua rẹ lu ọle. Beji ebe natiọle Encyclopædia Britannica tale, eso rẹọbhọ ghe uwedẹ nin elanmhẹn la eran rẹ sabọ guẹ eji ele dia, nin ele da sabọ miuhọnmhọn yẹ biẹ imọn, ọle hi uwedẹ nin Osẹnobulua rẹ mhanmhan ọlẹn nin emhin ne nyẹnlẹn sabọ ha fi egbe denọ.

 Emhin eso ebhebhe nin ele yẹ rẹọ hi:

•   Bhi obọ emhin ne ka nyẹnlẹn khẹ bhi ẹghe nọn gbera, ọle emhin rebhe ne nyẹnlẹn ẹlẹnan da zegbere.

•   Unan elanmhẹn la eran ọkpa dẹ wo sabọ fi egbe denọ kiẹn unan emhin ọbhebhe.

•   Osẹnobulua mhanmhan ọlẹn nin emhin re iriọ ha fi egbe denọ.

 Ẹbho ne rẹọ bhi ọne iman-emhin nan bha rẹọbhọ ghe ebi Baibo tale rẹji ebi Osẹnobulua rẹ man ọne agbọn nan yẹ gbale. Sokpan, Jesu rẹman ghe ebi ebe nọnsi Genesis tale rẹji ebi Osẹnobulua rẹ man ọne agbọn nan yẹ wo gba. (Genesis 1:26, 27; 2:18-24; Matthew 19:4-6) Baibo rẹman ghe okhun iJesu ka ha ye ọkuẹsẹ ọle vae bhi ọne otọ nan. Ọle deba Osẹnobulua man “emhin rebhe” bhi ọne agbọn nan. (John 1:3) Bhiriọ, Baibo bha re obọ ba ọne iman-emhin ghe emhin ne nyẹnlẹn fẹkẹ fi egbe denọ kiẹn emhin ebhebhe.

 Baibo bha taman mhan eka agba emhin nan ha sabọ miẹn bhi unan emhin ọkpa. Ọ bha yẹ yọle ghe beji ene unan elanmhẹn kẹkẹ bi eran kẹkẹ ha rẹ ha biẹ yẹ guẹ eji ele dia i, agba ele kẹkẹ ida sabọ zegbere. Aharẹmiẹn iriọ, ọ iyi elanmhẹn ọgbọn la eran ọgbọn zegbere. Agba ọne a ka miẹn khẹ gheghe nọn.