Eye. Baibo bha yọle ghe emhin ebe igho khin, la ghe igho si emhin ebe rebhe. Ẹbho eso yọle ghe Baibo yọle ‘igho, ọle si emhin ebe rebhe re.’ Sokpan, ọ iyi iriọ Baibo tale. Ebi Baibo tale hi ‘ahoẹmhọn igho, ọle si emhin ebe rebhe re.’ a—1 Timothy 6:10, King James Version.

•  Be Baibo tale rẹji ẹmhọn igho?

•  Bezẹle nin Baibo da sekha nin mhan rẹji nan rẹ ha hoẹmhọn igho?

•  Elele nela mhan ha miẹn bhọ sade mhan re obọ rẹkhan adia ne ribhi Baibo rẹji ẹmhọn igho?

•  Ulọnlẹn kẹkẹ bhi Baibo ne zilo nyan ẹmhọn igho

 Baibo rẹman ghe igho dẹ sabọ rẹkpa sade a re ẹwanlẹn noo ọle, sẹyẹ, ọ dẹ sabọ “gbega ọria.” (Ecclesiastes 7:12) Baibo yẹ wo gẹn ẹbho ne re ọkhọle rebhe zẹ emhin bhi obọ rẹ rẹkpa ẹbho, asabọmiẹn igho deba bhi emhin nin ele rẹ re iyobọ nin ẹbho.—Proverbs 11:25.

 Ọrẹyiriọ, Baibo sekha nin mhan ghe nin mhan hẹi mun ẹmhọn igho kalo bhi iẹnlẹn nọnsẹmhan. Ọ yọle: “Bha hẹi re iẹnlẹn nọnsẹbha rẹ hoẹmhọn igho. Ji emhin nin bha mhọn khọn bha.” (Hebrews 13:5) Ọne ulọnlẹn nan rẹkpa mhan rẹ lẹn ghe, nin mhan re ẹwanlẹn ha noo igho, ọ bha khẹke nin mhan ha mun ọlẹn kalo bhi iẹnlẹn nọnsẹmhan yẹ ha khu ọbhọ. Mhan da ha mhọn emhin ne khẹke, emhin bii ebale, ukpọn la uwa, ọ khẹke nin mhan ji ele khọn mhan.—1 Timothy 6:8.

 Ẹbho ne mhọn ẹlobhiamhin ida miẹn iẹnlẹn ọsi ighegheghe. (Ephesians 5:5) Emhin ọkpa nọn zẹle nin ẹlobhiamhin da yi emhin ebe hi, ọ deba bhi emhin eso ne yẹ yi iga-ẹbọ. (Colossians 3:5) Emhin nọnzeva hi, ranmhude ẹbho ne mhọn ẹlobhiamhin ho nin emhin nin ele guanọ sẹ ele obọ, ele sabọ rẹ gbobọra uhi nọnsi Osẹnobulua. Proverbs 28:20 yọle “ọria nọn guanọ nin ọle re ẹjẹje fe, emhin ebe dẹ ha ri ọle bhi obọ.” Asabọmiẹn ọle bhọ dẹ lu emhin ebe kẹkẹ bii nan rẹ mun ọria lu, nan rẹ gbe ọria miẹn ọlẹn igho, nan rẹ do ọria mun, la nan rẹ gbe ugbele.

 Aharẹmiẹn mhan bha lu emhin ebe ne sẹnian, mhan dẹ yẹ sabọ miẹn ikuan-egbe ebhebhe sade mhan manman họẹmhọn igho. Baibo yọle ghe “eria ne ho nin ele fe, ele de ọbhi edọnmhẹn, bi ufi, bi emhin uhuki ne bunbun.”—1 Timothy 6:9.

 Ahamiẹn ghe mhan bha ranmhude ẹmhọn igho gbobọra uhi nọnsi Osẹnobulua, la dọ ha lu emhin ne bha gba, Osẹnobulua ki re ẹlo esili ha ghe mhan, ọle ki yẹ rẹkpa mhan. Sẹyẹ, mhan ki ha mhọn ekpẹn bhi egbe. Rẹji ọrebhe ne dọnmhegbe rẹ re ọkhọle rebhe rẹ ha lu ebe ti Osẹnobulua bhọ, ọle da ve nin ele yọle: “Imẹn ida zẹ uwẹ obọ ghee, imẹn ida yẹ fikeke gbe ẹ.” (Hebrews 13:5, 6) Ọle da yẹ yọle “okpea nọn lu emhin bhi uwedẹ nọn diale dẹ miẹn erọnmhọn ne bunbun.”—Proverbs 28:20.