Izọese nọnsi Jesu ọle Osẹnobulua noo rẹ hinmhin eria bhi obọ olukhọ bi uu. Baibo yọle ghe, inian aranlẹn nin Jesu gbe kua nin mhan diabe osa nan hale rẹ dẹ emhin kiere. (Ephesians 1:7; 1 Peter 1:18, 19) Bhi ọsi ẹmhọanta Jesu yọle ghe, ọle vae nin ọle “dọ re iẹnlẹn nọnsọle rẹ dẹ ene bunbun kiere.”—Matthew 20:28, King James Version.

Bezẹle nọn da khẹke nan zọese mhan?

 Beji Osẹnobulua man Adam nin okpea nin ọhẹnhẹn, egbe nọn gba ọle re nanlẹn. Ọle bha ha mhọn emhin ebe bhi egbe. Ọle wo ha mhọn ọne isẹhoa nin ọle rẹ nyẹnlẹn bhi ighegheghe, sokpan, ọle da mun ọne isẹoha fia ranmhude akan-ehọ nọnsọle. (Genesis 3:17-19) Ọle ki biẹ imọn, ene imọn da le emhin ebe bhi uku. (Romans 5:12) Ranmhude ọnan, Baibo da yọle ghe, Adam “khiẹn” egbe ọle bi imọn nesọle nin olukhọ bi uu bọsi igbọn. (Romans 7:14) Ranmhude ọ bha gba nin mhan, ọria soso iribhọ nọn ha sabọ dẹ ebi Adam mun fia kiere.—Psalm 49:7, 8.

 Osẹnobulua da mhọn itohan da ele bhi ọne idia nan nin ele ha ye. (John 3:16) Ọkpakinọn, ranmhude ibhohiẹn nọn gbale nọnsi Osẹnobulua, ọle ida wo gheghe re ẹlo gbera emhin ebe a, la wo re iriọ re emhin ebe rẹhunmhan ọria, sokpan emhin kpataki dẹ ha ribhọ ọkuẹsẹ ọle lu iriọ. (Psalm 89:14; Romans 3:23-26) Ranmhude oyẹẹ nin Osẹnobulua mhọn da eria, ọle da lu emhin kpataki rẹ re emhin ebe ọsi eria rẹ rẹhunmhan ele, yẹ gbo olukhọ nọnsele kua. (Romans 5:6-8) Izoẹse nọnsi Jesu hi ọne emhin kpataki.

Be a re ọle ta nan rẹ dẹ emhin kiere?

 Bhi Baibo, ọne ukpọta natiọle nan rẹ dẹ emhin kiere, emhin ea a noo rẹ tẹmhọnlẹn.

1.   Osa nan hale.—Numbers 3:46, 47.

2.   Nan rẹ fan emhin fia.—Exodus 21:30

3.   Ọ dẹ kpọnọ sẹbhi emhin nan ho nan re ọle dẹ kiere. a

 Mhan fẹghe ebi ene emhin ea nan rẹ diẹn mun izọese nin Jesu Kristi rẹ dẹ mhan kiere yẹ.

1.   Osa nan hale. Baibo yọle ghe a ha osa rẹ dẹ Kristiẹn kiere. (1 Corinthians 6:20; 7:23) Aranlẹn ọsi Jesu, ọle hi ọne osa nan hale. Ọne osa nan Jesu rẹ “dẹ ẹbho nin Osẹnobulua bhi ulin uwa rebhe, urolo rebhe, ẹbho rebhe, bi agbaẹbho rebhe.”—Revelation 5:8, 9.

2.   Nan rẹ fan emhin fia. Izọese nọnsi Jesu, ọle ebi a rẹ fan mhan fia bhi obọ olukhọ.—1 Corinthians 1:30; Colossians 1:14; Hebrews 9:15.

3.   Ọ dẹ kpọnọ sẹbhi emhin nan ho nan re ọle dẹ kiere. Izọese nọnsi Jesu wo kpọnọ sẹbhi emhin nin Adam mun fia. Iẹnlẹn nọn gbale Adam mun fia, iẹnlẹn nọn gbale Jesu yẹ rẹ zọese nin mhan. (1 Corinthians 15:21, 22, 45, 46) Baibo yole: “Beji ọrebhe rẹ kiẹn eria olukhọ ranmhude akan-ehọ ọsi okpea ọkpa [Adam], iriọ ọrebhe ha rẹ kiẹn eria ne khiale ranmhude ihẹnmhọn ọsi okpea ọkpa [Jesu Kristi].” (Romans 5:19) Ọnan rẹman ebi uu ọsi okpea ọkpa ha rẹ sabọ dẹ eria olukhọ ne bunbun kiere yẹ. Bhi ọsi ẹmhọanta, izọese nọn gbale ọle izọese nọnsi Jesu khin rẹji ọrebhe ne lu emhin nọn khẹke beji ele ha da sabọ miẹn elele bhi ọne izọese.—1 Timothy 2:5, 6.