Uyumhin nin Jesu yu nin mhan ọle rẹ miẹn mhan fan. (Matthew 20:28) Ọnan zẹle nin Baibo da tie Jesu ọnọn miẹn ọne agbọn nan fan. (1 John 4:14) Ọ da yẹ yọle: “Ọria ọbhebhe iribhọ nin mhan ha na bhi obọ ọle miẹn umiẹnfan, ranmhude elin ọbhebhe iribhi ẹwẹ ẹbho bhi ọne otọ nan, nọn ha sabọ re umiẹnfan nin mhan.”—Acts 4:12.

 Jesu yu nin ọrebhe ne mhọn urẹọbhọ da ọle. (Hebrews 2:9; John 3:16) Ikpẹdẹ eso ki gbera nin ọle yu, “Osẹnobulua da riọ ọle kpanọ bhi uu.” Jesu da re egbe ẹlinmhin ha khian okhun. (Acts 3:15) Ọle ki dẹ sabọ na bhi enin “hinmhin ẹbho rebhe ne na obọ ọle bu Osẹnobulua re, ranmhude, ọle dẹ wo ha ribhọ nin ọle ha bhii nin ele.”—Hebrews 7:25.

Bezẹle nin mhan da guanọ nin Jesu ha bhii nin mhan?

 Ranmhude eria olukhọ mhan rebhe khin. (Romans 3:23) Emhin ebe si mhan sibhi ibo nọnsi Osẹnobulua re, sẹyẹ ọ si uu ji mhan. (Romans 6:23) Ọkpakinọn, Jesu mundia nin ene mhọn urẹọbhọ da izọẹsẹ nọnsọle. (1 John 2:1) Ọle bhii nin ele. Ọle bhii nin Osẹnobulua kaehọ erọnmhọn nọnsele, yẹ rẹ olukhọ nọnsele rẹhunmhan ele ranmhude izọese nin ọle zẹ. (Matthew 1:21; Romans 8:34) Osẹnobulua wo kaehọ ubhimhin nọnsi Jesu ranmhude ebi ọle bhii diẹn mun iho nọnsọle. Osẹnobulua je Jesu re bhi ọne otọ nan beji ọrebhe ha da miẹn umiẹnfan bhi obọ ọle.—John 3:17.

Urẹọbhọ ọkpa ọkhẹke nin mhan ha mhọn da Jesu beji mhan ha da sabọ miẹn umiẹnfan?

 Eye. Arẹmiẹn ghe ọkhẹke nin mhan ha mhọn urẹọbhọ da Jesu mhan kuẹ sabọ miẹn umiẹnfan, emhin ọbhebhe yẹ ribhọ nọn khẹke nin mhan lu. (Acts 16:30, 31) Baibo yọle “Beji egbe nọn imhọn oriọn rẹ yu, iriọ urẹọbhọ nan bha rẹ wẹnna sẹyẹ rẹ yu.” (James 2:26) Nin mhan rẹ miẹn umiẹnfan, ọkhẹke nin mhan:

•   Luẹ ẹmhọn Jesu bi Aba ọle nin Jehova.—John 17:3.

•   Ha mhọn urẹọbhọ da ele.—John 12:44; 14:1.

•   Ha hẹnmhọn nin ele, nin mhan rẹ rẹman ghe mhan mhọn urẹọbhọ. (Luke 6:46; 1 John 2:17) Jesu yọle ghe ọ iyi ọrebhe ne tie ọle “Ebeanlẹn” ha miẹn umiẹnfan, sokpan, ene “lu iho ọsi Aba mẹn nọn ribhi okhun.”—Matthew 7:21.

•   Wo ha re urẹọbhọ nọnsẹmhan man aharẹmiẹn mhan kuẹlo da ọkakale. Jesu re ọnan man ẹghe nin ọle rẹ yọle: “Ọnọn mhọn iziẹngbe sẹbhi ọkpẹnlẹn dẹ miuhọnmhọn.”—Matthew 24:13.