Bhi eje bunbun bhi ẹkẹ iBaibo, a wo tie iJesu “Ọmọn nọnsi Osẹnobulua.” (John 1:49) Ranmhude Osẹnobulua re iẹnlẹn nin emhin ne nyẹnlẹn rebhe, rẹ sẹbhi Jesu, ọle zẹle nan da tie iJesu ọmọn nọnsọle. (Psalm 36:9; Revelation 4:11) Baibo bha yọle ghe uwedẹ nin okpea rẹ nẹkẹ ọmọn, ọle Osẹnobulua rẹ nẹkẹ iJesu.

 Baibo yẹ tie ene ẹhi imọn nesi Osẹnobulua. (Job 1:6) Baibo da yẹ tie Adam nin okpea nin ọhẹnhẹn ọmọn nọnsi Osẹnobulua. (Luke 3:38) Ọkpakinọn, Jesu hi emhin ọhẹnhẹn nin Osẹnobulua manlẹn. Sẹyẹ, Osẹnobulua tobọle re obọ nọnsọle man iJesu. Ọnan zẹle nan da tie iJesu ọmọndiọn nọnsi Osẹnobulua.

•  Jesu be ka nyẹnlẹn bhi okhun ọkuẹsẹ ọle vae bhi otọ?

•  Be iJesu ha lu bhi okhun ọkuẹsẹ ọle vae bhi ọne otọ nan?

 Ehe. Ẹlinmhin iJesu ha khin bhi okhun ọkuẹsẹ a biẹ ọle bhi ọne otọ nan. Jesu da tobọle tale ghe okhun ọle na vae.—John 6:38; 8:23.

 Jesu, ọle Osẹnobulua ka man ọkuẹsẹ ọle man emhin nekẹle rebhe. Ghe ebi Baibo tale rẹji Jesu:

•   “Ọle hi . . . ọmọndiọn bhi emhin rebhe nan manlẹn.”—Colossians 1:15.

•   Ọle hi “emhin ọhẹnhẹn nin Osẹnobulua man beji ọle munhẹn ha man emhin.”—Revelation 3:14.

 Baibo ka tale ọbhi otọ ghe ọria nin Osẹnobulua ha je re dẹ ha yi ọria nọn mọn da nyẹnlẹn. Ọne ọta akhasẹ nan da gene munsẹ bhi egbe iJesu.—Micah 5:2; Matthew 2:4-6.

 Ihe nọn khua ọle ha ye. Ọne ihe nan iJesu ha tẹmhọnlẹn ẹghe nin ọle rẹ yọle: “Aba, re uyi nin mẹn . . . , bọsi uyi nin mẹn ka deba uwẹ ha mhọn ọkuẹsẹ a man ọne agbọn nan.”—John 17:5.

 Ọle da rẹkpa Aba ọle man emhin nekẹle rebhe. Baibo rẹman ghe Jesu wẹnna rẹkhan Osẹnobulua bii ọria nọn manman guẹ iwẹnna (Proverbs 8:30) Baibo da yọle ghe, rẹ na obọ iJesu, “ọle a da man emhin nekẹle rebhe ne ribhi otọ bi okhun.”—Colossians 1:16.

 Jesu Osẹnobulua noolo rẹ man emhin nekẹle rebhe. Ọle Osẹnobulua noolo rẹ man ene ẹhi, otọ bi okhun. (Revelation 5:11) Uwedẹ nin ele veva rẹ ha wẹnna da diabe uwedẹ nin ọria nọn mhanmhan uwa nan ha bọn bi ọria nọn bọn uwa rẹ wẹnna kugbe. Ọne ọria nọn mhanmhan ọlẹn ha mhanmhan ọlẹn fo, ọne ọria nọn bọn uwa ki re ọne emhanmhan rẹ bọn ọlẹn.

 Ọle ha lu iwẹnna ọsi Ọtọtare. Ẹghe nin Baibo rẹ ha tẹmhọn iẹnlẹn nọnsi Jesu ọkuẹsẹ ọle vae bhi ọne otọ nan, Baibo da tie iJesu “ọne Ọta.” (John 1:1) Ọnan rẹman ghe iJesu Osẹnobulua ha noo rẹ wewe uhọnmhọn-uje nọnsọle man ene ẹhi nekẹle.

 Ọ diabe Osẹnobulua yẹ ha noo iJesu rẹ wewe uhọnmhọn-uje nọnsọle man eria bhi ọne otọ nan. Asabọmiẹn, Jesu Osẹnobulua ha noo rẹ ne Adam bi Eve talọ bhi ogba ọsi Eden. (Genesis 2:16, 17) Asabọ yẹ miẹn ghe ọle hi ọne ẹhi nọn ha re ibhokhan Izrẹl khian bhi ẹkẹ ojẹgbo. Osẹnobulua da yọle nin ibhokhan Izrẹl ka ọle ehọ nọnsẹn.—Exodus 23:20-23. a