Michael, nin otuẹ eso tiọle “Saint Michael,” elin nan ha tie Jesu ọkuẹsẹ ọle vae bhi ọne otọ nan, bi beji ọle kpanọ ha khian okhun fo nọn. a Michael bi Esu ko gbugan ba eku-olinmhin nọnsi Moses. Ọle yẹ rẹkpa ẹhi ọkpa rẹ sabọ wewe uhọnmhunje nọnsi Osẹnobulua man Daniel nin akhasẹ. (Daniel 10:13, 21; Jude 9) Michael wo nyẹnlẹn rẹkhan ebi a re elin nọnsọle ta, nọn yi “Họla Diabe Osẹnobulua” bhi uwẹde nin ọle rẹ mundia nin ugbẹloghe nọnsi Osẹnobulua, bi uwedẹ nin ọle rẹ khọn eghian nesi Osẹnobulua.—Daniel 12:1; Revelation 12:7.

 Mhan fẹ emhin eso ghe ne rẹ mhan yọle ghe Jesu hi Michael nin ọdiọn ene ẹhi.

•   Michael hi “ọdiọn ọsi ene ẹhi.” (Jude 9) Igba eva ọne elin ovan “ọdiọn ene ẹhi” zegbere bhi Baibo. Uwẹde nan rẹ noo ọne elin bhi ene ije veva rẹman ghe ẹhi okpa sese nyan ọne elin ovan. Ọkpa bhi ulọnlẹn nan da noo ọne elin da yọle ghe Jesu nin ebeanlẹn mhan nan riọ kpanọ bhi uu “dẹ na okhun vae, ọle dẹ re urulu ọsi ọdiọn ene ẹhi rẹ so dagbare, bi akala nọnsi Osẹnobulua.” (1 Thessalonians 4:16) Jesu mhọn “urulu ọsi ọdiọn ene ẹhi” ranmhunde ọle hi Michael nin ọdiọn ọsi ene ẹhi.

•   Michael hi ọnọn sun ene ẹhi ne ribhi okhun. “Michael bi ẹhi nesọle da nin ọne ẹkpẹn khọnlẹn,” ọnin hi Esu. (Revelation 12:7) Michael manman wo mhọn ahu bhi okhun elinmhin, Baibo tiọle ọmọn ọsi ojie nọn kpọnọ nẹ bi “ọmọn nọn khua ọsi ojie.” (Daniel 10:13, 21; 12:1) Ene elin ovan nan rẹman ghe Michael hi “ọnọn sun ene ẹhi ne ribhi okhun” beji New Testament scholar David E. Aune tale.

   Baibo yẹ tẹmhọn elin ọbhebhe ọsi ọria nọn sun ene ẹhi ne ribhi okhun. Ọne Baibo da tẹmhọn ẹghe nin “Jesu nin Ebeanlẹn mhan bi ẹhi ne khua nesọle ha rẹ na okhun mun eranlẹn vae, beji ọle ha rẹ mun ibhohiẹn bu ene bha lẹn Osẹnobulua.” (2 Thessalonians 1:7, 8; Matthew 16:27) Jesu da “diọbhi okhun, a da mun ene ẹhi bi ugbẹloghe bi ahu ọbhi odotọ ọle.” (1 Peter 3:21, 22) Ẹwanlẹn ida ha ribhọ nin Osẹnobulua rẹ re Jesu bi Michael mundia bhi ihe ọkpa nin ele ha nin egbe suan. Ọkpakinọn, emhin ẹwanlẹn nọn nin mhan rẹ yọle ghe ene elin veva, Jesu bi Michael, otuọnkpa a re ele tẹmhọnlẹn.

•   Michael “dẹ kpanọ mundia” bhi ẹghe ekpokpo nan bha sẹ ka miẹn egbe ọle khẹ. (Daniel 12:1) Bhi ebe ọsi Daniel, a ha noo ọne ọta “kpanọ mundia,” ojie nọn kpanọ mundia nin ọle rẹ lu emhin kpataki a kẹ re ọle tẹmhọnlẹn. (Daniel 11:2-4, 21) Jesu Kristi natiọle “Ọta Nọnsi Osẹnobulua” nọn yẹ yi ‘Ojie nọn nẹ ene ijie’ dẹ lu emhin kpataki nin ọle rẹ khọn eghian nesi Osẹnobulua miotọ, yẹ gbega ẹbho nesi Osẹnobulua. (Revelation 19:11-16) Ọle dẹ lu ọnan bhi ẹghe “ekpokpo nọn khua, egbuman ọlẹn nan bha sẹ ka miẹn khẹ rẹ na ẹghe nin agbọn rẹ munhẹn.”—Matthew 24:21, 42.