Baibo ji mhan lẹn ghe, iho nọnsi Osẹnobualua hi nin eria “re egbe nẹ bhi igboghẹ.” (1 Thessalonians 4:3) A ha tẹmhọn igboghe bhi ẹkẹ Baibo, ebi a re ọle ta hi, nin okpea la okhuo rẹ ha nẹ ọria nọn iyi ọdọ ọle la okhuo ọle nowẹ, nin okpea bi okpea la okhuo bi okhuo rẹ ha nẹ egbe nowẹ, la nin okpea bi okhuo nẹ bha bọ egbe rẹ ko ha nẹ egbe nowẹ.

•  Bezẹle nọn dẹ rẹtẹ Osẹnobulua si okpea bi okhuo nẹ ko nyẹnlẹn gene bọ egbe la ele bha lu iriọ?

•  Ọ bẹ khẹke nin okpea bi okhuo ko ha nyẹnlẹn kugbe nin ele rẹ fẹghe si ele dẹ gene sabọ bọ egbe?

•  Be okhuo bi ọdọ ha rẹ sabọ ziẹn ibọdọ bi ire-okhuo nọnsele yẹ?

•   Osẹnobulua hi ọnọn mun emhanmhan ọsi ibọdọ bi ire-okhuo gbọ. Ẹghe nin ọle rẹ man Adamu bi ivi nin ele ha yi okhuo bi ọdọ, ọle Osẹnobulua rẹ mun ọne emhanmhan nan gbọ. (Genesis 2:22-24) Ọle bha mhanmhanlẹn nin okpea bi okhuo ko ha nyẹnlẹn ahamiẹn ele bha bọ egbe.

•   Osẹnobulua lẹn emhin nọn ha mhẹn eria bhi egbe. Ọlẹ mhanmhanlẹn nin okpea bi okhuo ne lọnmhọn egbe rẹ ko ha ribhọ rẹ sẹbhi ighegheghe, ranmhude ọle lẹnmhin ghe, ọne emhanmhan nan dẹ sabọ gbega ọrebhe bhi ọne azagba-uwa. Bha ji mhan rẹ emhin eso rẹ re ijiẹmhin ọbhọ ghe. Beji ebe nan gbẹn rẹkhan emhin nin ọria dẹ rẹ rẹkpa ọle rẹ lẹn ebi ọle ha rẹ noo ọne emhin yẹ, iriọ Baibo nin ọta nọnsi Osẹnobulua yẹ rẹ rẹkpa mhan rẹ lẹn ebi mhan ha rẹ ha mhọn azagba-uwa nin eghọnghọn yẹ. Ẹbho ne re obọ rẹkhan adia nọnsi Osẹnobulua manman wo miẹn elele bhọ.—Isaiah 48:17, 18.

•   Ẹbho ne nin ẹbho ne iyi ọdọ ele la okhuo ele nowẹ wo manman miẹn ọbalọ bhọ. Bhi ọsi ijiẹmhin, ọne okpea sabọ rẹ mun ẹkẹ nin ọne okhuo, ele sabọ rẹ mun emianmhẹn, la ọ sabọ re ele ha ria eria ne gba ahu.

•   Osẹnobulua re isẹhoa nin okpea bi okhuo rẹ ha ne egbe nowẹ beji ele ha da sabọ biẹ imọn. Emhin nọn ghanlẹn iẹnlẹn khin bhi ẹlo nọnsi Osẹnobulua. Sẹyẹ, ẹsele nọn na obọ Osẹnobulua vae, ọle hi nin okpea bi okhuo rẹ ha ne egbe nowẹ khin. Mhan ha rẹ obọ rẹkhan ọne emhanmhan nan, ọ ki rẹman ghe, mhan mun ekpẹn nin Osẹnobulua.—Hebrews 13:4.

 Ọ iyi nin okpea bi okhuo rẹ ka ha nyẹnlẹn kugbe fo ọkuẹsẹ ele bọ egbe ha rẹ ele ha ẹghọnghọn sade ele ki bọ egbe. Sokpan, ele da ha sun rẹkhan egbe sade ele bọ egbe fo, ele ki ha ghọnghọn yẹ ko ha khọn ọnọghọ nọn hi ki rẹ khin nin ele miẹn bhi ibọdọ bi ire-okhuo nọnsele. a Bhi ọsi ẹmhọanta, okpea bi okhuo ne bọ egbe ve ive nin egbe ele, bhiriọ, ele dẹ sabọ ha sun rẹkhan egbe.—Matthew 19:6.

 Ibọdọ bi ire-okhuo nọn gba nan fo iribhọ. Ọkpakinọn, ahamiẹn okhuo bi ọdọ re obọ rẹkhan adia ne ribhi Baibo, ele dẹ sabọ ha ghọnghọn bhi ibọdọ bi ire-okhuo nọnsele. Fẹ ijiẹmhin eso ghe:

•   Ha mun ọmhẹn ọsi ọdọ ẹ la okhuo uwẹ kalo gbera ọsi uwẹ—1 Corinthians 7:3-5; Philippians 2:3, 4.

•   Bha ha mun ekpẹn nin egbe yẹ re oyẹẹ man egbe.—Ephesians 5:25, 33.

•   Bha ha fẹ ọta ghe fo bha kuẹ ha taman egbe.—Proverbs 12:18.

•  Bha ha mhọn iziẹngbe da egbe, bha ha yẹ kẹ ha rẹhunmhan egbe.—Colossians 3:13, 14.