Eye, ọ iyi oga rebhe. Baibo tẹmhọn oga ne bunbun ne bha yẹẹ Osẹnobulua. A dẹ sabọ wa ene oga nan ọbhi usun eva.

Usun nin ọhẹnhẹn: Ene ga ẹbọ

 Baibo rẹman ghe ẹghe ọria gheghe riia sade ọle ga osẹ ohoghe. (Jeremiah 10:3-5; 16:19, 20) Osẹnobulua nin Jehova a da taman ibhokhan Izrẹl yọle: “Bha hẹi ha mhọn osẹ ebhebhe deba mẹn.” (Exodus 20:3, 23; 23:24) Ẹghe nin ibhokhan Izrẹl rẹ ha ga osẹ ebhebhe, ẹkẹ ele da wo ha khọ iJehova.—Numbers 25:3; Leviticus 20:2; Judges 2:13, 14.

 Osẹnobulua bha fidenọ. Ọ sẹyẹ khọ ọle bhi ẹkẹ sade ẹbho ga osẹ ohoghe. (1 Corinthians 8:5, 6; Galatians 4:8) Ọle da taman ẹbho ne ga ọle nin ele hẹi ha deba ẹbho ne ga osẹ ohoghe muobọ. Ọle da taman ele yọle: “Bha sibhi ẹwẹ ele re, bha ha yẹ gban egbe kie bhi eje ele ye.” (2 Corinthians 6:14-17) Ahamiẹn ghe oga rebhe Osẹnobulua miẹn ọbhi egbe, ọle dẹ be gbe uhi nọn sẹ iriọ?

Usun nin ọzeva: Ene ga Osẹnobulua bhi uwedẹ nin ọle bha re obọ i

 Ẹghe ha ribhọ nin ibhokhan Izrẹl rẹ ha re oga ohoghe rẹ gua oga ẹmhọanta. Ele da ha lu emhin nin ẹbho ne ga osẹ ohoghe lu, sẹyẹ ha yọle ghe iJehova ele ga. Jehova bha miẹn ọne oga nọnsele ọbhi egbe. (Exodus 32:8; Deuteronomy 12:2-4) Ẹghe nin Jesu rẹ ha ribhi ọne otọ nan, ọle da taman ene iPharisee ne mun ọkalo bhi oga ghe Osẹnobulua ida miẹn oga nọnsele ọbhi egbe ranmhude uwedẹ nin ele rẹ ga. Ene eria nan da man ha lu ghe ele ga Osẹnobulua, ọkpakinọn, ele bha ha re obọ rẹkhan uhi nesọle.—Matthew 23:23.

 Iriọ yẹ nọn ẹlẹnan. Oga ọsi ẹmhọanta ọkpa Osẹnobulua miẹn ọbhi egbe. Ẹmhọanta nọn ribhi Baibo, ọle ẹbho ne ga oga ẹmhọanta re obọ rẹkhan. (John 4:24; 17:17; 2 Timothy 3:16, 17) Oga nin iman-emhin nesele bha diẹn obọ mun ebi Baibo tale gene hiẹ ẹbho. Iman-emhin eso ribhọ nin ẹbho rẹọ i, iman-emhin bọsi: itue ea ribhi Osẹnobulua ọkpa, emhin ribhọ nọn si ọria bhi egbe re dọ ha nyẹnlẹn bhi eje ebhebhe sade ọria yu, bi, Osẹnobulua mhọn agbọn-eranlẹn nin ọle rẹ re oya nin eria ne imhẹn. Ẹbho eso riale ghe iBaibo ene iman-emhin nan ye. Ọkpakinọn, obọ eria ne ga osẹ ọsi ohoghe, ọle ene iman-emhin nan gene na vae. Otuẹ ne man emhin ne sẹ inian, otuẹ ohoghe ele khin. Oga nin ele wo ha ga Osẹnobulua, ihoho nọn, ranmhude, uhi ọsi eria, ọle hi iman-emhin nọnsele khin.—Mark 7:7, 8.

 Oga ọsi ikpunun sọnọn iJehova. (Titus 1:16) Ọkhẹke nin oga nin ọria ga ha rẹso iẹnlẹn nọnsọle. Ọria ha rẹ gheghe ha lu ilọnmhọn oga, nin ọne oga bha da rẹso iẹnlẹn nọnsọle, ọne oga ida sabọ re ọle sikẹ Osẹnobulua. Bhi ọsi ijiẹmhin, Baibo da yọle: “Ahamiẹn ọria riale ghe oga-Osẹnobulua ọle khin, nin ọle bha da dia olanmhẹn nọnsọle, ọ gheghe hiẹ egbe ọle. Sẹyẹ, oga nọnsọle, ihoho nọn. Oga nọn khiale, nọn bha ditọan bhi ẹlo nọnsi Osẹnobulua nin Aba mhan hi: nan rẹ ha gbẹloghe ene imhọn aba bi ene imhọn ọdọ bhi ẹghe edọnmhẹn nọnsele, bi nan rẹ ha dọnmhegbe nin ọne agbọn nan hẹi re itọn mhan bhi egbe.” (James 1:26, 27)