Armageddon hi okhọn nọn kike nin Osẹnobulua bi eria ne gbẹloghe bhi ọne agbọn nan ha ko khọnlẹn. Ene eria nan ne gbẹloghe bi ẹbho ne deba ele nin Osẹnobulua suan nian, ranmhude ele bha ka re obọ ọbhi ugbẹloghe nọnsọle. (Psalm 2:2) Okhọn ọsi Armageddon dẹ re ọkpẹnlẹn ọbhi ugbẹloghe ọsi eria.—Daniel 2:44.

 Ọne ukpọta “Armageddon,” osukpa ọ zegbere bhi Baibo. Revelation 16:16 ọ da zegbere. Ebe ọsi Revelation ji mhan lẹn ghe, “eji a tiọle Armageddon bhi urolo iHebrew,” ọle “enijie ne ribhi otọ ọne agbọn nan rebhe” ha da “si egbe koko ha khian okhọn ọsi ukpẹdẹ nọn khua ọsi Osẹnobulua Nọn Kokhun Nẹ.”—Revelation 16:14.

 Hela Ha khọn okhọn ọsi Armageddon? Jesu Kristi dẹ sun eyokhọnlẹn ne ribhi okhun rẹ khọn eghian Osẹnobulua miotọ. (Revelation 19:11-16, 19-21) Ẹbho ne bha ka re obọ ọbhi ugbẹloghe nọnsi Osẹnobulua, ne bha yẹ ka mun ekpẹn nanlẹn, deba bhi ene yi eghian Osẹnobulua.—Ezekiel 39:7.

 Otọ Middle East a ha da be khọn okhọn Armageddon? Eye. Ọ iyi eji ọkpa a ha da khọn ọlẹn, otọ agbọn nan rebhe a ha da khọn ọlẹn.—Jeremiah 25:32-34; Ezekiel 39:17-20.

 Armageddon, nan yẹ tiọle “Har–Magedon” ẹgheso (Hebrew Har Meghiddohnʹ), mundia nin “Oke ọsi Megiddo.” Agbaẹbho Megiddo ha khin bhi otọ Izrẹl bhi ẹghe ẹdẹlẹ. Ebe ọsi ẹghe ẹdẹlẹ tẹmhọn okhọn eso kpataki nan khọn bhi enin, Baibo yẹ tẹmhọn eso bhi ene okhọn. (Judges 5:19, 20; 2 Kings 9:27; 23:29) Ọrẹyiriọ, Armageddon iyi otọ khọnkhan nọn sikẹ Megiddo ọsi ẹghe ẹdẹlẹ. Udede oke soso iribhi enin, sẹyẹ, enin bhọ ida gua ene eghian ne ha mun okhọn bu Osẹnobulua. Okhọn nọn kike nọn ha sunu bhi otọ agbọn nan rebhe nin ene gbẹloghe ha da si egbe koko nin ele rẹ khọn ugbẹloghe nọnsi Osẹnobulua, ọle hi okhọn Armageddon.

 Be emhin ha diayẹ bhi ẹghe okhọn ọsi Armageddon? Ẹmhọanta nọn ghe mhan bha lẹn ebi Osẹnobulua ha rẹ noo ahu nọnsọle yẹ bhi ọne okhọn nan. Sokpan bhi ẹghe nọn gbera, Osẹnobulua noo emhin bii esia, otọ umuvẹa, okpamẹn, eranlẹn bi sulfur, avan bi emianmhẹn, ọle dẹ yẹ sabọ noo ele bhi okhọn Armageddon. (Job 38:22, 23; Ezekiel 38:19, 22; Habakkuk 3:10, 11; Zechariah 14:12) Eso bhi eghian nesi Osẹnobulua dẹ tobele ha fuẹn egbe ele a, ranmhude ele ida yẹ lẹn ebe ele lu bhi obọ, ọkpakinọn, ele dẹ lẹn ghe Osẹnobulua hi ọnọn khọn ele.—Ezekiel 38:21, 23; Zechariah 14:13.

 Okhọn Armageddon dẹ be kpẹn ọne agbọn nan? Okhọn Armageddon ida dunmhun ọne otọ nan an, ranmhude Osẹnobulua re ọne otọ nan nin mhan, nin mhan nyẹnlẹn bhọ bhi ighegheghe. (Psalm 37:29; 96:10; Ecclesiastes 1:4) Ọ iyi ẹbho Armageddon ha fuẹn, ọ bhọ dẹ hinmhin eria, ranmhude “usun ẹbho ne bunbun” ne ga Osẹnobulua dẹ miuhọnmhọn.—Revelation 7:9, 14; Psalm 37:34.

 Ọ iyi ọne otọ khọnkhan nan ọkpa ọne ukpọta “ọne agbọn nan” mundia nan, ẹgheso, Baibo yẹ noo ọle rẹ tẹmhọn ẹbho ne imhẹn ne bha ka hẹnmhọn nin Osẹnobulua. (1 John 2:15-17) Bhiriọ, Armageddon dẹ mun ‘ọkpẹnlẹn bu ọne agbọn nan.’—Matthew 24:3, King James Version.

 Ẹghela a ha rẹ khọn okhọn ọsi Armageddon? Ẹghe nin Jesu rẹ ha zilo nyan ẹmhọn “ekpokpo nọn khua” nọn ha kpẹn bhi okhọn Armageddon, ọle da yọle: “Rẹji ọne ukpẹdẹ nin bi ọne uriagogo, ọria iribhọ nọn lẹn, rẹ sẹbhi ene ẹhi ne ribhi okhun la ọne Ọmọn, gbera ọne Aba ọkpa sẹsẹ.” (Matthew 24:21, 36) Ọkpakinọn, Baibo ji mhan lẹn ghe okhọn Armageddon dẹ sunu bhi ẹghe nọnsi Jesu, nọn munhẹn bhi ukpe 1914.—Matthew 24:37-39.