Ehe, emhin ne bunbun ribhi Baibo ne rẹman ghe Osẹnobulua gene ribhọ. Baibo taman mhan ghe nin mhan noo ẹwanlẹn nọnsẹmhan rẹ luẹ kere ghe Osẹnobulua ribhọ. Mhan ida gheghe rẹọbhọ ranmhude ebi a taman mhan bhi otuẹ. (Romans 12:1; 1 John 5:20. Bha ji mhan zilo nyan emhin eso nin Baibo tale ne rẹkpa mhan rẹ lẹn ghe Osẹnobulua ribhọ:

•   Uwedẹ nan rẹ man ọne agbọn nan rẹman ghe Aman ribhọ nọn man emhin. Baibo da yọle: “Gene gene, uwa nọn hi ki rẹ khin, ọria bọn ọlẹn, sokpan, Osẹnobulua hi ọnọn man emhin rebhe.” (Hebrews 3:4) Arẹmiẹn ọne ẹmhọanta nan wo lẹkhẹ, ọ nọghọ ẹbho ne bunbun rẹ lẹn otọle. a

•   Imhan nin eria bha diabe elanmhẹn. Aharẹmiẹn mhan mhọn emhin rebhe ne khẹke mhan bhi iẹnlẹn, mhan sẹyẹ guanọ nin mhan lẹn ebezẹle nin mhan da ribhi ọne agbọn nan, nin mhan lẹn Osẹnobulua yẹ ha ga ọle. Ọnan hi emhin nin Baibo ha tẹmhọn ọlẹn ẹghe nọn rẹ yọle: ‘Ẹbho lẹnmhin ghe ọkhẹke nin ele ha khu ọbhi emhin oriọn.’ (Matthew 5:3; Revelation 4:11) Ọne ọkhọle nin mhan mhọnlẹn nan rẹ lẹn Osẹnobulua, rẹman ghe Osẹnobulua ribhọ. Ọ da yẹ rẹman ghe, Osẹ nọn hoẹmhọn mhan ọle khin, ghe ọle guanọ nin mhan lẹn ọlẹn yẹ sike ọle.—Matthew 4:4.

•   Ọta akhasẹ nan gbẹn ọbhi iBaibo ikpe ne bunbun ne gbera da wo munsẹ beji a rẹ gbẹn ọlẹn tee. Uwede nin ene ọta akhasẹ nan rẹ munsẹ, da rẹman ghe obọ Osẹnobulua, ọle iBaibo na vae.—2 Peter 1:21.

•   Arẹmiẹn ebe nan gbẹn bhi ẹghe ẹdẹlẹ Baibo khin, ebi ọ tale rẹji ẹmhọn azemhinre wo gba. Bhi ọsi ijiẹmhin, ẹbho ne bunbun da rẹọbhọ ghe, uke elanmhẹn bọsi enin, ọle ọne otọ nan ye. Bhi obọ nọnkẹle, Baibo da taman mhan ghe, ideghedeghe, ọle Osẹnobulua mun ọne otọ nan ọi. (Job 26:7) Ẹmhọn nin Baibo tale yẹ wo gba ẹghe nọn re yọle: “Ọne otọ nan wo dia kholobo.” (Isaiah 40:22) Ẹbho ne bunbun rẹọbhọ ghe, Osẹnobulua hi ọnọn rẹkpa ene gbẹn iBaibo rẹ lẹn ene emhin nan.

•   Baibo re ewanniẹn ọbhi inọnta kpataki nin ẹbho nọọn rẹji iẹnlẹn. Ranmhude ẹbho eso bha miẹn ewanniẹn nọn khọn ele rẹji ene inọnta nan, ọle re ele rẹọbhọ ghe Osẹnobulua iribhọ. Bhi ọsi ijiẹmhin, ẹbho sabọ rẹ ha nọọn yọle: Ahamiẹn Osẹnobulua nọn hoẹmhọn mhan ribhọ, bezẹle nin ọle da ji olukhọ bi emhin ebe vuọn ọne agbọn nan? Bezẹle nin ẹbho da mun oga nọnsi Osẹnobulua gue ẹlo rẹ lu emhin ebe?—Titus 1:16.