Eye, a ida dunmhun ọne otọ nan an, a ida re eranlẹn tuẹ ọle a, la mun ọlẹn kie. Baibo rẹman ghe Osẹnobulua man ọne otọ nan nin mhan ha nyẹnlẹn bhọ rẹ sẹbhi ighegheghe.

•   “Ene khiale dẹ nyẹnlẹn bhi ọne otọ nan, ele dẹ nyẹnlẹn bhọ bhi ighegheghe.”—Psalm 37:29.

•   “[Osẹnobulua] mun ọne otọ nan ọbhi ayotọ nọnsọle; Ọ ida sibhi eji ọle ye re ghee rẹ dọ sẹbhi ighegheghe.”—Psalm 104:5.

•   “Ọne otọ nan dẹ ha ribhọ bhi ighegheghe.”—Ecclesiastes 1:4.

•   “Ọnọn man otọ, Ọnọn manman man ọlẹn nọnsẹn, . . . bha man ọlẹn bhi ihoho, sokpan, ọle man ọlẹn nan ha nyẹnlẹn bhọ.”—Isaiah 45:18.

 Osẹnobulua ida ji eria da re okhọnlẹn la emhin nọn hi ki rẹ khin rẹ riia ọne otọ nan an sẹsẹsẹ. Ọkpakinọn, ọle dẹ “fuẹn ene riia ọne otọ nan an.” (Revelation 11:18) Be ọle ha rẹ lu ọnan yẹ?

 Osẹnobulua dẹ noo Ejele nọnsọle rẹ dunmhun ugbẹloghe ọsi eria ne bha sabọ gbega ọne otọ nan. (Daniel 2:44; Matthew 6:9, 10) Jesu Kristi nin ọmọn nọnsi Osẹnobulua, ọle da ha gbẹloghe bhi ọne Ejele. (Isaiah 9:6, 7) Ẹghe nin Jesu rẹ ha ribhi ọne otọ nan, ọle da lu emhin ọhan-ilo kẹkẹ ne rẹman ghe ọle sabọ dia emhin nan manlẹn. (Mark 4:35-41) Jesu dẹ dia ọne otọ nan bi emhin rebhe ne ribhọ. Ọle ki re emhin rebhe kiẹn ọsọgbọn beji ọ ka ha ye bhi ogba ọsi Eden.—Matthew 19:28; Luke 23:43.

 Eye, ọ bha ta iriọ. Ebezẹle nin ẹbho da ta iriọ hi ranmhude ele bha manman lẹn otọ ẹmhọn nọn ribhi 2 Peter 3:7 nọn yọle: “A mun otọ bi okhun nọn ribhọ nian ya khẹ eranlẹn.” Ghe emhin eva ne rẹkpa mhan rẹ manman lẹn otọ ọne ulọnlẹn nan:

1.   Baibo noo ene ọta “okhun,” “otọ,” bi “eranlẹn” rẹ tẹmhọn emhin kẹkẹ. Bhi ọsi ijiẹmhin, Genesis 11:1 yọle: “Ọne otọ nan rebhe da ha zẹ urolo ọkpa.” “Otọ” nan tẹmhọnlẹn bhi enan mundia nin eria.

2.   Ebi a tẹmhọnlẹn ọkuẹsẹ a ta ẹmhọn nọn ribhi 2 Peter 3:7, rẹman ebi ene ọta okhun, otọ, bi eranlẹn mundia nan. Ulọnlẹn nọnzi 5 bi 6 da tẹmhọn Okpamẹn nọn rọlọ bhi ẹghe nọnsi Noah. Bhi ọne ẹghe nin, eria ọkpa fuẹn an, ọ iyi ọne otọ nan tee. Eria ọbe ne ha nyẹnlẹn ẹghenin la “otọ”, ọle ọne Okpamẹn fuẹn an. (Genesis 6:11) Ọ da yẹ fuẹn ẹbho ne ha gbẹloghe bhi ọne otọ nan ẹghenin an, ọnan mundia nin “okhun.” Ẹbho ne imhẹn a dunmhun an, ọ iyi ọne otọ nan. Noah bi azagba-uwa nọnsọle da miuhọnmhọn beji Osẹnobulua fuẹn agbọn an ẹghenin, ele da yẹ nyẹnlẹn bhi ọne otọ nan beji ọne Okpamẹn ki rọ fọ.—Genesis 8:15-18.

 Beji ọ ha khin bhi ẹmhọn ọne Okpamẹn, ọne ugbe-dunmhun-an, la “eranlẹn” nan tẹmhọnlẹn bhi 2 Peter 3:7, ẹbho ne imhẹn ọ ha fuẹn an, ọ iyi ọne Otọ nan. Osẹnobulua ve ivẹ nin mhan ghe, “Ọkpakinọn, beji ọle vele, otọ ọsọgbọn bi okhun ọsọgbọn ribhọ nin mhan khẹ. Ikhiakhiale dẹ ha ribhi enin.” (2 Peter 3:13) “Okhun ọsọgbọn,” la ugbẹloghe ọsọgbọn nọn mundia nin Agbejele nọnsi Osẹnobulua, dẹ ha gbẹloghe “otọ ọsọgbọn” la eria ne ka Osẹnobulua ẹho. Bhi odotọ ọne ugbẹloghe, ọne otọ nan ki dọ kiẹn ọto ọfubhegbe.—Revelation 21:1-4.