Ukoko Isẹri Jihova oke mai na u muhọ evaọ ubrobọ urere ikpe-udhusoi avọ ikpegbizii. Evaọ oke yena, utu osese jọ orọ emọ-uwuhrẹ Ebaibol nọ a jẹ rria kẹle Pittsburgh, Pennsylvania, evaọ obọ United States a romatotọ jẹ kiẹ Ebaibol na. A jẹ rọ eware nọ Ebaibol na o gine wuhrẹ wawo iwuhrẹ ichọche. A te mu eware nọ a kiẹ via họ ekere fihọ ebe, ebe-usi, gbe emagazini nọ ma bi si enẹna Uwou-Eroro Na—Nọ U Bi Whowho Uvie Jihova.

 Charles Taze Russell ọ jọ omọvo emọ-uwuhrẹ Ebaibol na. Dede nọ Russell ọ kobaro evaọ iruẹru emọ-uwuhrẹ Ebaibol oke yena, yọ ọye họ ohwo ọsosuọ nọ o kere Uwou-Eroro Na, orọnikọ egagọ ekpokpọ jọ ọ tohọ họ. Ẹjiroro Russell avọ emọ-uwuhrẹ Ebaibol nọ i kiọkọ họ, re a fi obọ họ kẹ amọfa riẹ kpahe iwuhrẹ Jesu Kristi, re a jẹ rọ aro kele oriruo Ileleikristi ikpe-udhusoi ọsosuọ. Jesu họ ọnọ ọ to egagọ Ileleikristi na họ, fikiere ọye ọ to ukoko mai họ.—Ahwo Kọlọsi 1:18-20.