Isẹri Jihova a re dhomahọ esuo ho fiki eware nọ a wuhrẹ evaọ Ebaibol na. Ma re dhunu họ ẹme isuẹsu hu, ma re votu kẹ ohwo hayo utu esuo-ohrowo ho, ma rẹ ta nọ a votu kẹ omai hi, yọ ma re kuomagbe ahwo nọ a bi luje wọso egọmeti re o nwene izi riẹ hẹ. Ma bi ru ere fiki oware nọ Ebaibol na o wuhrẹ nọ ma te ta kpahe evaọ obotọ na.

•   Ma bi lele oriruo Jesu, ọnọ ọ rọwo nọ a rehọ iẹe mu ovie he. (Jọn 6:15) Jesu o wuhrẹ ilele riẹ nọ “a wo obọ kugbe akpọ na ha,” yọ ọ vuẹ rai vevẹ inọ a re dhomahọ esuo ho.​—Jọn 17:14, 16; 18:36; Mak 12:13-17.

•   Uvie Ọghẹnẹ ma rrọ abọ riẹ, yọ oye Jesu ọ ta kpahe inọ: “A te ta usi uwoma Uvie na evaọ akpọ na soso.” (Matiu 24:14) Nọ orọnọ Uvie Ọghẹnẹ ma rrọ abọ riẹ na, yọ ma bi whowho nọ Uvie na o te ze kẹle na, ma re dhomahọ esuo orẹwho ọvuọvo ho, te ọrọ orẹwho nọ ma be rria.​—2 Ahwo Kọrint 5:20; Ahwo Ẹfisọs 6:20.

•   Fikinọ ma rrọ abọ esuo ọvo ho, ma be sae ta usi uwoma kẹ ahwo kpobi kpahe Uvie Ọghẹnẹ ududu. Ma be rọ ẹmeunu gbe uruemu mai dhesẹ nọ Uvie Ọghẹnẹ ọvo họ egọmeti nọ o ti ku ebẹbẹ ahwo-akpọ họ.​—Olezi  56:11.

•   Fikinọ ma bi dhomahọ esuo ho, ma wọhọ uviuwou ovo keme okugbe o rrọ udevie mai evaọ akpọ na soso. (Ahwo Kọlọsi 3:14; 1 Pita 2:17) Rekọ ohẹriẹ o rrọ udevie egagọ nọ ahwo rai a bi dhomahọ esuo.​—1 Ahwo Kọrint 1:10.

 Ma be rọ adhẹẹ kẹ egọmeti. Dede nọ ma re dhomahọ esuo ho, ma rẹ rọ adhẹẹ kẹ egọmeti evaọ orẹwho kpobi nọ ma be rria. Onana o rọwokugbe ẹme nọ Ebaibol na ọ ta inọ: “Jọ ohwo kpobi ọ romakpotọ kẹ enọ i wo udu-esuo okpehru.” (Ahwo Rom 13:1) Ma re koko izi egọmeti, hwosa osa-uzou mai, je ru lele ọruẹrẹfihotọ nọ egọmeti o bi ro fiobọhọ kẹ enọ e rrọ otọ riẹ. Ukpenọ ma re kuomagbe ahwo nọ a re luje wọso egọmeti, ma re ru lele ohrẹ Ebaibol nọ o ta nọ ma lẹ roro “ivie gbe ahwo kpobi nọ a wo udu-esuo,” maero nọ a tẹ be jiroro nọ i ti kpomahọ ufuoma egagọ mai.​—1 Timoti 2:1, 2, ẹme-obotọ.

 Evaọ eware nọ i wobọ kpahe esuo, ma riẹ nọ ohwo kpobi o wo udu nọ ọ rẹ rọ salọ oware nọ o re ru. Fikiere, ma rẹ whaha ahwo re a seba evotu hu yọ ma rẹ wha ozighi họ eria nọ a be jọ votu hu.

 Kọ obọnana gheghe ma rọ siọ oma ba edhehọ esuo? Ijo. Ikọ na gbe Ileleikristi ikpe-udhusoi ọsosuọ a dhomahọ esuo evaọ oke rai hi. Obe na Beyond Good Intentions o ta nọ: “Dede nọ Ileleikristi ọsosuọ na a riẹ nọ o roja re a rọ adhẹẹ kẹ enọ i wo udu-esuo, a rọwo nọ a re dhomahọ esuo vievie he.” Epọvo na re, obe na On the Road to Civilization o ta nọ Ileleikristi ọsosuọ na “a rọwo vievie he re a jọ enọ i re su.”

 Fikinọ ma bi dhomahọ esuo ho, kọ o be wha ozighi họ erẹwho nọ ma be rria? Ijo. Ma bi lele ahwo kpobi rria dhedhẹ, fikiere u du gwọlọ nọ ozọ mai u re mu egọmeti hi. Ukoko jọ nọ a re se National Academy of Sciences ọrọ Ukraine o niyẹrẹ kpahe Isẹri Jihova evaọ ukpe 2001. O ta kpahe oma nọ Isẹri Jihova a re dhe họ isuẹsu hu evaọ iyẹrẹ na inọ: “Nẹnẹ, eva Isẹri Jihova e rẹ dha ahwo jọ keme a re dhomahọ esuo ho; oyejabọ nọ esuo ọgbahọ Nazi gbe egọmeti efa e jẹ rọ bọwo Isẹri Jihova ota evaọ okenọ u kpemu.” Ghele na, makọ okenọ a je gboja kẹ Isẹri Jihova evaọ otọ esuo Soviet Union, a je “yoẹme kẹ egọmeti ghele. A jọ ahwo oruọzewọ yọ a jẹ rọ unevaze ru iruo kugbe evaọ idhu gbe eria eware-ikuo, yọ a je ru oware ọvuọvo nọ o rẹ wọso egọmeti hi.” Nọ a je ku iyẹrẹ na họ, a ta nọ rite inẹnẹ na, Isẹri Jihova a rẹ rọ iwuhrẹ gbe iruẹru egagọ rai “wha ozighi hayo wọso egọmeti orẹwho ọvuọvo ho.”