Mai Isẹri Jihova ma re ru ehaa ẹdẹ-eyẹ hẹ keme ma rọwo nọ ehaa itieye na e rẹ dha Ọghẹnẹ eva. Dede nọ Ebaibol na ọ nwane ta gbiae he inọ ma re ru ehaa ẹdẹ-eyẹ hẹ, ma rẹ jọ eva riẹ ruẹ ẹme nọ ọ ta kpahe eware jọ nọ i wobọ kugbe ehaa ẹdẹ-eyẹ, gbe epanọ Ọghẹnẹ o rri rai. Roro kpahe eware ene jọ gbe ehri-izi Ebaibol nọ i kiekpahe ae.

1.   Obọ egedhọ ehaa ẹdẹ-eyẹ i muhọ no ze. Wọhọ epanọ obe na Funk & Wagnalls Standard Dictionary of Folklore, Mythology, and Legend o ta, ahwo a jẹ hai ru ehaa nana keme a rọwo nọ evaọ ẹdẹ-eyẹ ohwo, “izi-imuomu a rẹ rọ uvẹ yena họre ohwo nọ a bi ru ehaa ẹdẹ-eyẹ riẹ na” gbe inọ “egbẹnyusu ohwo na nọ e rrọ ehaa na avọ ẹro nọ a be lẹ kẹe e rẹ thọ ohwo na.” Obe na The Lore of Birthdays o ta nọ evaọ oke anwae, ehaa ẹdẹ-eyẹ nọ ohwo o ru no i “wuzou gaga nọ a tẹ gwọlọ gbẹva kẹe,” onọ ahwo nọ a rẹ rọ “isi rọ gbẹva a re ru.” Obe na o tẹ jẹ ta nọ “ekandoro ẹdẹ-eyẹ nọ a re gbiku rai evaọ iku esia na, i wo ogaga emajiki nọ i re ro ru oware kpobi nọ ohwo ọ gwọlọ.”

    Ebaibol na o mukpahe emajiki, ẹva-ọgba, iruẹru-imizihayo “eware itieye na” efa. (Iziewariẹ 18:14; Ahwo Galesha 5:19-21) Oware jọ nọ o wha riẹ ze nọ Ọghẹnẹ o ro brukpe okpẹwho Babilọn evaọ oke anwae họ, ahwo riẹ a jẹ hae rọ isi rọ gbẹva, onọ o rrọ oghẹrẹ iruẹru-imizi jọ. (Aizaya 47:11-15) Orọnikọ oware kpobi Isẹri Jihova a rẹ kiotọ riẹ re a riẹ epanọ u ro muhọ họ; rekọ nọ Ebaibol na ọ tẹ vẹvẹ omai unu kpahe oware, ma re rri rie vo ho.

2.   Ileleikristi ikpe-udhusoi ọsosuọ a ru ehaa ẹdẹ-eyẹ hẹ. Obe na The World Book Encyclopedia o ta nọ “a jẹ hai rri ehaa ẹdẹ-eyẹ wọhọ uruemu egedhọ.” Ebaibol na o dhesẹ nọ ikọ na gbe amọfa nọ Jesu ọvo o wuhrẹ a fi oriruo hotọ nọ Ileleikristi kpobi a re lele.​—2 Ahwo Tẹsalonika 3:6.

3.   Uwhu Jesu ọvo Ebaibol na ọ ta nọ Ileleikristi a hae kareghẹhọ, orọnikọ eyẹ riẹ hẹ. (Luk 22:17-20) Onana u re gbe omai unu hu keme Ebaibol na ọ ta nọ “ẹdẹ uwhu o woma vi ẹdẹ eyẹ.” (Ọtausiuwoma Na 7:1) No emuhọ uzuazọ Jesu rite ekuhọ riẹ evaọ otọakpọ, o ru oware uwoma evaọ aro Ọghẹnẹ, fikiere o wo emamọ odẹ; onana u ru nọ ẹdẹ uwhu riẹ u ro wuzou vi ẹdẹ eyẹ riẹ.​—Ahwo Hibru 1:4.

4.   A jọ Ebaibol na fodẹ odibo Ọghẹnẹ ọvuọvo nọ o ru ehaa ẹdẹ-eyẹ hẹ. Orọnikọ onana yọ orithọ họ, keme a jọ Ebaibol na ta kpahe ehaa ẹdẹ-eyẹ ivẹ nọ a ru, rekọ ahwo nọ a jẹ gọ Ọghẹnẹ hẹ a ru rai. Eware nọ a ta kpahe ehaa ẹdẹ-eyẹ ivẹ na i dhesẹ nọ e were Ọghẹnẹ hẹ.​—Emuhọ 40:20-22; Mak 6:21-29.

 Wọhọ epanọ emamọ esẹgbini a re ru, Isẹri Jihova a re dhesẹ nọ a you emọ rai oke kpobi evaọ ukpe na; a rẹ kẹ ae ekẹ jẹ raha oke kugbe ai ziezi. A rẹ daoma rọ aro kele Ọghẹnẹ, ọnọ ọ rẹ rọ emamọ eware kẹ emọ riẹ na. (Matiu 7:11) Eme nọ e rrọ obotọ na i dhesẹ nọ oware ovo u bi vru mi emọ Isẹri Jihova ha:

•   “A tẹ kẹ owhẹ okẹ nọ who bi rẹro riẹ hẹ, ẹsiẹe o rẹ mae were owhẹ.”​—Tammy, ikpe 12.

•   “Dede nọ a rẹ kẹ omẹ ekẹ evaọ ẹdẹ-eyẹ mẹ hẹ, ọsẹgboni mẹ a rẹ dẹ eware kẹ omẹ evaọ oke ọfa sa-sa. Oyena o rẹ were omẹ keme a rẹ kẹ omẹ okẹ evaọ okenọ me rẹro riẹ hẹ.”​—Gregory, ikpe 11.

•   “Kọ who roro nọ ohwo ọ tẹ rọ iminiti ikpe gbile jẹ re ikeki họ ehaa? Nyaze obọ uwou mai re whọ ruẹ epanọ ehaa e rẹ jọ!”​—Eric, ikpe 6.