Ehaa orọo Isẹri Jihova e rẹ jọ umumuo jẹ jọ kpatiẹ, yọ a rẹ kẹ ovuẹ no Ebaibol ze. Nọ a tẹ kẹ ovuẹ no Ebaibol ze no, a sai kpohọ oria nọ a rẹ jọ wereva kugbe, yọ a sae tubẹ re emu. a Nọ Jesu o mu usi uwoma ota riẹ họ obọ, o kpohọ ehaa orọo jọ evaọ ẹwho Kena.—Jọn 2:1-11.

•  Ẹvẹ a re ru ehaa orọo na?

•  Diẹse Isẹri Jihova a re jo ru ehaa orọo rai?

•  Ono ọ rẹ sae kpohọ ehaa orọo na?

•  Kọ u wo oghẹrẹ ẹgọ jọ nọ ahwo na kpobi a rẹ gọ?

•  Kọ a rẹ kẹ ahwo nọ a be rọo na okẹ?

•  Kọ a rẹ rehọ egho udi rai te ọrọ ohwohwo?

•  Kọ a re gbolo eraese hayo eware itieye na efa fihọ oma ahwo nọ a be rọo na?

•  Kọ a rẹ kẹ ahwo emu gbe udi?

•  Kọ a re kporo ile hayo gbile?

•  Kọ Isẹri Jihova a re ru ekareghẹhọ ẹdẹ ehaa orọo rai?

 Evaọ ehaa orọo Isẹri Jihova, oware nọ o mai wuzou nọ a re ru họ, Osẹri Jihova jọ ọ rẹ rọ iminiti ọgba kẹ ovuẹ no Ebaibol ze. A rẹ jọ ovuẹ na ta kpahe epanọ Ebaibol na ọ sai ro fiobọhọ kẹ imava nọ e be te rọo na re a you ohwohwo, wereva, je ru eware nọ orọo rai o sae rọ tọ.—Ahwo Ẹfisọs 5:33.

 Evaọ erẹwho buobu, egọmeti a rẹ kẹ Isẹri Jihova nọ e rẹ kẹ ovuẹ ehaa orọo udu nọ a re ro kere odẹ imava nọ a gwọlọ rọo na fihotọ lele uzi. Evaọ erẹwho nana, imava nọ e be rọo na a rẹ ya eyaa kẹ ohwohwo evaọ ubrobọ ekuhọ ovuẹ na. A sae je ku ẹmẹro họ ohwohwo obọ. Kẹsena ohwo nọ ọ be kẹ ovuẹ na ọ vẹ ta nọ enọ e be rọo na a zihe ruọ ọzae-avọ-aye no.

 Evaọ erẹwho efa, uzi egọmeti o gbahọ nọ ahwo nọ a gwọlọ rọo a re kpohọ ọfisi egọmeti nyai kere odẹ fihotọ lele uzi. A re ru onana taure a tẹ te kẹ ovuẹ ehaa orọo na. Otẹrọnọ ọzae avọ aye na a ya eyaa kẹ ohwohwo ho evaọ obọ ọfisi egọmeti nọ a kpohọ na, a sai ru ere evaọ ubrobọ ekuhọ ovuẹ ehaa orọo na. Rekọ otẹrọnọ a ya eyaa kẹ ohwohwo, a sae wariẹ eyaa na evaọ etoke ovuẹ na rekọ a rẹ tae wọhọ oware nọ a ru no vẹre. A tẹ kẹ ovuẹ na no, a vẹ lẹ olẹ ro kuhọ. A rẹ jọ olẹ na yare Ọghẹnẹ re ọ ghale enọ e rọo na.

 Isẹri Jihova buobu a rẹ gwọlọ ru ehaa orọo rai evaọ Ọgwa Uvie, otẹrọnọ ọjọ ọ rrọ oria na. b Yọ otẹrọnọ a gwọlọ wereva kugbe nọ a tẹ nwane rọo no, a rẹ salọ oria ofa nọ a re kpohọ nyai jo ru ei.

 Otẹrọnọ Ọgwa Uvie a ti jo ru ehaa orọo na, te ahwo nọ a rrọ Isẹri Jihova te enọ e rrọ Isẹri Jihova ha a sai kpohọ ehaa orọo na. Yọ otẹrọnọ ọzae avọ aye na a ruẹrẹ oria jọ fihọ nọ a te jọ wereva kugbe nọ a tẹ rọo no, ae ọvo a rẹ salọ ahwo nọ a re zizie kpohọ etẹe.

 Dede nọ u wo ẹgọ obọdẹ jọ nọ ahwo kpobi a rẹ gọ nọ a te bi ru ehaa orọo evaọ Ọgwa Uvie he, Isẹri Jihova a rẹ daoma gọ ẹgọ nọ o kiehọ jẹ rọ kpatiẹ wọhọ epanọ Ebaibol na ọ ta. Yọ eva e rẹ were ae nọ a tẹ ruẹ nọ amọfa nọ a ziọ ehaa orọo na a gọ ẹgọ nọ ọ rrọ kpatiẹ. (1 Timoti 2:9) Epọvo na re, nọ ọzae avọ aye na a tẹ ruẹrẹ oria jọ fihọ nọ a te jọ wereva kugbe, u fo nọ ahwo kpobi a rẹ gọ ẹgọ nọ ọ rrọ kpatiẹ re.

 Ebaibol na ọ tuduhọ omai awọ nọ ma hai ru ọghọ. (Olezi 37:21) Eva e rẹ were Isẹri Jihova re a kẹ ahwo nọ a be rọo okẹ, yọ o rẹ were ae nọ a tẹ kẹ ae okẹ re. (Luk 6:38) Rekọ Isẹri Jihova a rẹ ta kẹ ahwo re a kẹ ae okẹ hẹ, yọ a re se edẹ ahwo nọ a kẹ rai ekẹ via ha. (Matiu 6:3, 4; 2 Ahwo Kọrint 9:7; 1 Pita 3:8) Ebaibol na o mukpahe uruemu nana, yọ o sae kẹ ahwo buobu nọ a ziọ ehaa na uye.

 Ijo. Isẹri Jihova a rẹ rehọ egho udi rai te ọrọ ohwohwo jẹ kpare iẹe kpehru hu, keme uruemu nana u muhọ no egagọ erue ze. c Dede nọ a re ru onana ha, u wo idhere efa nọ Isẹri Jihova a sae ro dhesẹ kẹ nọ e rọo na inọ a gwọlọ nọ a wereva evaọ orọo rai.

 Ijo. Evaọ erẹwho jọ, ahwo a re gbolo eraese hayo eware itieye na efa fihọ oma ahwo nọ a rọo obọ. Ahwo nana a re roro nọ onana o rẹ whae ze nọ ọzae-avọ-aye na a re ro wou uzou, wereva, jẹ rria tọ. Rekọ Isẹri Jihova a rẹ whaha uruemu kpobi nọ u wobọ kugbe iruẹru imizi. Yọ onana u kugbe eware nọ a re ru re ohwo o wou uzou. Uruemu nana o wọso oware nọ Ebaibol na ọ ta—Aizaya 65:11.

 A rẹ kẹ ahwo emu gbe udi evaọ obọ Ọgwa Uvie he. Rekọ ahwo jọ nọ a bi ru ehaa orọo a sae ruẹrẹ oria jọ họ nọ a rẹ jọ wereva kugbe jẹ re emu. (Ọtausiuwoma Na 9:7) Otẹrọnọ a te kẹ ahwo udi nọ o re mu, a rẹ ruẹ nọ o re bu hrọ họ, yọ ahwo nọ a kpako te unuikpe nọ egọmeti o fihọ ọvo ae a rẹ da udi utioye.—Luk 21:34; Ahwo Rom 13:1, 13.

 Otẹrọnọ ọzae avọ aye na a ruẹrẹ oria jọ kpahe nọ a te jọ wereva kugbe ahwo nọ a tẹ rọo no, ae ọvo a rẹ jiroro na sọ a ti kporo ile je gbile. (Ọtausiuwoma Na 3:4) A sae salọ ile nọ e were rai gbe ile nọ a re kporo evaọ oria nọ a no ze, rekọ u fo nọ ile na i re kiehọ. Ẹsibuobu nọ a te bi ru ehaa orọo evaọ obọ Ọgwa Uvie, a re kporo ile nọ a rehọ eme rai no Ebaibol na ze.

 Whọ rẹ jọ Ebaibol na ruẹ oria ọvuọvo nọ a jọ ta nọ a ru ekareghẹhọ ẹdẹ ehaa orọo hayo inọ a du ru ei hi hi. Fikiere Isẹri Jihova nọ a rọo no, ae ọvo a rẹ jiroro kẹ omarai sọ a re ru ekareghẹhọ ẹdẹ ehaa orọo rai. A tẹ salọ nọ a re ru ei, aimava ọvo a sai ru ei hayo a sai zizie ahwo uviuwou gbe egbẹnyusu rai kugbe oma.