Ma rẹ rehọ igho nọ ahwo a zọhọ ze ro ru iruo egagọ mai je fiobọhọ kẹ ahwo. Iruo nana yọ abọjọ iruo nọ e mai wuzou kẹ omai, koyehọ re ma fiobọhọ kẹ ahwo zihe ruọ ilele Jesu Kristi.​—Matiu 28:19, 20.

 Ma rẹ rehọ igho nọ ahwo a zọhọ ze ro ru ohwo jọ fe vievie he. Ma rẹ hwa ọkpako ukoko ọvuọvo osa ha, yọ ma rẹ hwa Isẹri Jihova osa re a tẹ ta usi uwoma no uwou ruọ uwou hu. Ma rẹ hwa ahwo nọ a bi ru iruo evaọ iwou ogha mai osa gbe he, makọ inievo nọ e rrọ Utu Ẹruorote na dede.

•   Ebe nọ Ma bi Kere: Kukpe kukpe, ma rẹ fa Ebaibol gbe ebe efa nọ i bu te ima buobu fihọ evẹrẹ sa-sa, printi rai, wọ ae kpohọ eria sa-sa, jẹ rehọ ae kẹ ahwo ababọ ugho nọ ma re mi fihọ ai. Yọ ma wo ebe gbe ividio buobu nọ e rrọ oria itanẹte mai jw.org gbe JW Library app mai, yọ ma re mi ugho fihọ ai hi hayo whowho ai via re ma ruẹsi wo ugho ho.

•   Iruo Ebabọ gbe Ẹruorote: Ma rẹ bọ jẹ rẹrote iwou egagọ nọ e ghare hrọ họ evaọ akpọ na soso re ikoko mai e sai wo emamọ eria nọ a rẹ jọ kuomagbe jiri Ọghẹnẹ. Yọ epọvo na ma rẹ bọ jẹ rẹrote iwou ogha gbe efisi efafa sa-sa re. Ahwo buobu nọ a bi ru iruo nana yọ ahwo nọ a fialoma via, onọ u ru nọ ma gbẹ be raha ugho ga hrọ họ.

•   Epanọ A be rọ Rẹrote Iruo Na: Igho nọ a rọ unevaze zọhọ ze kẹ iruo akpọ soso na ma bi ro ru iruo mai evaọ iwou ogha, efisi efafa, jẹ rọ rẹrote inievo nọ i re weze kpohọ ikoko sa-sa noke toke re a bọ ae ga.

•   Usi Uwoma Ota: A rẹ hwa Isẹri Jihova nọ e be ta usi uwoma hayo wuhrẹ amọfa “ẹme Ọghẹnẹ” osa ha. (2 Ahwo Kọrint 2:17) Rekọ wọhọ epanọ o jọ evaọ ikpe-udhusoi ọsosuọ, u wo Isẹri Jihova jọ nọ a wuhrẹ no nọ e be rehọ oke rai buobu ta usi uwoma na, yọ a rẹ kẹ ae umugho jọ nọ a rẹ rọ haya uwou je ru emeware efa jọ rọ rẹrote omarai.​—Ahwo Filipai 4:16, 17; 1 Timoti 5:17, 18.

•   Ahwo Owuhrẹ: Igho nọ a zọhọ ze ma be hai ro ru ikokohọ esese gbe ilogbo mai. Ma re je ru ividio nọ a rehọ no Ebaibol ze gbe eware efa nọ a rẹ sae gaviezọ kẹ ọvo. Ma te je wo isukulu sa-sa nọ a re jo wuhrẹ ekpako ukoko gbe Isẹri Jihova nọ e rẹ rehọ oke rai buobu ta usi uwoma na re a sai ru iruo rai ziezi.

•   Obufihọ kẹ Ahwo nọ Eware Okpẹtu E Via Kẹ: Ma re vi emu gbe ame se ahwo nọ eware okpẹtu e via kẹ, jẹ tubẹ ruẹrẹ hayo wariẹ bọ iwou rai dede. Te ahwo nọ ma “gbẹ rrọ ẹrọwọ na” te ahwo nọ a rrọ Isẹri Jihova ha ma be hai fi obọ nana họ kẹ.​—Ahwo Galesha 6:10.