Ahwo nọ a be ta usi uwoma Uvie Ọghẹnẹ kamara kamara ọvo ma re kele wọhọ Isẹri Jihova. (Matiu 24:14) Ahwo nana họ enọ e họ-ame no gbe enọ e re họ-ame he rekiyọ a te ahwo nọ a rẹ ta usi uwoma na.

 Ijo. Orọnikọ unevaze nọ ohwo o bi ru ma re rri ro kele iei wọhọ Osẹri Jihova ha, yọ orọnikọ oye u re ru nọ ohwo o re ro wo uvẹ-iruo jọ evaọ ukoko na ha. (Iruẹru Ikọ 8:18-20) Uzẹme riẹ họ, ẹsibuobu nọ ma te bi ru unevaze, a rẹ riẹ odẹ ohwo nọ o ru unevaze na ha. Osẹri Jihova kpobi ọ rẹ rọ oke, ẹgba gbe igho riẹ rọ tha iruo akpọ-soso mai na uke wọhọ epanọ u no rie eva ze gbe epanọ eware e rrọ kẹe.​—2 Ahwo Kọrint 9:7.

 Kamara kamara, Osẹri Jihova kpobi ọ rẹ niyẹrẹ usi uwoma ota riẹ kẹ ukoko nọ ọ rrọ. A rẹ gba ohwo họ niyẹrẹ nana ha.

 A re ku iyẹrẹ ahwo nọ a rrọ ukoko na kugbe, a ve vi ae se uwou ogha nọ o be rẹrote ẹkwotọ nọ ukoko yena o rrọ. Uwou ogha na u ve vi iyẹrẹ ikoko kpobi nọ e rrọ orẹwho na hayo ekwotọ nọ o be rẹrote na kpobọ ehri ukoko mai.

 Nọ ukpe iruo jọ u te re no, a ẹsiẹe a rẹ riẹ unu Isẹri Jihova nọ e mai bu evaọ ẹkwotọ hayo orẹwho kpobi evaọ ukpe iruo yena. A re ku unu nana kpobi kugbe re a sae riẹ unu Isẹri Jihova nọ e rrọ akpọ na soso. A re fi evuẹ Isẹri Jihova nọ e rrọ orẹwho kpobi họ oria “Akpọ na Soso” evaọ oria itanẹte mai. Iyẹrẹ itieye na e rẹ bọ omai ga wọhọ epanọ e jẹ hae bọ Ileleikristi ọsosuọ na ga na.​—Iruẹru Ikọ 2:41; 4:4; 15:3.

 Dede nọ ma re kele ahwo otiọye na kugbe unu Isẹri Jihova ha, ma re dede ai rehọ nọ a tẹ nyaze iwuhrẹ mai. Ahwo otiọye na buobu a rẹ nyaze ti kuomagbe omai nọ ma te bi ru Ekareghẹhọ uwhu Jesu nọ ma re ru ẹsiẹvo ẹgbukpe na. Fikiere ma te si unu ahwo nọ a rrọ Isẹri Jihova evaọ akpọ na soso no unu ahwo kpobi nọ a nyaze Ekareghẹhọ na no, ma rẹ rọ ere riẹ unu ahwo nọ a kuomagbe omai evaọ Ekareghẹhọ na. Evaọ ukpe 2022, unu ahwo nọ a nyaze Ekareghẹhọ na evaọ akpọ na soso a bu te ima ikpegbizii, idu egba eree gbe udhosa-gbivẹ, egba ihrẹ gbe udhone-gbesa (19,721,672).

 Ahwo buobu nọ a rẹ nyaze iwuhrẹ mai hi a rẹ rọwo nọ ma wuhrẹ Ebaibol na kugbe ai ọvọvẹ evaọ obọ iwou rai yọ a bi wo erere noi ze. Evaọ ukpe 2022, a tẹ ghale iẹe, ma wuhrẹ Ebaibol na kugbe ahwo nọ a bu te ima izii, idu egba ezeza gbe ikpegberee, gbe udhuzii-gbivẹ (5,666,996) kamara kamara, yọ a wuhrẹ ahwo nana buobu kugbe evaọ oria ovona.

 Nọ ahwo egọmeti a te bi kele ahwo, evaọ ẹsibuobu a rẹ nọ ahwo kpahe egagọ nọ a rrọ. Wọhọ oriruo, utu ahwo nọ a re kele ahwo evaọ obọ America nọ a re se U.S. Census Bureau o ta nọ “a rẹ nọ mi ahwo re ae ọvo a dhesẹ egagọ nọ a rrọ” evaọ okenọ a te bi kele ahwo. Utu na o ta re nọ onana u re ru nọ unu nọ a ti wo u re ro bu keme “onọ ahwo na a ta oye a te rehọ orọnikọ epanọ o ginẹ rrọ họ.” Wo ohẹriẹ, mai Isẹri Jihova ma re kele ahwo nọ a be ta usi uwoma jẹ be niyẹrẹ usi uwoma ota rai, orọnikọ enọ e ta ọvo nọ ae yọ Isẹri Jihova ha.