Ee, Isẹri Jihova a re fiobọhọ nọ okpẹtu nọ a r’obọ so ho ọ tẹ via. Ma re fiobọhọ kẹ Isẹri Jihova gbe ahwo nọ a rrọ Isẹri Jihova ha, yọ onana o rọwokugbe ẹme nọ Ebaibol na ọ ta evaọ obe Ahwo Galesha 6:10 inọ: “Joma ru oware uwoma kẹ ahwo kpobi, rekọ maero rọkẹ enọ ma gbẹ rrọ ẹrọwọ na.” Yọ fikinọ ahwo nọ eware okpẹtu e via kẹ a rẹ jọ ọkora, ma rẹ daoma tuduhọ ae awọ jẹ rọ Ebaibol na sasa ae oma.—2 Ahwo Kọrint 1:3, 4.

 Nọ okpẹtu nọ a r’obọ so ho ọ tẹ romavia, ekpako nọ e rrọ oria nọ okpẹtu na ọ jọ via na, a vẹ daoma nya inievo na wariẹ sọ aikpobi a rrọ kọkọ, re a jẹ riẹ enọ e gwọlọ obufihọ. Kẹsena ekpako na a vẹ vuẹ uwou ogha Isẹri Jihova nọ o rrọ orẹwho na kpahe eware nọ a kiẹ via.

 Otẹrọnọ ẹgwọlọ inievo nọ okpẹtu o te oma na ọ rro vi oware nọ ikoko nọ e wariẹ oyena họ a rẹ sae rẹrote, Utu Ẹruorote Isẹri Jihova a ve ru ọruẹrẹfihotọ nọ a re ro fiobọhọ. Onana o rọwokugbe oghẹrẹ nọ Ileleikristi ikpe udhusoi ọsosuọ a jẹ hai ru ro fiobọhọ kẹ ahwo nọ okpẹtu o te oma. (1 Ahwo Kọrint 16:1-4) Uwou ogha Isẹri Jihova nọ o rrọ orẹwho na o vẹ rehọ Ogbẹgwae Obufihọ kẹ Ahwo nọ Eware Okpẹtu E Via Kẹ ro mu re a ru ọruẹrẹfihotọ na. Isẹri Jihova nọ e rrọ eria efa a rẹ fialoma via re a fiobọhọ hayo rọ okẹ unevaze fiobọhọ.—Itẹ 17:17.

 Oware jọ nọ a rẹ rọ igho unevaze nọ a vi kpohọ uwou ogha Isẹri Jihova ru họ, obọ nọ a re fihọ kẹ ahwo nọ eware okpẹtu e via kẹ. (Iruẹru Ikọ 11:27-30; 2 Ahwo Kọrint 8:13-15) Nọ orọnọ ahwo nọ a re wobọ evaọ iruẹru obufihọ na a rẹ hwae osa ha na, a be ginẹ rehọ unevaze na fiobọhọ kẹ ahwo nọ okpẹtu o te oma. Ma re mu raha igho unevaze kufiẹ hẹ.—2 Ahwo Kọrint 8:20.