Ijo, keme ohwo ọvo ọ rẹ jiroro kẹ omariẹ sọ ọ rẹ gọ Ọghẹnẹ. (Ahwo Rom 14:12) Isẹri Jihova a re wuhrẹ emọ rai ehrẹ Ebaibol, rekọ nọ emọ na a tẹ kpako no, ae ọvo a rẹ jiroro kẹ omarai sọ a rẹ jọ omọvo Isẹri Jihova.​—Ahwo Rom 12:2; Ahwo Galesha 6:5.

 Wọhọ esẹgbini buobu, Isẹri Jihova a gwọlọ nọ emọ rai a yeri emamọ uzuazọ. A re wuhrẹ emọ rai eware nọ a rẹ sai ru nọ i re fiobọhọ kẹ ae evaọ uzuazọ, emamọ iruemu, gbe eware nọ a rọwo evaọ egagọ rai. Isẹri Jihova a rọwo nọ Ebaibol na o re fiobọhọ kẹ ohwo yeri oghẹrẹ uzuazọ nọ o mai woma, fikiere a rẹ daoma wuhrẹ emọ rai ehrẹ nọ e rrọ Ebaibol na jẹ wha ai kpohọ iwuhrẹ ukoko rai. (Iziewariẹ 6:6, 7) Nọ ọmọ kpobi ọ be kpako na, eware nọ a wuhrẹ i riẹ no i re fiobọhọ kẹe jiroro kẹ omariẹ sọ ọ rẹ jọ egagọ ọsẹgboni riẹ.

•  Kọ Isẹri Jihova a rẹ họ emọboba ame?

•  Kọ Isẹri Jihova a rẹ siọ emọ rai nọ a tẹ jiroro nọ a rẹ họ-ame he?

•  Fikieme Isẹri Jihova a rẹ rọ wha emọ rai lele oma kpohọ usi uwoma ota?

•  Kọ Isẹri Jihova a re ru ehaa edẹ eriosehọ hayo oghẹrẹ ehaa efa?

•  Eme emọ nọ a yọrọ evaọ egagọ Isẹri Jihova a ta?

 Ijo. Ebaibol na ọ ta kpahe emọboba nọ a họ-ame vievie he. Wọhọ oriruo, Ebaibol na o dhesẹ nọ taure Ileleikristi ikpe-udhusoi ọsosuọ a tẹ te họ-ame, a yo ovuẹ usi uwoma na, a rọ “evawere dede eme [na]” rehọ, a te kurẹriẹ. (Iruẹru Ikọ 2:​14, 22, 38, 41) Fikiere taure ohwo ọ tẹ te họ-ame, o gwọlọ nọ ọ rẹ kpako te epanọ o re ro wo otoriẹ oware nọ Ebaibol na o wuhrẹ, ọ rẹ rọwo iẹe, yọ ọ rẹ jiroro nọ o re ru eware nọ o bi wuhrẹ na. Eware nana yọ eware nọ ọmọboba ọ rẹ sai ru hu.

 Nọ emọ a be rro na, a rẹ sae salọ nọ a rẹ họ-ame. Rekọ re a te ti ru onana, o gwọlọ nọ a re wo otoriẹ oware a bi ti ru na vevẹ.

 Ijo. O make rọnọ o rẹ kẹ esẹgbini nọ e rrọ Isẹri Jihova uye nọ ọmọ rai ọ gbẹ rọwo nọ ọ rẹ jọ Osẹri Jihova ha, a re gbe you ọmọ na ghele. A re siomanoi hi fikinọ ọ rọwo nọ ọ rẹ jọ omọvo Isẹri Jihova ha.

 U wo ẹjiroro sa-sa nọ ma rẹ rọ wha emọ mai lele oma kpohọ usi uwoma ota. a

•   Ebaibol na ọ vuẹ esẹgbini nọ a wuhrẹ emọ rai kpahe Ọghẹnẹ gbe oghẹrẹ nọ a rẹ rọ gọe. (Ahwo Ẹfisọs 6:4) Re ohwo ọ ta eware nọ ọ rọwo kẹ amọfa yọ abọjọ egagọ, fikiere usi uwoma ota yọ obọdẹ edhere jọ nọ esẹgbini a re ro wuhrẹ emọ rai kpahe Ọghẹnẹ.​—Ahwo Rom 10:9, 10; Ahwo Hibru 13:15.

•   Ebaibol na ọ tuduhọ emaha na awọ nọ a “jiri odẹ ỌNOWO na.” (Olezi 148:12, 13, Ebaibol Ẹri Na) Edhere jọ nọ o wuzou nọ ohwo o re ro jiri Ọghẹnẹ họ nọ ọ tẹ be ta ẹme kẹ amọfa kpahe Ọghẹnẹ. b

•   Emaha a re je wuhrẹ eware efa re nọ a te bi lele esẹgbini rai kpohọ usi uwoma ota. Wọhọ oriruo, a re wuhrẹ epanọ a re ro lele oghẹrẹ ahwo kpobi ta ẹme ziezi. Yọ a re je wuhrẹ emamọ iruemu wọhọ ọdawẹ, ororokẹ, uwowou, adhẹẹ, gbe epanọ a re ro fiobọhọ kẹ amọfa. U re je ru nọ a rẹ rọ riẹ ẹjiroro nọ a rọ rọwo eware nọ a rọwo na wọhọ epanọ e rrọ Ebaibol na.

 Isẹri Jihova a re ru ehaa edẹ eriosehọ hayo oghẹrẹ ehaa efa nọ e rẹ dha Ọghẹnẹ eva ha. c (2 Ahwo Kọrint 6:​14-17; Ahwo Ẹfisọs 5:10) Wọhọ oriruo, ma re ru ehaa ẹdẹ-eyẹ hayo Kresimesi hi keme obọ egedhọ i no ze.

 Ghele na, o rẹ were omai re ma raha oke kugbe ahwo uviuwou mai jẹ kẹ emọ mai ekẹ. Rekọ ukpenọ ma rẹ hẹrẹ ugogo ẹdẹ jọ evaọ ukpe na re ma tẹ kẹ amọfa okẹ, ma re ru epanọ ma re ro kuomagbe ẹsikpobi jẹ kẹ amọfa ekẹ oke kpobi evaọ ukpe na.