Oghẹrẹ nọ ma rri isukulu o rọwokugbe oware nọ Ebaibol na ọ ta. Osẹri Jihova kpobi ọ rẹ rọ obruoziẹ-iroro riẹ nọ ọ rọ Ebaibol wuhrẹ no jiroro oghẹrẹ nọ o re ro ru lele ehri-izi Ebaibol sa-sa, wọhọ enọ ma be te ta kpahe na. a

•  Isukulu i wuzou

•  Ẹme kpahe isukulu yọ oware nọ a rẹ jọ rri otọ mu ziezi

•  Isukulu ikpehru e rẹ sai ru ohwo wo eriwo ọthọthọ jẹ raha usu ohwo kugbe Ọghẹnẹ

•  Kọ Isẹri Jihova a wo Sunday School, koyehọ isukulu nọ a rẹ jọ wuhrẹ emaha evaọ Ẹdoka?

 Isukulu i re fiobọhọ kẹ ohwo wo iruemu jọ nọ Ebaibol na ọ ta nọ i wuzou, wọhọ “uvi areghẹ” gbe “epanọ a re roro oware te ziezi.” (Itẹ 2:10, 11; 3:21, 22) U te no ere no, Jesu ọ ta kẹ ilele riẹ nọ a wuhrẹ amọfa eware nọ o jie uzi riẹ kẹ ae. (Matiu 28:19, 20) Fikiere ma rẹ tuduhọ ahwo egagọ mai awọ re a wuhrẹ eware sa-sa evaọ uzuazọ, wọhọ obe-use, eware ikere, ẹmeọta-kugbe ahwo, b a vẹ jẹ riẹ kpahe egagọ efa gbe iruemu ẹwho amọfa.—1 Ahwo Kọrint 9:20-22; 1 Timoti 4:13.

 Egọmeti erẹwho sa-sa a riẹ nọ isukulu i wuzou re, oyejabọ nọ a rọ gwọlọ nọ ọmọ kpobi o re kpohọ isukulu epramare gbe ekọleji. Mai Isẹri Jihova ma re ru lele ọruẹrẹfihotọ egọmeti itieye na, keme Ebaibol na ọ ta nọ: “Jọ ohwo kpobi ọ romakpotọ kẹ enọ i wo udu-esuo okpehru,” hayo egọmeti. (Ahwo Rom 13:1) U te no ere no, ma rẹ ta kẹ emọ mai re a fi uzou hotọ jẹ dawo ẹgba rai kpobi evaọ isukulu, orọnikọ a rẹ moyẹlẹ hẹ. c Ọghẹnẹ ọ jọ Ebaibol na ta nọ: “Oware kpobi nọ wha bi ru, wha rọ udu kpobi ru ei wọhọ ẹsenọ wha bi ru ei kẹ Jihova, orọnikọ ahwo ho.”—Ahwo Kọlọsi 3:23.

 Isukulu i re fiobọhọ kẹ omai rẹrote uviuwou mai. Ebaibol na ọ ta nọ, “otẹrọnọ ohwo jọ ọ be rẹrote ahwo riẹ hẹ, maero kọ enọ e rrọ ahwo uviuwou riẹ, ọ vro ẹrọwọ na no je yoma vi ohwo nọ o wo ẹrọwọ họ.” (1 Timoti 5:8) Isukulu e rẹ sai ru omai wo iruo nọ ma rẹ rọ rẹrote uviuwou mai, wọhọ epanọ Ọghẹnẹ ọ gwọlọ nọ ma ru. Obe na, The World Book Encyclopedia o ta nọ, obọdẹ ẹjiroro jọ nọ a re ro kpohọ isukulu họ, “re ahwo a wha ẹnyaharo ziọ ẹwho nọ a be rria . . . re a wo iruo nọ a re ru.” O rẹ mae lọhọ kẹ ohwo nọ o wo onaa iruo, nọ o kpohọ isukulu re o wo iruo nọ ọ rẹ rọ rẹrote uviuwou riẹ vi ọnọ o wo onaa ovuovo ho, nọ o no ekọleji nwrotọ họ.—Itẹ 22:29.

 Edhere ọfa nọ esẹgbini a rẹ rọ rẹrote emọ rai họ, a re wuhrẹ ae epanọ a sae rọ rẹrote omobọ rai nọ a tẹ kpako no, yọ isukulu i re fiobọhọ gaga evaọ onana. (2 Ahwo Kọrint 12:14) Ma rẹ tuduhọ esẹgbini awọ re a ruẹ nọ emọ rai a kpohọ ekọleji nwrotọ o tẹ make rọnọ evaọ oria nọ a rrọ a rẹ hwa osa isukulu, o lọhọ re a kpohọ isukulu hu, hayo a re wuhrẹ emetẹ hẹ. d Ma rẹ jẹ vuẹ esẹgbini epanọ a sai ro se eware isukulu emọ rai gboja. e

 Ma re rri otọ mu ziezi nọ ma tẹ be jiroro isukulu nọ ma rẹ nya. Ebaibol na ọ ta nọ: “Ogbori ọ rẹ rọwo ẹme kpobi, rekọ ọnọ o wo orimuo o re rri otọ mu re ọ tẹ te jowọ.” (Itẹ 14:15) Oria Ebaibol nana o be lẹliẹ omai romatotọ roro kpahe oghẹrẹ ewuhrẹ nọ ma rẹ romakẹ nọ ma te nwrotọ no ekọleji no, unuigho nọ a rẹ hwa fihọ ewuhrẹ na gbe irere nọ i re noi ze. Wọhọ oriruo, ẹsibuobu re a wuhrẹ iruo o rẹ nwane rehọ oke tere he, yọ ohwo na ọ rẹ sai wo okọ obọriẹ lọlọhọ.

 Uwuhrẹ Ọghẹnẹ o rẹ kẹ erere vi isukulu akpọ na kpekufiẹ. Ẹme Ọghẹnẹ nọ ọ rrọ Ebaibol na ọ rẹ sai ru omai wo eriariẹ nọ e rẹ kẹ uzuazọ, oware nọ isukulu akpọ na o rẹ sae kẹ omai vievie he. (Jọn 17:3) Eware nọ Ọghẹnẹ o bi wuhrẹ omai i re je ru omai wo emamọ iruemu, i bi fiobọhọ kẹ omai riẹ “oware nọ u kiẹrẹe, nọ o gba je kiehọ, oware uwoma kpobi.” (Itẹ 2:9) Isukulu nọ Pọl ukọ na ọ nya o wọhọ yunivasiti evaọ oke mai na, ghele na ọ ta nọ “eriariẹ kpahe Kristi Jesu . . . e ghare vi eware kpobi.” (Ahwo Filipai 3:8; Iruẹru Ikọ 22:3) Epọvo na nẹnẹ re, Isẹri Jihova buobu a kpohọ isukulu ikpehru, ghele na a muẹrohọ nọ uwuhrẹ Ọghẹnẹ o rẹ mae kẹ erere. f

 Ohare jọ evaọ Ebaibol o ta nọ: “Ohwo nọ o wo areghẹ ọ rẹ ruẹ oware enwoma, o ve siomano.” (Itẹ 22:3) Isẹri Jihova a muẹrohọ nọ yunivasiti gbe eria isukulu ikpehru efa e rẹ sae raha ohwo jẹ raha usu ohwo kugbe Ọghẹnẹ. Oyejabọ nọ Isẹri Jihova buobu a rọ jiroro nọ a re fi omarai hayo emọ rai họ oria utioye he. A ruẹ nọ a rẹ jọ isukulu ikpehru wuhrẹ ahwo iwuhrẹ ethọthọ, wọhọ enọ ma be te ta kpahe na:

•   Eriwo ọthọthọ: Ugho u re ru ohwo wo evawere gbe ufuoma

   Ẹsibuobu a rẹ jọ isukulu ikpehru wuhrẹ nọ, ohwo o te kpohọ isukulu ikpehru ọvo ọ sai ro wo emamọ iruo nọ a rẹ jọ hwae emamọ osa. Fikiere ahwo a bi zurie ruọ yunivasiti re a ruẹsi emamọ iruo. Otu jọ a bi roro nọ ugho u ti ru ai wo evawere gbe ufuoma, rekọ Ebaibol na o dhesẹ nọ iroro yena e thọ. (Ọtausiuwoma Na 5:10) Mai wuzou, Ebaibol na o wuhrẹ nọ “uyoyou ugho yọ ehri oghẹrẹ eware iyoma kpobi,” yọ onana o sai ru ohwo kie no egagọ Ọghẹnẹ. (1 Timoti 6:10) Isẹri Jihova a be daoma kpobi re “ogaga eviẹhọ efe” u gbe ru ai kie no edhere Ọghẹnẹ hẹ.—Matiu 13:22.

•   Eriwo ọthọthọ: U fo re ohwo o kpohọ isukulu ikpehru re ọ ruẹsi wo okpodẹ

   Wọhọ oriruo, osu Georgia jọ evaọ okenọ u kpemu nọ a re se Nika Gilauri o kere kpahe oghẹrẹ nọ ahwo orẹwho riẹ a rri isukulu ikpehru, inọ: “Ahwo buobu a re roro nọ o gbahọ nọ a re wo idigri evaọ yunivasiti re a ruẹsi wo orro evaọ Georgia. . . . [Evaọ okenọ u kpemu,] nọ uzoge o gbe wo idigri hi, yọ ọ be wha omovuọ se uviuwou riẹ.” g Rekọ Ebaibol na ọ vẹvẹ omai unu nọ ma dhogbo epanọ ma re ro wo okpodẹ hẹ evaọ akpọ nana. Jesu ọ ta kẹ isu egagọ oke riẹ nọ e jẹ gwọlọ orro, inọ: “Ẹvẹ wha sae rọ rọwo kpakiyọ wha be jọ obọ ohwohwo gwọlọ oruaro?” (Jọn 5:44) Nọ ohwo o te kpohọ yunivasiti, o rẹ sae lẹliẹe wo omorro, onọ Ọghẹnẹ o mukpahe.—Itẹ 6:16, 17; 1 Pita 5:5.

•   Eriwo ọthọthọ: Ohwo kpobi ọ rẹ jiroro kẹ omobọ riẹ kpahe oware nọ u woma gbe onọ u yoma

   Isẹri Jihova a rọwo nọ Ọghẹnẹ ọvo họ ọnọ ọ rẹ vuẹ omai oware nọ u woma gbe onọ u yoma. (Aizaya 5:20) Rekọ, wọhọ epanọ uzoẹme jọ evaọ obe na Journal of Alcohol and Drug Education o ta, emọ buobu nọ e rrọ yunivasiti a re “ru eware nọ i wo ohẹriẹ no onọ a riẹ nọ u woma” h fiki ehwa rai nọ i re gele ai họ ru eware nọ i fo ho. Ẹme nọ a ta evaọ obe nana o rọwokugbe ehri-uzi Ebaibol nọ o ta nọ: “Usu uyoma o rẹ raha uruemu ezi.” (1 Ahwo Kọrint 15:33) Iruemu iyoma nọ Ọghẹnẹ o mukpahe wọhọ idieda-thomawa, imu egaga erehọ, gbe ọfariẹ-ogbe e da yunivasiti fia, yọ a rẹ tubẹ tuduhọ ahwo awọ re a ru eware nana.—1 Ahwo Kọrint 6:9, 10; 2 Ahwo Kọrint 7:1.

•   Eriwo ọthọthọ: Isukulu ikpehru họ edhere nọ ọ mai kiehọ nọ a sai ro ru akpọ na woma

   Ma ruẹ nọ ẹjiroro nọ ahwo buobu a bi ro kpohọ isukulu ikpehru họ, orọnikọ re a fe, ru eware nọ i fo ho, hayo wo okpodẹ hẹ, rekọ a gwọlọ ru uzuazọ rai gbe akpọ na woma. Onana u yoma ha, rekọ Isẹri Jihova a wo ẹjiroro nọ o wo ohẹriẹ no onana. Wọhọ Jesu, ma riẹ nọ Uvie Ọghẹnẹ ọvo o te sai ru akpọ na woma. (Matiu 6:9, 10) Rekọ, orọnikọ ma keria rọ abọ muoma be hẹrẹ Uvie na re u ti ku ebẹbẹ akpọ na họ họ. Ukpoye, wọhọ Jesu, ma bi whowho “usi uwoma Uvie na” evaọ akpọ na soso, bi fiobọhọ kẹ idu ahwo buobu siobọno iruemu iyoma kukpe kukpe, onọ u ru nọ a bi ro yeri emamọ uzuazọ. i—Matiu 24:14.