Ijo, o rrọ ọgbahọ nọ who re zihe ruọ Osẹri Jihova ha. Isẹri Jihova a bi wuhrẹ Ebaibol na kugbe ima ahwo buobu rekọ ahwo nana a rrọ ukoko Isẹri Jihova ha. a A bi wuhrẹ ahwo re a riẹ oware nọ Ebaibol na ọ ta. Whẹ ọvo whọ rẹ jiroro oware nọ who re ru. Ohwo ọ rẹ salọ oware nọ ọ rẹ rọwo kẹ omariẹ.​—Joshua 24:15.

 Ee. Ebaibol Efafa Akpọ Ọkpokpọ ọrọ Ikereakere Efuafo Na nọ a rọ eme nọ ahwo a be ta enẹna fa na ọ were omai gaga yọ ma rẹ sae kẹ owhẹ ọjọ ọvọvẹ nọ whọ tẹ gwọlọ, rekọ o rẹ kẹ omai uye he nọ whọ tẹ gwọlọ se no Ebaibol obọra ze. Whọ sae jọ enwenọ efafa kpobi wuhrẹ kpahe ovuẹ Ebaibol na nọ u re ru omai wo ẹruore gbe esiwo na.

•   Ugogo ẹjiroro nọ o be wọ omai ru onana họ uyoyou nọ ma wo kẹ Jihova Ọghẹnẹ, ọnọ ọ gwọlọ nọ Ileleikristi a re wuhrẹ amọfa eware nọ ae omarai a wuhrẹ no. (Matiu 22:37, 38; 28:19, 20) Ma rri rie nọ uvẹ-ọghọ ulogbo o rrọ re ma jọ “ibe iruiruo Ọghẹnẹ” nọ ma bi fiobọhọ kẹ ahwo wuhrẹ kpahe oware nọ o rrọ Ẹme riẹ, Ebaibol na.—1 Ahwo Kọrint 3:6-9.

•   Ẹjiroro ọfa nọ o be wọ omai ru onana họ uyoyou nọ ma wo kẹ erivẹ mai. (Matiu 22:39) O rẹ were omai gaga re ma wuhrẹ amọfa emamọ eware nọ ma wuhrẹ no.​—Iruẹru Ikọ 20:35.