Ijo. Mai Isẹri Jihova yọ Ileleikristi, rekọ ma rrọ ichọche Protẹstant he. Fikieme?

 A dhesẹ ichọche Protẹstant wọhọ “egagọ nọ e wọso ichọche Kathọlik.” Dede nọ eware nọ mai Isẹri Jihova ma rọwo i wo ohẹriẹ no erọ ichọche Kathọlik, mai yọ ichọche Protẹstant he. Oware nọ ma rọ ta ere họ:

1.   Iwuhrẹ ichọche Protẹstant buobu e wọso eware nọ Ebaibol na o gine wuhrẹ. Wọhọ oriruo, Ebaibol na o wuhrẹ nọ “Ọghẹnẹ ọvo ọ rrọ,” orọnikọ esanerọvo ho. (1 Timoti 2:5; Jọn 14:28) Yọ Ebaibol na o wuhrẹ nọ Ọghẹnẹ ọ te raha irumuomu no, orọnikọ ọ te mahe ae evaọ erae ehẹle he, ukpoye ọ te raha ae no bẹdẹ bẹdẹ.​—Olezi 37:9; 2 Ahwo Tẹsalonika 1:9.

2.   Ma rẹ wọso hayo daoma nwene ichọche Katọlik hi hayo egagọ ọfa jọ kpobi. Ukpoye, ma be ta usi uwoma kpahe Uvie Ọghẹnẹ je fiobọhọ kẹ ahwo fi ẹrọwọ họ eyaa Ọghẹnẹ. (Matiu 24:14; 28:19, 20) Ma gwọlọ nọ ma re wuhrẹ ahwo nọ a wo emamọ eva uzẹme na kpahe Ọghẹnẹ gbe Ebaibol na, orọnikọ re ma nwene egagọ jọ họ.​—Ahwo Kọlọsi 1:9, 10; 2 Timoti 2:24, 25.