Isẹri Jihova a re ru lele ohrẹ Ebaibol, fikiere a rẹ kpunu fihọ eware kpobi nọ a bi gu fihọ ae uzou hu, hayo nọ a te bi se ai ẹkoko. Wọhọ oriruo, Ebaibol na ọ ta evaọ obe Itẹ inọ: “Ohwo nọ ọ be kpọ osẹkoko vi o bi zizie omovuọ.” (Itẹ 9:7, 8; 26:4) Ukpenọ ma re lele ahwo whọ fiki eme atanọ atanọ nọ a gu fihọ omai uzou, ma rẹ daoma epanọ ma re ro ru eva were Ọghẹnẹ.​—Olezi 119:69.

 O make rrọ ere na, Ebaibol na ọ ta nọ u wo “oke nọ a re ro fibo gbe oke nọ a rẹ rọ ta ẹme.” (Ọtausiuwoma Na 3:7) Ma rẹ kpahe ẹme kẹ ahwo nọ a gwọlọ ginẹ riẹ uzẹme na rekọ ma re lele ai vravro ho. Enẹ ma bi ro ru lele iwuhrẹ Jesu jẹ rọ aro kele oriruo riẹ avọ orọ Ileleikristi ikpe-udhusoi ọsosuọ na.

•   Jesu ọ kpunu hu evaọ okenọ a je gu eme fihọ iẹe uzou evaọ aro Pailet. (Matiu 27:11-14; 1 Pita 2:21-23) Epọvo na re, evaọ okenọ ahwo a jẹ ta nọ Jesu yọ ọgba-ore gbe ọgba-idi, ọ kpahe ẹme kẹ ahwo na ha. Ukpoye, ọ kuvẹ re ahwo a rọ emamọ uruemu nọ o je dhesẹ rọ riẹ uzẹme na, yọ onana o rọwokugbe ohrẹ Ebaibol nọ o ta nọ: “Iruo nọ areghẹ o ru a rẹ rọ riẹ nọ o kiẹrẹe.” (Matiu 11:19) Ghele na, orọnikọ ẹsikpobi Jesu ọ jẹ hai fibo ho. Ọ kpahe ẹme kẹ ahwo nọ a jẹ raha odẹ riẹ evaọ okenọ o gwọlọ ere.​—Matiu 15:1-3; Mak 3:22-30.

   Jesu o wuhrẹ ilele riẹ nọ ahwo a tẹ maki gu eme fihọ ae uzou, a kuvẹ hẹ re onana o lẹliẹ udu whrehe ai. Ọ ta nọ: “Eva e were owhai nọ ahwo a tẹ la owhai eka je kpokpo owhai jẹ ta oghẹrẹ erue iyoma kpobi kpahe owhai fiki mẹ.” (Matiu 5:11, 12) Dede na, Jesu ọ ta nọ ọ te jọ kugbe ilele riẹ nọ ọtaraha o te rovie uvẹ fihọ nọ a re ro se isẹri kpahe iẹe, inọ: “Mẹ te kẹ owhai eme nọ wha te ta gbe areghẹ nọ enọ e be wọso owhai kpobi a te sae zadhe hayo vro ho.”​—Luk 21:12-15.

•   Pọl ukọ na ọ hrẹ Ileleikristi re a kẹnoma kẹ avro nọ o wotọ họ keme “e rẹ kẹ erere he, e tẹ jẹ rrọ eware ifofe.”​—Taitọs 3:9; Ahwo Rom 16:17, 18.

•   Pita ukọ na ọ tuduhọ Ileleikristi awọ re a thọ ẹrọwọ rai nọ o tẹ lọhọ. (1 Pita 3:15) Ghele na, ọ ta nọ o mai woma re a rọ emamọ uruemu rai dhesẹ iẹe via viukpọ ẹmeunu. O kere nọ: “Wha te bi ru ewoma, wha sai ruru unu enọ e kare iroro nọ e be rọ ogbori ta ẹme.”​—1 Pita 2:12-15.