Ijo. Ma be hae ta usiuwoma n’uwou ruọ uwou, rekọ onana o nwani dhesẹ nọ fiki oye a ti ro siwi omai hi. (Ahwo Ẹfisọs 2:8) Ẹvẹ o rọ rrọ ere?

 Roro kpahe oriruo nana: Dae rehọ iẹe nọ ọdafe jọ nọ o re ruọghọ gaga ọ ya eyaa nọ ọ te kẹ ahwo okẹ oghaghae jọ. Rekọ re a sai wo okẹ na, a re kpohọ oria nọ o dhesẹ kẹ ae evaọ ẹdẹ nọ o fihọ. Otẹrọnọ whọ rọwo ẹme ọdafe na, kọ who ti ru epanọ ọ ta na? Ababọ avro, whọ te siọ ere ba eru hu! Yọ whọ te gwọlọ vuẹ ahwo uviuwou gbe egbẹnyusu ra kpahe eyaa nọ ọdafe na ọ yaa na re a sae wo okẹ na re. Ghele na, orọnọ fikinọ who kpohọ oria nọ ọdafe na ọ fodẹ na okẹ na u re ro te owhẹ obọ họ, keme ọdafe na ọ gwọlọ kẹ okẹ na no vẹre.

 Epọvo na re, Isẹri Jihova a rọwo nọ ohwo kpobi nọ o ru oreva Ọghẹnẹ, o re wo uzuazọ ebẹdẹ bẹdẹ nọ Ọghẹnẹ ọ ya eyaa riẹ na. (Ahwo Rom 6:23) Yọ ma be ta usiuwoma na kẹ amọfa keme ma riẹ nọ a ti wo erere no eyaa Ọghẹnẹ ze. Rekọ ma rẹ rọ obọ s’udu nọ Ọghẹnẹ o ti siwi omai fiki usiuwoma nọ ma be ta ha. (Ahwo Rom 1:17; 3:28) Evaọ uzẹme, ohwo-akpọ ọvuọvo ọ sai ruiruo te epanọ ọ sai ro wo esiwo ho. Ebaibol na ọ ta nọ, Ọghẹnẹ “o siwi omai fiki ohrọ-oriọ riẹ, orọnọ fiki iruo ikiẹrẹe jọ nọ ma ru hu.”—Taitọs 3:5.