Eme Họ Watch Tower Bible and Tract Society?
Watch Tower Bible and Tract Society of Pennsylvania yọ ogbẹgwae nọ a ro mu lele izi America nọ a re se laws of the Commonwealth of Pennsylvania, evaọ ukpe 1884. Yọ Isẹri Jihova họ enọ i wo ogbẹgwae nana, orọnọ a be rehọ iẹe thueki hi, ukpoye a be rehọ iẹe wha iruo usiuwoma ota rai haro evaọ akpọ na soso, onọ u kugbe Ebaibol gbe ebe efa nọ a bi printi.
Wọhọ epanọ izi ogbẹgwae na i dhesẹ, oware nọ a rọ to ogbẹgwae na họ, fiki egagọ, re u wuhrẹ je fiobọhọ kẹ ahwo, maero re “u whowho je wuhrẹ ahwo usiuwoma Uvie Ọghẹnẹ, onọ Jesu Kristi o ti su na.” Ẹsalọ a salọ ahwo nọ a rrọ ogbẹgwae nana orọnikọ epanọ ohwo o fi ugho họ bu te he. Ahwo ogbẹgwae na gbe enọ e be rẹrotei kpobi a bi fiobọhọ kẹ Utu Ẹruorote Isẹri Jihova na.
Egbẹgwae Sa-Sa Nọ I Bi Ruiruo Kugbe
U te no ogbẹgwae Watch Tower Bible and Tract Society of Pennsylvania na no, Isẹri Jihova a wo egbẹgwae efa sa-sa nọ egọmeti ọ kẹ udu evaọ erẹwho sa-sa. Egbẹgwae jọ evaọ usu rai a ku ẹme na “Watch Tower,” “Watchtower,” hayo epanọ a re sei evaọ ẹvẹrẹ rai kugbe odẹ nọ a mu kẹ ogbẹgwae na.
Egbẹgwae nana i fiobọhọ kẹ omai gaga no nọ ma be sae ro ruiruo mai ziezi anwẹnọ a rọ rehọ ai mu na, i bi fiobọhọ kẹ omai evaọ:
Ekere gbe Eprinti Ebe. Ma printi Ebaibol nọ i bu te ima egba ivẹ gbe udhe no (220 million) gbe ebe efa sa-sa nọ i bu te ima-odu udhuvẹ no (40 billion) evaọ evẹrẹ nọ i bu vi 900. Evie evuẹ itanẹte mai nọ a re se jw.org na, u bi ru ei lọhọ kẹ ahwo nọ a be sae rọ jọ itanẹte se Ebaibol na evaọ evẹrẹ nọ i bu vi 160 je bi fiobọhọ kẹ ahwo ruẹ iyo enọ Ebaibol wọhọ, “Eme Họ Uvie Ọghẹnẹ?”
Ewuhrẹ. Ma wo isukulu buobu nọ ma rẹ jọ wuhrẹ Ebaibol na te otọ. Wọhọ oriruo, no anwọ 1943 ze, Isẹri Jihova nọ i bu vi 9,000 a kpohọ Isukulu ọ Giliad no, yọ isukulu na i ru rai riẹ eware buobu no, ibuobu rai dede i zihe ruọ imishọnare no, yọ efa e be rehọ eriariẹ nọ a wo no isukulu na ze ro ru iruo usiuwoma ota akpọ soso na kẹre viere. U te no ere no, ima ahwo buobu, te Isẹri Jihova gbe enọ e rrọ Isẹri Jihova ha a bi kpohọ iwuhrẹ Isẹri Jihova koka koka nọ a be jọ wuhrẹ ai eware buobu. Ma te je bi Wuhrẹ ahwo nọ e riobe he epanọ a sae rọ riẹ obe ese jẹ sae kere, ma tube wo obe nọ ma bi ro wuhrẹ ai evaọ evẹrẹ nọ i bu te 120.
Iruo Obufihọ. Ma dhogbo bru ahwo nọ okpẹtu ọ via kẹ unuẹse buobu no—makọ okpẹtu nọ ohwo-akpọ ọ rọ obọ riẹ so dede, wọhọ ẹmo omoma nọ a fi evaọ 1994 evaọ obọ Rwanda nọ a jọ kpe ahwo buobu na, hayo okpẹtu nọ ohwo ọvo ọ wha ze he, wọhọ otọ nọ u nuhu evaọ obọ Haiti evaọ 2010 na.
Dede nọ egbẹgwae nana nọ ma wo na i fiobọhọ gaga kẹ omai no, orọnọ oyena u dhesẹ nọ a gbẹ riẹ hẹ kọ ma gbẹ sae ruiruo mai hi. Oleleikristi kpobi ọ riẹ nọ Ọghẹnẹ ọ vi rie re ọ nyai wuhrẹ ahwo emamọ usi na. (Matiu 24:14; 28:19, 20) Ma riẹ nọ Ọghẹnẹ ọ rrọ omai emu, yọ ma riẹ nọ omodawọ mai kpobi o ti “ru ei rro.”—1 Ahwo Kọrint 3:6, 7.