Evaọ 2005, ọzae aye jọ nọ ọ be rria obọ India o whu. Odẹ aye na Sowbhagya. Taure ọzae na o te ti whu, ọ jẹ rẹrote aye gbe ọmọtẹ riẹ Meghana nọ ọ rrọ ikpe esa ziezi. Eware e tẹ jọ gaga kẹ Sowbhagya keme ugho o gbẹ jariẹ nọ ọ rẹ rọ rẹrote omariẹ avọ ọmọtẹ riẹ hẹ.

 Eware i gine yoma gaga kẹ Sowbhagya keme ahwo a jẹ daezọ riẹ hẹ yọ a jẹ rọwo fiobọhọ kẹe gbe he. Ahwo uviuwou riẹ a je ru ei avọ ọmọtẹ riẹ wọhọ ahwo nọ a be yare eware, yọ ẹsikpobi a jẹ hae ta kẹe nọ ukpokpoma riẹ o ga hrọ. Re Sowbhagya ọ sae wereva, o te mu ichọche jọ họ ẹnya, rekọ ahwo ichọche na a je rri rie nyenyenye keme o wo ugho ho. Fikiere Sowbhagya o te mu iruo họ ẹgwọlọ re ọ sae ruẹ ugho rẹrote omariẹ avọ ọmọtẹ riẹ. Rekọ makọ epanọ ọ daoma gwọlọ iruo te, ọ ruẹ hẹ.

 Sowbhagya ọ ta nọ: “O jọ omẹ oma nọ akpọ mẹ o re no, fikiere mẹ tẹ gwọlọ nọ me re kpe omamẹ no. Rekọ mẹ riẹ nọ me te whu no, ọmọtẹ mẹ ọ te rioja keme eware e te jọ gaga kẹe. Fikiere mẹ tẹ jiroro nọ mẹ avọ iẹe ma re gbe whu ẹdẹvo.” Fiki epanọ oware na o be kẹ Sowbhagya uye te, yọ o roro nọ ohwo ọvo ọ be daezọ riẹ hẹ, ọ tẹ nyae dẹ umu nọ ọ sai ro kpe omariẹ avọ ọmọtẹ riẹ no.

 Nọ Sowbhagya ọ jọ itreni bi zihe kpo, Osẹri Jihova jọ nọ a re se Elizabeth ọ tẹ keria gbae, o te bi lele iei gbiku. Sowbhagya ọ tẹ ta kẹe nọ o wo iruo nọ o bi ru hu, fikiere Elizabeth ọ tẹ ta kẹe nọ o ti fiobọhọ kẹe gwọlọ iruo. Elizabeth ọ tẹ jẹ ta kẹe nọ ọ be nyai wuhrẹ ohwo jọ Ebaibol na. Ẹme nana o gbe Sowbhagya unu keme dede nọ o kpohọ ichọche buobu no, o ri yo ẹdẹvo ho inọ ahwo a bi wuhrẹ Ebaibol na. Elizabeth o te zizie Sowbhagya re ọ nyaziọ obọ uwou riẹ, re ọ riẹ epanọ a re wuhrẹ ohwo Ebaibol na.

 Nọ Sowbhagya o te obọ uwou, o gbe je roro kpahe epanọ o re ro kpe omariẹ no. Rekọ evaọ oke yena, omoni riẹ jọ ọ wha ọmọtẹ riẹ Meghana kpohọ erẹ, fikiere ọ tẹ ta nọ ọ rẹ hẹrẹ bẹsenọ o re kpozi taure o te ti ru oware nọ ọ gwọlọ na.

 Evaọ oke nọ ọ jẹ hẹrẹ na, o te weze bru Elizabeth, yọ o dede i rie rehọ whẹtiẹ whẹtiẹ. Elizabeth o te dhesẹ obe nana kẹe, Eme Ebaibol na O Gine Wuhrẹ? Uzoẹme nọ o mae were Sowbhagya evaọ obe na họ “Bovẹ Ahwo nọ A Whu no A Rrọ?” Ọ gwọlọ nọ ọ rẹ riẹ kpahe uyero ahwo nọ a whu no fiki ọzae riẹ nọ o whu obọ na. Ẹdẹdẹ yena, Sowbhagya ọ tẹ rọwo nọ a mu ei Ebaibol họ ewuhrẹ.

 Elizabeth o te zizie Sowbhagya re a gbe kpohọ okokohọ ologbo nọ a ti ru oka nọ u lele i rie. Ọ rọwo nọ ọ rẹ nya. Eware nọ o yo evaọ okokohọ na e were riẹ gaga, fikiere ọ tẹ jiroro nọ ọ gwọlọ jọ Osẹri Jihova. Ofariẹ, nọ ọ nwani no okokohọ na te uwou no, ọ tẹ ruẹ iruo.

 Sowbhagya ọ tẹ ruabọhọ je wuhrẹ Ebaibol na. Fiki eware nọ o bi wuhrẹ na, ọ gbẹ gwọlọ nọ o re kpe omariẹ no ho. Ọ tẹ họ-ame, yọ uwhremu na ọmọtẹ riẹ Meghana, ọ họ-ame re. Enẹna, aimava na a rrọ ekobaro oke-kpobi. Ọmọtẹ riẹ Meghana ọ rẹ jọ obọ uwou ru iruo Ebẹtẹle evaọ emedẹ jọ kugbe ẹko-iruo efafa jọ evaọ India.

 Eva e were Sowbhagya avọ Meghana inọ Elizabeth ọ nyabru Sowbhagya evaọ itreni nọ ọ jọ, o te lele iei gbiku, jẹ ta usi uwoma kẹe! Yọ ẹsikpobi a re yere Jihova re. Meghana ọ ta nọ: “O gbẹ rrọ usi uwoma nọ a ta kẹ oni mẹ ẹdẹ yena ha, enẹ yọ ma whu nọ uki mai u di ẹbe no. Enẹna eva e be were omai gaga. Mẹ avọ oni mẹ ma bi rẹro oke nọ ma te wariẹ ruẹ ọsẹ mẹ, wuhrẹ iẹe kpahe Jihova, jẹ vuẹe kpahe epanọ Jihova o ro siwi uzuazọ mai.”