Osman avọ aye riẹ gbe ọmọtẹ rai a jẹ rọ oware nọ a re fi ebe họ nọ a re ghelie ta usi uwoma kẹle eria nọ a re ki ahwo fihọ evaọ orẹwho Chile. Ẹsiẹvo na, a tẹ ruẹ ogbotu ahwo nọ a be wọ ori jọ nyai ki, yọ a bi kporo ile nọ i bi do gaga. Ahwo jọ nọ a rrọ usu rai a te roro nọ Osman yọ epastọ ichọche rai jọ. Fikiere a tẹ nyabru ei, nabe gbalọ iẹe, jẹ ta kẹe nọ, “Whẹ kobiruo nọ whọ rọ kake nyaze Pastọ, ma bi rẹro ra vẹre!”

 Dede nọ Osman ọ jẹ daoma vuẹ ae nọ ọye họ epastọ na ha, a je wo otoriẹ ẹme nọ ọ be ta ha fiki edo ogbotu na. A tẹ wọ ori na vrẹ kpohọ oria nọ a re ki ahwo fihọ na. Nọ iminiti jọ e vrẹ no, umutho ahwo jọ a te zihe ze be ta kẹ Osman nọ, “Pastọ, ma be hẹrẹ owhẹ evaọ oria nọ a re ki ahwo fihọ na.”

 Nọ a siọ edo ba eru no, Osman ọ tẹ vuẹ ae ohwo nọ ọyomariẹ ọ rrọ gbe oware nọ ọ rrọ etẹe ru. Nọ eva e dhae bẹ no fikinọ epastọ rai ọ nyaze he, a tẹ ta kẹ Osman nọ, “Ivie whọ gbẹ nyaze ghele re whọ ta ẹmẹme jọ no Ebaibol na ze kẹ ahwo nọ a kokohọ na?” Osman ọ tẹ rọwo.

 Evaọ oke nọ a jẹ nya kpohọ oria nọ a re ki ahwo fihọ na, Osman ọ tẹ jẹ nọ ae enọ kpahe ohwo nọ o whu na, yọ o bi roro kpahe eria ikere nọ ọ sae rọ sasa ae oma. Nọ a te obọ uki na no, o te dhesẹ omariẹ kẹ ogbotu na. Ọ tẹ ta kẹ ae nọ omọvo Isẹri Jihova ọ rrọ, yọ ọ rẹ vuẹ ahwo emamọ usi nọ o rrọ Ebaibol na.

 Kẹsena o te se obe Eviavia 21:3, 4 gbe obe Jọn 5:28, 29 kẹ ae, ọ tẹ jẹ ta nọ uwhu nọ ahwo a bi whu na yọ ẹjiroro Ọghẹnẹ hẹ. Yọ kẹle na, Ọghẹnẹ ọ te kpare ahwo nọ a whu no zihe ziọ uzuazọ re a rria bẹdẹ bẹdẹ evaọ otọakpọ na. Nọ Osman o ku ẹme riẹ họ no, ahwo buobu a tẹ gbalọ iẹe bi yere iei rọkẹ “emamọ usi ovuẹ Jihova” nọ ọ ta kẹ ae na. O te zihe kpohọ oria nọ oware ebe nọ a re ghelie na o rrọ na.

 Nọ a ki ohwo na no, ahwo jọ nọ a bi weri a tẹ nyaziọ oria nọ oware ebe na o rrọ, a tẹ nọ Osman avọ ahwo uviuwou riẹ enọ kpahe Ebaibol na. A lele i rai ta ẹme krẹkri, yọ evaọ oke nọ a je kpo, a rehọ enwenọ ebe kpobi nọ e jọ oware ebe nọ a re ghelie na.